16+

Газета Корткеросского района - Кöрткерöс районса газет

Главная / Новости / Уджын воздмöстчысь
06.10.2017 14:23
  • 80

Уджын воздмöстчысь

Миян районын виз-му овмöс предприятиеясöн веськöдлöны-юрнуöдöны кывкутысь, зіль нывбабаяс. На пиысь öти — Надежда Владимировна Макарова, водзмöстчысьяс лыдö пырысь «Исток» СПК-öн (Ыджыдвиддзын) юрнуöдысь.

Надежда Владимировна — сиктын чужлöм, сиктын и уджалысь, олысь морт. Видз-му овмöсын сьöкыд уджсö тöдö ичöтсяньыс. Но та вылö видзöдтöг, сійö бöрйис эз кокни удж, а сэтшöмöс, кöні и мудзыд сюрлö, и шойччöмыд гежöда овлö. И талун Надежда Владимировна ньöти оз жалит, мый йитіс олöмсö видз-му овмöсын уджкöд. А сыкöд сійö «öтлаасьöма» 21 во сайын, на пиысь дас öтисö юрнуöдö овмöсöн.

Кыдзи висталіс Надежда Макарова, уджсикасö велöдчöм уджын, продавец-бухгалтерöн, абу и мойвиöма уджавны. Зато вöлі и лысьтысьысьöн, и кукъясöс видзысьöн, и бригадирöн, а бöрладорыс и бухгалтерöн, и медшöр бухгалтерöн. Тайö уджсикасъясын асьсö видлöм бöрын, быд боксянь асьсö бура петкöдлöм бöрын уджач, зіль нывбабаöс индісны юрнуöдысьöн. Надежда Владимировналöн висьталöм серти, тайö кывкутана уджас сылы примерöн лоö видз-му овмöсын, Нёбдінса СПК-ын уна во зільысь Анастасия Семёновна Микушева. Бур, ёрта йитöдъяс кутö и уджъёртъясыскöд, видз-му овмöс районса предприятиеясöн веськöдлысьяскöд. Ӧта-мöдыслы пыр отсасьöны, öтвылысь разьöны уджын артмылöм гöрöдъяс. Мыйысь ставныссö аттьöалö.

Куим во сайын выльмöдöм мöс карта да йöв лысьтан техника тöдчымöн кокньöдісны уджсö лысьтысьысьяслысь. Надежда Владимировна ошкö лысьтысьысьяссö, уджалöны пö бура, дышлун налöн абу. Тайö Анастасия Юрьевна Мишарина, Людмила Станиславовна Панюкова, Анна Дмитриевна Макарова, Александра Николаевна Мишарина, Светлана Григорьевна Мишарина да Вера Ивановна Панюкова. Овмöсöн юрнуöдысь серти, медым содіс пö йöв лысьтöм, колö уджö пыртны выль технология, бурмöдны стада, заптыны тырмымöн кöрым.

Кöрым заптöм кузя Надежда Макарова пасйис, тöвйыны пö тырмас. Ёна падмöдöма-торкöма турун пуктöм зэра поводдя. Но тракторист-механикъяс мездöмаöсь. Уджалöмаöсь пöсь петмöн да кöрымтöг эз кольöй. Турун серти план абу тырöма, но сенаж вевтыртöмаöсь. Овмöсöн веськöдлысьлы нимкодь, мый уджавны воисны том трактористъяс — Иван Олегович Панюков да Андрей Владимирович Макаров (механик-агроном). Налы пример петкöдлöны опыта нин трактористъяс Евгений Иванович Мишарин да Леонид Иванович Климов.

Тöдчана пай овмöс сöвмöмö пуктöны и бухгалтерияын уджалысьяс Ираида Анатольевна Никулина, Люция Ивановна Мишарина, Елена Валерьяновна Подорова, Надежда Александровна Макарова.

Уджкотыр кö бур и удж мунö ыджыд падмöгъястöг. Уджалысьяс йылысь варовитігöн юалім Надежда Владимировналысь: бырис-ö налöн кык во сайса ветеринар да агроном тырмытöм йылысь майшасьöмныс? Та вылö сійö вочавидзис, мый тайö юалöмыс эз пöртсьы. Талун овмöслы колöны и ветеринар, и агроном и кык лысьтысьысь. На дорö локтöма уджавны том зоотехник, но öні сійö декретын, та вöсна корöмаöсь вöвлöм зоотехникöс. Сідзжö Н. Макароваöс майшöдлö, мый том йöз оз локны уджавны видз-му овмöсö. Гашкö, сьöкыдлунъясысь полöны…. Но веськöдлысьлöн эм лача, мый выль мöс карта лоас да ыштасны. Надежда Владимировна юöртіс 300 юр вылö мöс карта кыпöдöм кузя бала-проект вöчöдöм йылысь. Ставыс кö артмас, то мöд во заводитасны стрöитчан уджъяс. «Истокöн» юрнуöдысьлы зэв окота, медым и кукъяс, и мöсъяс вöліны öти вевт улынöсь.

Надежда Макарова бура пöртö уджлысь могъяс и сэк жö зільлунсö да кывкутöмсö петкöдлö и депутаталан уджын. Сы дорö, сикт овмöдчöминса депутат дорö, тшöкыда шыöдчылöны сиктса олысьяс асланыс юалöмъясöн, тöждъясöн. Мыйöн вермö — отсалас, туйдас, ышöдас да бурöдас.

«Семьяын кö лад, то и уджын — бур», — шуö Надежда Владимировна. А Макаровъяслöн семья абу ичöт, верöсыскöд, Григорий Михайловичкöд, быдтöны-мывкыдсьöдöны нёль челядьöс, кык пи да кык ныв. Ас кадö Зулöб грездын Макаровъяс кыпöдісны керка. Шоныд позъяс олöны öта-мöдсö радейтöмöн да пыдди пуктöмöн, öтсöгласöн.

Уджсикас гажлун водзын Надежда Владимировна чолöмалö уджкотырсö, уджъёртъяссö, видз-му овмöсса ветеранъясöс, сиö налы тыр-бур олöм, крепыд дзоньвидзалун да выль вынъяс, кыпыд лов ру, уджын выль вермöмъяс. Аттьöалö найöс бур уджысь. Сідзжö аттьöалана кывъяс висьталіс районса администрацияöн веськöдлысьöс вежысьяс Александр Анатольевич Артеевлы да Людмила Александровна Даниловалы, видз-му овмöс районса юкöнöн юрнуöдысь Светлана Фёдоровна Савчуклы. Найö пö пыр зільöны отсавны видз-му овмöс уджын.

Сёрни помын Н.В. Макарова нöшта на содтіс, мый торъя сиöм эм сылöн и сюрукъяслы, мöс-куклы — медым пыр лоöны дзоньвидзаöсь, öд найö налöн медшöр дöзьöританторъясыс, кодъяс могмöдöны мортлы зэв колана вöлöгаöн.

Добавить комментарий

Добавлять комментарии могут только зарегистрированные и авторизованные пользователи.

Реклама

Вверх