Меню
12+

Газета Корткеросского района - Кöрткерöс районса газет

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!
Выпуск 45 от 07.11.2014 г.

Ыджыд аттьö тiянлы, дона ёртъяс!

Уна дас во вöльнöй светын олiгöн он-он да и зiлян видзöдлыны бöрö да кутшöмакö донъявны кольöм кадсö. Кöть и тöдан, мый эз ставыс вöв шыльыд-мольыд, сьöлöм вылад долыдджык овлö, кор казьтыштан бурсö. Мöдарö, сьöлöмыд дзугыльтчö, кор дум вылад усьöны жугыль здукъяс.

Уна во сайын менö чöвтiсны «Звезда» районса газет редакторысь. Дерт, мыж менам вöлi, но кыдзи тыдовтчис некымын во сайын, мыждыны вöлöм колö оз сöмын менö, но и ыджыд чина нöшта некымын мортöс.

И дум вылö пыр жö усьö Кöрткерöсысь КПСС райкомса вöвлöм первой секретарь Михаил Иосифович Мининлöн кывъясыс: «Василий Дионисьевич, тэнö, шуны кö рочöн, бура «подставитiсны». Терпитышт неуна, воас кад, ставыс воас ас местаас. Ми тэнö тöдам, тэ абу лёк морт, и сёрöнджык тэнö вылö на донъяласны». Пöшти тадзи жö сёрнитiс партийнöй удж кузя вöвлöм жö нин подчинённöй, но ыджыдджык арлыда да олöмын опыта Михаил Евгеньевич Королёв (Шойнатыысь).

Ме дас сизимöд во нин пенсия вылын, но дзик весь ог ов: корсьыся войнаса ветеранъясöс, уджын водзмöстчысьясöс да сёрнита та йылысь республикаса радиоын да телевидениеын, гижа районса да Коми Республикаса газет-журналъясö.

Эз сэтшöм важöн ме дорö шыöдчисны районын да и республикаын паськыда тöдса Сергей Лукич да Антонина Павловна Куликов гозъя да Анатолий Егорович Попов, медым ме гижыштi налöн олöмын тшупöда пас йылысь. Лои зэв любö. Кыдзи кужи, гижи. И кутшöм жö вöлi долыд сьöлöм вылын, кор пыдди пуктана казьтыштöм йöз вылö донъялiсны ас йывсьыныс менсьым гижöдъясöс.

Пенсия вылын нин меным вичмис Республикаса Юралысьлöн Почёт грамота, «За безупречную службу Республике Коми» пас да Республикаса пыдди пуктана уджалысьлöн ним. И тшöкыда дум вылö усьлöны Минин да Королёв ёртъяслöн коркö висьталöм кывъясыс.

Быдсöн чуймикодь, кор Коми культуралöн районса шöринын зiльысьяс вöзйисны аддзысьлыны районса войтыркöд, кодъяс нуöдöны ыджыд удж чужан мулысь история паськыдджыка да джуджыдджыка корсьöм-туялöм кузя. Но и мый? — шуас, гашкö, кодкö. Но став делöыс сыын, мый меным колö вöлöм лоны медшöр фигураöн.

«Звезда» газет кольöм пекничаö йöзöдлiс нин тайö аддзысьлöм йывсьыс гижöд, и ме ог кут ставсö «мойдны» выльысь, но висьтала зэв ыджыд аттьö ставныслы, кодъяс вылö донъялiсны менсьым корсьысян-туялан уджöс, и дерт жö, медводз культура шöринын зiльысьяслы — Галина Николаевна Шишкиналы, Валентина Михайловна Путинцевалы да Светлана Иосифовна Вязовалы. Ог вермы не казьтыштны Анатолий Антонович Смилингисöс, кодi ас кадö, да и öнi на, ёна отсасьö меным, Феликс Григорьевич Кармановöс, кодi отсалiс пыдiсяньджык тöдмасьны Тимушев ова уна морткöд. Казьтыштны кö став йöзсö, кодъяс кыдзкö да отсалiсны меным, артмас зэв кузь список. Нöшта öтчыд ыджыд аттьö месянь налы.

Кад öдйö исковтö водзö, олöма йöз пыр тшöкыдджыка нёрпалöны. Эг ылö наысь мун и ме. Неважöн ковмис шыöдчыны отсöгла хирург дорö. Примитiс менö Шойнатыын чужлöм Галина Александровна Мишарина. Сiйö тшöктiс мавтчыны колана да лöсялана кремъясöн да мазьясöн, а сiдзжö тшöктiс ветлыны физиотерапия юкöнö да примитны элетрофорез (быдса 10 сеанс — В.П.). И бара — кыдзи он казьтышт бур кывйöн юкöнын зiльысь Антонина Ивановна Игушеваöс (снимокын) да Нина Анатольевна Микушеваöс, медицинскöй сестраясöс, да терапевт Дмитрий Владимирович Поповöс?

Уджъяс да висьöм — наысь некытчö он пышйы. Но öд ми ставным кытöнкö да кыдзикö олам. И юрсюянiнтö кадысь кадö колö дзоньтавны. И со меным унаысь ковмылö шыасьлыны отсöгла «Тройка» лавкаö. И мыйлакö, ог гöгöрво, мыйла, ошкан кö лавкаясын зiльысь войтырöс, унаöн аддзöны сэтысь реклама. А ме зэв ыджыд аттьö висьтала индöм лавкаысь кöзяиныслы — Николай Александрович Панюковлы да сэнi уджалысь аньяслы.

Окота торйöн казьтыштны, мый тавося сентябрь 22 лунö ме веськалi Республикаса Юралысь дорö сiдз шусяна «личнöй приём» вылö. Шöр могыс менам вöлi Алексей Егорович Тимушевлы Россияса Геройлысь ним сетöм. Сёрниыс эськö Вячеслав Михайловичкöд та кузя вöлi эз нин öтчыд (кызвыннас книгаяс презентацияяс дырйи). Ме кöсйыси судзöдны документъяс, кöнi бура тыдалö миян земляклöн подвигыс. А ас водзö пуктi мог: сёрнитны республакаса радио да телевидение пыр да гижны газетъясö, медым Коми муын олысьяс унджыкöн да унджык тöдiсны асланыс герой-земляк йылысь.

Но... Быттьö кодкö вомдзалiс миян гортысь и телевизорсö, и провода радиосö. Мöд ногöн кö, ме ни аслам «кок шонтыськöд», ни Латвияысь воöм гöсьтъяскöд (чойкöд да зятькöд), эг вермöй видзöдны-кывзыны колана передачаяссö. Аттьö Александр Григорьевич Пивкинлы, кодi сетiс индöд мекöд передача йылысь гижны «флэшка» вылö, да сетны сiйöс меным, а районса связист-монтёр Николай Уляшов дзоньталiс линиясö, и ассьым Галина Вениаминовна Ведерниковакöд сёрниöс кывзi жö.

Добавить комментарий

Добавлять комментарии могут только зарегистрированные и авторизованные пользователи.

284