«Лямпиадаöн» позьö петкöдчыны войтырсикас тшупöдын

Тшай чашка сайын чукöртылiсны Ыджыд­виддзысь медводзмöстчысь войтыр, кодъяс отсöгöн и нуöдсьö тайö гажыс. КР-са Каналан Сöветысь председательöс медводдза вежысь Валерий Марков, «Коми войтыр» öтмунöмöн веськöдлысь Сергей Габов, «Кöрткерöс» МР-са веськöдлысьöс вежысь Александра Барановская пасйисны Аттьöалана гижöдöн да грамотаöн Лямпиада котыртысьясöс да нуöдысьясöс.

Чукöртчылöм дырйи пасйисны, мый «Лямпиада» фестиваль лои нин брендöн эз сöмын Кöрткерöс районын, но и Коми Республика пасьтаын, и миянлысь пö лямпиецъясöс тöдöны Россияын да матысса суйöр сайын. Фестиваль нуöдiгöн Ыджыд­видзса быд олысь лоö сiйöс кыпöдысьöн. Валерий Марков татчö содтiс, мый Ыджыдвидз сикт тайö гаж нуöдiгöн быт­тьö пö кодзувкоткар, кöнi быдöн тöдö ассьыс удж да тырвыйö пöртö сiйöс олöмö. «Лямпиада» фестивальöн позьö пö нин петкöдчыны войтыркостса тшупöдын, öд котыртöм да нуöдöм уджсö лои ладмöдöма нин тырвыйö да бура.