Коми войтыр сёрнитiсны сиктлöн талунъя да аскиа лун йылысь

Чукöртчылöм дырйи делегатъяс да конференция уджö пырöдчысьяс сёрнитiсны воддза аддзысьлöмъяс дырйи пуктöм могъяс олöмö пöртöм, сикт-грездъясын тöжд-майшасьöмъяс да водзмöстчöмъяс, бур шедöдöмъяс йылысь. Уна делегат вöзйисны ассьыныс видзöдлас да петан туй артмöм сьöкыдлунысь. Став вöзйöмъяссö лои пыртöма чукöртчылöмлöн балаö.

Тайö пöрйö бара на ёна сёрнитiсны коми кыв да вужвойтырлысь традицияяс видзöм да сöвмöдöм, чорыд веркöса туйяс дзоньталöм-вöчöм, ичöт грездъяс бырöмысь видзöм йылысь. Воысь воö тайö лоö «Коми войтыр» öтмунöмлöн медшöр могöн. Зэв тöдчана, мый удж та кузя мунö, кöть и оз тыр öдöн, но вежсьöм да сöвмöм эм. Кыдзи шуис чукöртчылöмвывса гöсьт, Республикаса Госсöветöн веськöдлысь Надежда Дорофеева, «Коми войтыр» öтмунöм пö вöчö зэв колана, бур удж, и медым пöртсисны наöн пуктöм могъяс, кутам отсавны да öтвылысь уджавны.

Конференция вылын «Коми войтыр» öтмунöмлöн районса юкöнлöн удж йылысь отчёта доклад вöчис юкöнöн веськöдлысь Любовь Кирушева, а районлöн олöм йылысь висьталiс райадминистрацияöн веськöдлысь Василий Гончаренко.

Чукöртчылöм вылö воöм йöзлысь ру кыпöдiсны ЦКД-са сьылан да йöктан котыръяс, том йöктысьяс весиг ыззьöдiсны йöктыны видзöдысьясöс. Ыджыд кытшын ставöн йöктiсны «Ёртасьöмлысь йöктöм».

Коми войтырлöн тайö чукöртчылöм йылысь паськыдджыка гижам газетлöн локтан петасын.