Ме коми кывсö радейта да тöда

Юлия ПОПОВА, Ыджыдвидз сикт:

- Коми кыв велöдны колö, но сöмын оз мырдöн. Кöсйö кö бура тöдны кывсö, мед пыдiа велöдас — тырвыйö уджтас (программа) серти. А оз кö, то мед велöдчас торъя уджтас серти, кöнi кыдз шуласны, кутас тöдны сöмын коми шыпасъяс, лыдпасъяс, öткымын кывъяс. Ас кадö ми школаын велöдiм коми кыв да нöшта на и коми литература. Чужан кыв, мый вылын ме сёрнита чужöмсянь, эз вöв сьöкыд велöдны.

Мукöд кывъяс пиысь колö велöдны английскöй. Тайö кывйыс öнi быдлаын бергалö, лоис войтыркостсаöн.

Коми кыв колö тöдны. Оз ло лёктор Комиын олысь мукöд кывъя йöз кутасны кö кужны комиöн чолöмасьны, юасьны да вочавидзны.

Оксана ГУДЫРЕВА, Кöрткерöс сикт:

- Кыв тöдöм — морт сайын. Лыддьö кö, мый сылы сiйö колана — велöдас, оз кö — кöть мый вöч — оз велав. Менам батьöй — коми, мамöй — роч (чуж­лiс да быдмылiс Липецк областьын). Мамö воис Комиö 60-öд вояс помын. Сиктса коми йöзкöд öтлаын уджалiгас сiйö регыдöн кутiс гöгöрвоны налысь сёрни, а сэсся и ачыс заводитiс сёрнитны комиöн. Мамö шуö, тэкöд пö тшöтш велöдчи коми кыв вылын сёрнитны, öтлаын велöдiм и коми шыпасъяс, и коми кыв предмет кузя горт­са уджъяс вöчлiм. Босьта пö вöлi роча-коми кыз кывчукöр да сы серти корся колана кыв... Тадзи и велалöма мамö сёрнитны да лыддьысьны комиöн. /нi сылöн сёрниыс дзик коми, сöмын «ö» да «тш» оз артмы шуны, на пыдди шуö «о» да «ч» («öш» пыдди артмö «ош», «тшак» пыдди «чак» да сiдзи водзö). /тчыд мамö вöлi сёрнитö телепон пыр вокыскöд (роч жö) и друг кыла сылöн роч сёрни вежсис коми вылö. Ме чуйми да шуи мамöлы, тэ тай вокыдкöд комиöн сёрнитан, гöгöрвоö али мый? Сэк мамöй вак-вак серöктiс да водзö нин сёрнитiс вокыскöд роч кыв вылын. И войдöр, и öнi мамö тöдчöдö, мый сы выйöн нин велалöма коми кыв дорö, мый комиöн сёрнитны сылы кокниджык.

Эм кö мортлöн кöсйöм — велöдас и мукöд кыв. Миян школаын велöдiсны коми да роч кыв кындзи нöшта на французскöй кыв. И эз тай вöв сьöкыд, велöдчим. Дерт, французскöй кыв велöдiсны эз пыдiа, но мыйтакö да тöдöмлун сетiсны.

Лыддя, кымын уна кыв тöдан — сымын озыр тöдöмлуныд. А чужан кывтö, кыдзи дона рöдвужтö, колö тöдны, пыдди пуктыны да видзны бырöмысь.

Надежда МИШАРИНА, Важкуръя сикт:

- Дерт жö, ассьыным кыв колö тöдны. Кыдзи нö сытöг?! Кöть и школаын эз велöдны коми кыв, а кужа и сёрнитны, и лыддьысьны, и гижны комиöн. Бать-мамöй комиöсь и ме — коми, и челядь-внучкаяс — коми. И некод таысь оз яндысь. Сöмын öтитор майшöдлö, зэв жö нин сьöкыда велалöны выль пыртöм коми кывъясö посни челядь. Весиг ме, верстьö морт, ог гöгöрво мукöд кывъяссö. /нi öд детсадъясын дугдiсны сёрнитны коми кыв вылын, ставныс рочöсь, да и гортаныс челядькöд рочасьöны. Тадзитö и вунö чужан кывйыд.

