Меню
12+

Газета Корткеросского района - Кöрткерöс районса газет

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!
Выпуск 5 от 05.02.2016 г.

Опонасей снимайтiс кино

Опонасей бара на чукöстлiс Нёбдiнö ярманга вылö войтырöс. Выльысь чужтöм традиция серти нин танi тöв шöр тöлысь помын котыртлöны кöлуйöн да сёян-юанöн вузасян лун. Асылыспöлöс гаж вылö чукртчылöны оз сöмын нёбдiнсаяс, но районысь войтыр, тшöтш Сыктывкарысь и Кировысь, да мукöд муысь.

Асывсяньыс нин сиктса культура керка дорын паськöдчисны вузасьысьяс, вöзйисны яй, солаторъяс, паськöм, картинаяс. Тан жi позис чöсмасьыштны шашлыкöн да пöжасöн, юны самöварысь чай. Клублöн ыджыд залын тшöтш вузасисны йöлöн, маöн, кöйдысöн, ас киöн вöчöмторъясöн.

Гöстьясöс медводз тöдмöдöны Нёбдiн йылысь, Виктор Савинлöн олöм-удж йылысь, Кöрткерöс районса мукöд гижысьяс йылысь сиктса музейын. Танi жi вöлi паськöдöмаöсь «Звезда» газет редакция йылысь выставка, районса петаслы 75 во тырöмкöд йитöдын.

Тавося ярмангасö йитiсны Россияын кинолы сиöм вокöд. Быд воöм гöстьöс гажöдысь скоморохъяс видлiсны массовкаö лöсялöм серти. Ыджыдвидзсаяс гажöдiсны баян улö сьылöмöн да быдöнöс котрöдлiсны лямпаöн. Кодкö юрсö жуглiс коми нöдкывъяс тöдмалöмын. Посни челядь чöсмасисны попкорнöн, катайтчисны кöр доддьын да пониöн. Пыранiнын колiс тöдмавны нималана киноясысь геройяслысь шусьöгъяс.

А лун шöр кадын залын нин заводитчис «Енбиа йöзлöн ярманга». Медводз видзöдысьясöс аслыспöлöс гажöн чолöмалiсны Нёбдiн сиктса юралысь Валерий Савин, Кöрткерöс районса администрацияöн веськöдлысь Александра Барановская, Коми Республикаса культура, туризм да архив удж министр Анастасия Прохудина да национальнöй политика министр Елена Савтенко.

Кыдзи пасйим нин, ставыс вöлi сиöма Россияын кино волы. Опонасей тайö пöрйö снимайтiс кино. Видзöдысьяслы зэв вöлi нимкодь кывзыны нималана киноясысь да мультфильмъясысь сьыланкывъяс. Найö и вöлiны «массовкаын» — кекöначасян удж налöн бура артмис.

Гажöдiсны асьныс нёбдiнсаяс, Кöрткерöсысь сьылысь-йöктысь котыр, ыджыдвидзсаяс да вомынсаяс, петкöдчисны и Шойнатыысь да Пöдтыбокысь котыръяс.

Быд во Опонасей ярманга вылö волö Лидия Логинова, и öнi некымын сьыланкыв сьылiс.

Некымын во дорвыв нин ярманга дырйи нуöдöны лотерея «Опонасей козин». Неыджыд картинасянь микроволновöй пачöдз козинъяс вичмисны медся шудаяслы. А помас Нёбдiн сиктса юралысь В. Савин пасйис сьылысь-йöктысь котыръясöс, тшöтш и вузасьысьясöс, да корис волыны ставнысö мöд вося ярманга вылö.

Добавить комментарий

Добавлять комментарии могут только зарегистрированные и авторизованные пользователи.

208