Меню
12+

Газета Корткеросского района - Кöрткерöс районса газет

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!
Выпуск 24 от 17.06.2016 г.

Гажöдчис Пöддельнöй

Автор: Ольга ПЕЧЕНИЦЫНА.
Внештатный корреспондент.

Фото автора.

Россия лунö сьöлöмсяньыс гажöдчис Пöддельнöй сикт: сылы тыри 340 во.

Гаж заводитчис велопарадсянь, кодöс сиисны республикалы 95 во тырöмлы. Урчитöм кадö школасянь сикста клублань дружнöя чепöсйис велосипедъясöн велöдчысьяслöн ыджыд котыр. Парадсö мичмöдісны Россиялöн да республиканымлöн дöрапасъяс. А клуб дорын заводитöма нин паськöдчыны гаж: кужысь киа сиктса йöзлöн выставка, «фотовернисаж», тшай-пöжасöн гöститöдöм, «шоколадысь фонтан», шойнатыса мастеричаяслöн вöчöмторъясöн вузасьöм… Окотитысьяслы позис кытшовтны мича Пöддельнöй экскурсияöн, кодöс нуöдiс Арина Моторина. Культура керка дорын пыр кыліс «ловъя» шылад, сьылісны пöддельнöйсаяс. Торъя нин мичаа сьыліс Галина Вокуева.

Дас кык чассянь заводитчис концерт. Поводдя долыда «нюмъяліс», та вöсна ставнас гажыс муніс ывла вылын. Кык часысь дырджык артистъяс гажöдісны сиктса да воöм йöзöс. Мичаа жö сьылöны пöддельнöйса войтыр: мый ичöтыс, мый олöмаыс! Сьöлöмсянь сьылісны и хор, и дуэт, и öткöн. Кымын йöзкостса да коми сьыланкыв позис тайö лунö кывны! Сьöлöм бурмымöн! Йöктöмöн эз жö кольччыны ни. Тöдчö, мый Культура керкалöн уджыс ылькйöмöн мунö. Йöзкостса шылада инструментъясöн да гудöкöн педкöдчис сцена вывсянь и Шойнатыысь воöм гöсьт – С.Г. Попов. Сійö артмöдліс сиксаяскöд сідз шусяна оркестр – ворсöдіс йöзöс тöдса шылад улö. А вомынсаяс век шемöсмöдöны ставнысö мича йöктöмöн! Та пöрйö ок уна йöктöм жö позис видзöдны да нимкодясьны. Весиг луд вылö петöмöн хороводасисны окотитысьяскöд. Таöн дзик нин долыдмöдісны ставнысö асланыс кыпыдлуннас!

Сикстса юрнуöдысьлысь могъяс олöмö пöртысь А.Ю. Зюзева некодöс эз вунöд чолöмавны. Медыджыд олысьяслы и сöмын на чужöмаяслы, сикстса водзмöстчысьяслы и юбиляръяслы вичмисны колана кывъяс. Тöдмöдіс сикт историяöн и тöдчанлуннас.

Сиа тайö кыпыд мича сиктыслы водзö мичмыны да сöвмыны, а олысьясыслы – тадзи жö сьöлöмсянь радейтны ассьыныс Пöддельнöйсö и водзö вылö эскыны сöмын бурас.

Добавить комментарий

Добавлять комментарии могут только зарегистрированные и авторизованные пользователи.

112