Победалöн Знамя - Шойнатыын
Рака тöлысь 11-öд лунö Шойнатыса культура керкаын торжественнöя примитiсны Победалысь Знамя. Чукöртчисны гöсьтъяс да сиктса олысьяс, Шойнаты сиктса веськöдлысь Х.Н. Гевейлер, том йöзлöн сöвет, шöр школаысь кадетъяс, Одыбса том йöз - öд буретш тайö сиктсянь воис миянöдз Победалöн Знамя.
«Ода кора 9-öд лун — миян странаын медся пыдди пуктана лун, повтöмлун да смеллун петкöдлысь войтырö нимöдöм. Тайö лунсö ми огö вунöдöй. Ми бырлытöм могаöсь на водзын, кодъяс козьналiсны миянлы войнатöм шуда олöм... Кытчöдз ми кутам помнитны тайö «гöрд» войнасö , сöветскöй салдатлысь подвигсö - ми кутам овны повтöг, кутас овны миян Чужан му — Россия. Тайö праздникыс коляс миянлы медся яръюгыд да сьöлöмлы шоныд праздникöн», — тадз панiс сёрнисö сиктса веськöдлысь, Х.Н. Гевейлер. Одыбысь кыпыд мероприятие вылö волiсны отставкаын военнöй летчик Алексей Иванович Михайлов да патриотическöй клубысь кык том морт. Найö торжественнö сетiсны Шойнаты сиктса кадетъяслы Победалысь Знамя. Алексей Иванович пасйис, мый Россия — медбур сьöлöма (гуманнöй), ён лола да крепыд армияа Канму став мирас. Тайö тöдчö öнiя кадö , öнiя рытыв канмуяслöн политикын.
Дерт жö, тайö мероприятиесö мичмöдiсны военнöй тема вылö петкöдчöмъяс: кывбур лыддьö , öтка сьыланкывъяс, «Йöлöга» хорлöн петкöдчöм, Шойнатыса кадетъяслöн выступление.
Кыв шутöг, татшöм акцияяс, дерт, колöны öнiя войтырлы, медым найö кужисны лоны бур сьöлöмаöн, ас му дорö муслун пестысьöн. Медым некор эз вунöдны, кутшöм ыджыд донöн лои шедöдöма Победасö.
Добавить комментарий
Добавлять комментарии могут только зарегистрированные и авторизованные пользователи.