Мый майшöдлö районса войтырöс

Ыджыдвиддзын

Медшöр тöжд — детсад абутöм. Сиктсаяслöн висьталöм серти, таво ар выль стрöйба ин дасьтiсны: ваялiсны лыа, сувтöдiсны да краситiсны забор. Та вылын удж помасис.

Лёк юан ва — тшöтш майшöдлана тöжд. Шогмытöм ногтуй вöсна весиг школалы быть колö ньöбны вузасянiнъясысь бутылкаö кисьталöм ва.

Нöшта, сикт овмöдчöминлы колö ас транспорт. Сиктсаясöс ёна майшöдлöны и шöйтысь понъяс.

Пöддельнöйын

Колö восьтавны унджык уджаланiн, сэки том йöз кутасны кольччыны сиктö. Сiдзжö тырвыйö котыртны йöзлысь прöст кад — та могысь колö сöвмöдны-выльмöдны клубъяс, культура Керкаяс. Зэв бур лоас кö вöвлöм санаторий пыдди выль. Сiдзжö мед эськö бура дöзьöритасны да видзасны туйяс.

Бöръя кадö сиктын олысьяс дугöдчöны скöт ви­дзöмысь. Тайö буретш сы вöсна, мый тшöктöны лöсьöдны начкысянiнъяс, а öд быд гидын сiйöс он лöсьöд, и ылö (начкысянiнъясö) скöтöс нуны вывтi нин дона сувтö.

Пöдтыбокын

Посёлоклы колö мунан-ветлан транспорт. Кöть нин мед лöсьöдасны районсаöс, либö Кулöмдiнысь мунысь-локтысь автобус пыралiс. Кöсйысьöмаöсь клуб дзоньтавны да сiдзи и абу вöчöмаöсь. Тайöс оз позь кольны бокö, мед кöсйöмсö пöртасны. Посёлокö колö фельдшер: öтчыд вежоннас волö фельд­шер Пöддельнöйысь, но тадзи абу делö.

Веселовкаын

Посёлокын медыджыд мытшöд — тайö юан ва. Вель дыр виччысьöны, кор лоас сöстöм ва. Колонкаясысь петö сiм ва, а юкмöсъяс весавтöмöсь. Нöшта посёлоксаöс майшöдлö керкаяс дзоньталöм: оланiнъяс важмöны, а выльсö оз кыпöдны.

Лöкчимдiнын

Вывтi лёк туйяс посёлокын. Уна важмöм керка-оланiн, кодöс кад нин дзоньтавны. Бара на сiдзи эз дзоньтавны ни школа, ни детсад. Овмöдчöминлы зэв ёна колö транспорт, а то некытчö бокö петавны оз вермыны.

Шойнатыын

Матысмö Ыджыд Вермöмсянь 70 во тырöм, а сиктын абу дасьöсь казтылана пасъяс — öтарыс сикт шöрын, мöдыс — шойна вылын. Уна во сиктса ветеранъяслöн сöветö пырысьяс да велöдчысьяс дöзьöритiсны-пелькöдiсны найöс, а öнi — сы выйöдз важмисны, мый колö выльöс лöсьöдны. Кадыс тэрмöдлö, та вöсна уджъяс колö вöчны регыдъя кадöн.

Ёсь гöрöд и кулöмаöс нуöм-вайöм, и шöйтысь понъяс, и ва (Механизаторъяслöн улича вылын виччысьöны ва колонка сувтöдöм, йöз дасьöсь тыртчыны колонка вылö) кузя. Сиктын олысьяс эля­сьöны и автобус ветлöм вылö: корöны лöсьöдны торъя рейс Шойнатыöдз, öд висервожысь локтысь автобусъяс пыр тырöсь. Та кындзи, сiдзи и вöчтöмöн коли больничаöдз туй, мый кöсйысисны дзоньтавны. Виччысьöны и выль клуб кыпöдöм, больничаын тыр-бура удж котыртöм (весиг анализъяс сдайтны ас больничаын оз позь, колö лэччыны юрсиктö). И кор жö сиктын пуктасны банкомат?! Сылы эм места — шöр вузасянiнын (терминал тай сулалö). Ыджыд сиктлы тайö зэв колана. Сiдзжö колö, медым сиктса уличаяс тыр-бура югзьöдчисны, та могысь сувтöдiсны содтöд сюръяяс.

