Туй овмöсын зiльысь

Миян районын туй вöчан да дзоньталан медшöр да ыджыд предприятиеöн лоö «Лöкчимдор» ООО. Сылöн борд улö тшöтш пырöны Важкуръяса да Ыджыдвидзса мастерскöй участокъяс. Бöръяас неважöн и мойвиис миянлы волыны.

Татчöс овмöсöн уна во веськöдлö Василий Кимович Павлов, но миян волiгöн сiйö вöлi буретш отпускын. Но вомъёрт пыр жö и сюри. Зэв радпырысь да варова овмöслöн удж йылысь висьтасис миянлы туйвывса рабочöй Василий Степанович Павлов, кодi зiльö танi дас сайö во нин.

Айловлöн висьталöм серти, татчöс участокын уджалö 12 морт. Налöн дöзьöр улын 64 км Шойнатысянь Одыбöдз туйкост, 14 км Висерсянь Типöсиктöдз туй, а тшöтш и Висервожса став сикт-грездöд мунысь шöр туйяс. Быттьö абу и уна, но уджыс во гöгöр чöж тырмö. Тулыс-арын дорожникъяс тупкалöны чорыд да лыа-из сора веркöсын артмöм гуранъяс, а тöлын — весалöны лымйысь туй да пасъяс. Корсюрö ковмылö петавны и командировкаясö. Со таво гожöм, кыдзи висьталiс Василий, налöн котыр дзоньтасис Сыктывкар — Троицко-Печорск туйкостын да уджалiсны Кöрткерöс дорын кытшола туй вöчанiнын. Öткымын уджъёртыс и öнiöдз на сэнi зiльöны. А со ачыс Василий лöсьöдчö тöвся кад кежлö: дасьтö туйвыв пасъяс.

Дерт, гаж водзын абу окота сёрнитны мытшöдъяс йылысь, но кор найö эмöсь овмöсын, бокитi кытшовтны тшöтш некыдз. Ыджыд тöжд Ыджыдвидзса туй юкöнын уджалысьяслысь кыпöдö важмöм техника.

«Бöръя кадö туй весалан машина-трактор овмöсын оз выльмöдчы. А важ техниканад öтарö пыр повны колö, мед оз дзикöдз киссьы. Та вöсна тöвнад, кор сулалöны ён кöдзыдъяс да оз усь лым, руль сайын уджалысьяс дзоньталöны ас­сьыныс «кöрт вöвъяс». Кыткö мавтыштöны, кыткö зэлöдыштöны. Тьпу-тьпу-тьпу, эз на тай овлы сiдз, мед эг вермöй петны ас кадö весавны лым. Кутам лача, мый и тайö воыс коляс бура, падмöгъястöг», — шуö Василий Павлов.

Со тадзи, уджалысьяслöн бурас эскöмöн, и кутчысьö талун Ыджыдвидзса туй вöчан мастерскöй участок. Тöдöмысь, и «Лöкчимдор» ООО тшöтш.