Одыбса ветеранъяс гöсьтитiсны Висерын
Йирым 26 лунö Одыбса ветеранъяслöн котырö пырысьяс аддзысьлiсны Висерса библиотекаын сиктса ветеранъяслöн сöветкöд. Миян воиг кежлö дасьтöмаöсь пызан, пузьöдöмаöсь пöсь тшай. Огö на лёка олöй, майбыр, пызан кокыд, шуласны тай, чегö. Кöзяйкаяс унатор быдтöмаöсь град йöрын, вотчöмаöсь. Чöскыд пöжасыс вомад вöлi сылö.
Тшай юигмоз Висерса ветеранъяс юксисны асланыс мöвпъясöн, висьталiсны асланыс удж йылысь. А найö öтув бура зiльöны, тшöкыда нуöдöны уна сикас мероприятие. Аттьöалöны библиотекаын уджалысьясöс, кодъяслöн пыр восьсаöсь öдзöсъяс ветеранъяслы.
Зэв öд бур, кор öтувтчылöны олöма йöз, варовитыштöны, юксьöны выльторъясöн, сьылыштöны-гажöдчыштöны. Нимкодь, дерт, сöветын зiльысьяслы, кор унджыкöн волöны мероприятиеяс вылö, öд найö сьöлöмсянь дасьтöны найöс. Со психологъяс шуöны, медым пö лоны шудаджыкöн, дырджык овны дзоньвидзаöн, колö тшöкыдджыка шуда, кыпыда олысь йöзкöд аддзöдчывны, мед унджык ёрт вöлi тэ гöгöр. На дорын тэ асьтö вылöджык донъялан, тэ на дорын абу бабушка, а зэв на муса да колана ёрт.
Кор öтувтчылан, гажöдчыштан, став висьöм-нокыс вунлö. Сэк позьö и шуны: «Пöрысьлун локтас, а ме абу гортын».
Татшöм паныдасьлöмъяс зэв коланаöсь, öд быдöнлöн эм мыйöн юксьыштны. Висерса ветеранъяс дасьтöмаöсь ворсöм-сьылöмъяс, козинъяс быдöнлы вичмисны и. Ми сьöлöмсянь аттьöалам Висерса ветеранъяслысь котырöс, корам и найöс Одыбö волыны.
Добавить комментарий
Добавлять комментарии могут только зарегистрированные и авторизованные пользователи.