Зэв бур, мый бура уджалöны культураын уджалысьяс. Налöн водзмöстчöмыс оз лэдз кусны сиктса олöмлы. Молодечьяс, аттьö гажлун вайöмысь!

Маджаын

Кыдзи киссис сиктын видз-му овмöс юкöн, олöмыс быттьö кусны кутiс. Прамöй том йöз удж абутöм вöсна грездысь мунöны овны бокö, а кодъяс колльчöны овны сиктö вывтi ёна дурöны курыд зелляöн.

Да и мукöд тöждыс сиктын тырмымöн: абу сöс­тöм юан ва, абу тырвыйö ладмöдöма автобус ветлöм, тшöкыда оз уджав телепон йитöд да сiдз водзö.

Висерын

Висер ю шуйгала берег вылын сулалö мича, гажа Висер сикт. Зэв пельк керкаяс, ыджыд да кыпыд школа. Стрöитiсны выль садик. Сöмын ог тöдöй, мый дыра уджалас, сы мында вöчтöмторыс сэнi! Висер сиктын олö матö 900 морт, школаö ветлö 150 челядь, быд во чужöны кагаяс, эм уна том йöз. Но... сиктын некытчö петны! Дас сайö во абу клуб. Клубöн шусьö библиотекаын вит на квайт метра пасьта жыр. Клубын уджалысьяс мый вермöны нуöдöны кутшöмкö мероприятияяс. Но верман-ö танi паськöдчöмöн гажöдчыны!? Волöны челядь ворсны, представлениеяс вылö, кутшöмкö лунъясö вежоннас «клуб» рытын воссьылö. Тöрöдчöны татчö и йöктыны-репетируйтчыны верстьö нывбабаяслöн «Ягодки» котыр. А вель окота шойччан рытö пукыштны, дискотека вылын йöктыштны. Водзын клубын рытъяснас вöлi и бильярдöн ворсам, и шашкиöн, и прöста ваксям-сералам. Вöлi сиктын и бар, позис шойччыштны сэнi, но и бар тупкысис. Некодлы уджавны! Ми, сиктсаяс, унаысь нин шыöдчылiм — миян сиктö колö клуб. Збыльысь — Висер сиктö колö клуб!

Кöрткерöсын

Чина войтыр тшöктöны-ышöдöны уджалысь да олö­ма войтырлы прöйдитны диспансеризация. Тайö, дерт, зэв коланатор. Но тöжд кыпöдö сiйö, мыйö уна врач дорö он вермы веськавны ас кадö: чередъяс вывтi ыджыдöсь. Пока сулалан бурдöдысь дорö абутöм висьöмсö кöвъялан. Нöшта на и öткымын врач зэв вежавидзтöмöсь. Районса администрациялы öтвылысь Кöрткерöсса шöр больничаöн юрнуöдыськöд колö бурджыка мöвпыштчыны диспансеризация кузя удж ладмöдöм вылын.

Сiдзжö, бöръя воясö юрсикт ёна кутiс паськавны: содöны выль микрорайонъяс, торйöн нин ёна стрöитчöны том йöз. Но выль оланiнъясö оз быдöн тэрмась овмöдчыны. Мытшöдыс — туйяс абутöм. Со босьтны кöть Светлöй, Овражнöй да мукöд улич: туйясыс дзик шогмытöмöсь.

Кöрткерöсын вывтi уна вузасянiн, но унджыкыс на пиысь вузасьöны шылльö-мылльööн. Бур лоö восьтiсны кö «Зеленецкöй» лэбач фабрикалысь торъя лавка. Та кындзи, юрсиктын абу сутки чöж уджалысь вузасянiн.

Зэв колана, медым детсадö да школаö ветлысь челядьöс новлöдлiс автобус, ылын воöдчыны и больничасянь, и доручастоксянь, сикт помсянь да и мукöд ылыс инъяссянь.

Том йöзöс майшöдлö, мый шойччан лунъяс кын­дзи некöнi коллявны прöст кад, этша котыртöны-нуö­дöны мероприятиеяс, та понда унаöн карö ветлöны.

Кöрткерöсын сьöкыд аддзыны удж. Юрсиктса уджа­лöны карын, а карсаяс — Кöрткерöсын. Мыйла тадзи?! Ас районса йöз, буракö, оз ковны районлы.

Посни челядьлы мед эськö котыртiсны балет студия (3 арöссянь), öд найö эмöсь россияса каръясын и республикаын.

Кöрткерöсса ЦРБ-ын, челядьлöн отделение да мöдöд судтаын кындзи, абу дзолюкъясöс тöбан пызан (пеленальный стол). Бать-мамлы кагасö лоö тöбны пи­дзöсъяс вылын либö корны кодöскö отсöг вылö.

Одыбын

2008-öд воын сиктын тупкысис татчöс лесопункт и матö 300 морт колины уджтöг. Но сiйö восянь да тавося тулысöдз йöзöс уджöн могмöдiсны ас вылö уджа­лысьяс. Сиктса пиысь матö 80 морт тöвся кадö зiлисны ас вöр овмöсъясын. Но таво и тайö йöзыс колины уджтöг. Вöрö вайисны ён да вына техника, та вöсна уджалысь кияс эз ковмыны ас предприятие кутысьяслы. Кыдзи гöгöрвоинныд: сиктын медыджыд тöжд — удж абутöм. И тайö зэв ёсь мытшöдыс ас бöрсяыс кыпöдö уна мукöд майшасьöм. Уджаланiн тырмытöм вöсна сиктса войтыр бытьöн мунöны овны-уджавны сиктысь бокö. Одыбысь уджалан арлыда войтыр — мужичöйяс да нывбабаяс — талун зiльöны вахтаöн Усинскын, Ухтаын, Сыктывкарын да мукöд кар-районын. А сэк косттi налöн челядь быдмöны пöрысь пöль-пöч дорын. А лоö кö кутшöм кö нелючки тыр арлыдтöм ныв-зонкöд, то кодöс кыскасны кывкутöмö да мыждасны тырвыйö дöзьöриттöмысь? Дерт жö, бать-мамöс. Тайö мытшöдсö сиктсаяс кыпöдлiсны районса юралысьяс водзын. Но кыдз тыдовтчис, небыд креслöö пуксьöм чинаясыд оз кöсйыны гöгöрвоны сиктса прöстöй мортлысь тöждтö. Петан туй могысь найö вöзйöны восьтны сиктсалы ассьыныс удж. Но öд медым сiйöс восьтны, колö и сьöм, и бур тöдöмлун уна сикас оланпасын. Олам вöр пöвстын да абу-ö мый кокньыдджык районса веськöдлысьяслы восьтыны танi бур предприятие? Нöшта, кыпöдö тöжд и велöдан да дзоньвидзалун юкöнъясын специалистъяслöн тырмытöм. Сiдз, татчöс бурдöдчанiнын талун унджык уджалысьыс пенсия арлыда войтыр, школаын — джын­йыс жö пенсионер. Том специалистъяс эськö и радöсь локны овны уджавны сиктö, но абу оланiн.

Оз нин öти во одыбсаяс кыпöдны конференция дырйи и нöшта öти майшöдлана юалöм: кор лоас Висер-Одыб костын бур туй?