Ассьыд кывтö колö тöдны. Мукöд (иностраннöй) кыв öд медсясö колö вуджöдысьяслы либö вылыс тшупöда велöдчанiнъясын велöдчысьяслы.

Овмöдчöминын вöдитчан кыв колö тöдны — тайö петкöдлö сэнi олысьяс дорö пыдди пуктöм.

Людмила МИХАЙЛОВА, Сыктывкар:

- Мырдöн мусаöн он ло, но век жö, кыв велöдны колö. Челядь кывйö и асьныс велаласны, а кöдзöдöны сыысь бать-мам. Велöдны либö не велöд­ны коми кыв — бать-мам да семья сайын! Ичöтсяньыс челядьöс велöдiм роч кывйö, кöть верöскöд кыкнаным коми и гортын сёрнитам сöмын комиöн. Челядь сёрнитöны рочöн сы вöсна, мый карса детсадъясын коми кывсö оз велöдны. Челядь мунiсны школаö и заводитiсны велöдны коми кыв, и эз вöв сэтшöмыс, медым шуисны, мый оз кöсйыны велöдны. Овлö норасьöны, мый сьöкыд, но кор за­водитан пинясьны комиöн, öдйö и вочавидзöны. Пукалöны, сiдзи жö, кы­дзи и английскöйысь, велöдöны кывъяс да нимкодьöсь «пятьяслы». Колö-ö велöдны мукöд кывъяс? Колö, мöдтор — оз быдöнлы сетчы (гашкö, быдтасöс кыскö стöч (точнöй) наукаясö, сэк сылы, збыльысь, сьöкыд). Колö-ö тöдны коми кыв? Ме тöда и менам челядь кутасны тöдны. А пö­рысьма да нук-нучкаöс на велöда!

Эдуард ПИМЕНОВ, Кöрткерöс:

- Тшöкыда овлö сiдзи, мый коми челядь бурджыка гижöны рочöн рочьяс дорысь... Тайö öти-кö... Да, гашкö, роч кывсö колö бурджыка велöдны, медым гöгöрвоисны врачлысь юалöмъяс, но и тайö абу падмöг, колö и врачлы кöть мыйтакö тöдны коми кыв. Сiйö öд оз сöмын челядьöс бур­дöд. Эм и олöма йöз, кодъяс оз ставсö, тырвыйö гöгöрвоны... /нi унаöн ве­лöдöны челядьсö сiдзи, мый найö ни­сьö роч, нисьö комиöсь — кыдъя ро­чöсь... Тайö и торкö кывсö, мый весиг кывзыны абу окота... А кага тöдö кö нин кык кыв — чужан коми да роч, то сiйö кык пöв öдйöджык уджöдö юрсö...

Комиын олысьяслы коми кыв тöдöм кузя пасъя со мый: öтчыд öти кöлысь дырйи мекöд орччöн пукалiсны гозъя. Верöсыс, видзöдöм серти, абу ни роч, ни коми. Вöлöмкö, азербайджанец. Чуймöдiс сiйö, мый айлов öтув ставныскöд сьылiс коми сьыланкывъяс да эз лёкджыка мукöдысь. Юалi сылысь, кöнi велалiн коми кывйö? Сiйö вочавидзис, гöтырöй пö коми и меным колö пыдди пуктыны сылысь войтырсикассö и мусö, кöнi ола...

Нöшта пример: эм тöдсаяс, суседъяс, олöма нин йöз, кодъяс ас кадö воöмаöсь овны Комиö, öнi сёрнитöны комиöн и гöгöрвоöны комисö бурджыка кыдъя роч челядь дорысь.

Анастасия ЩЕГОЛЕВА, 11 арöс, Кöрткерöс:

- Коми кыв колö велöдны, сiйö öд Коми Республикалöн кыв. Колö, медым школаын сiйöс велöдiсны, кы­дзи бытьöна велöдан (обязательнöй) предмет.

Мария ШЛЫК, Сыктывкар:

- Коми кыв колö тöдны и колö ве­лöдны, но оз бытьöна предмет моз. Челядь мед асьныс бöръясны — бытьöн велöдасны либö оз пыдiа, факультативнöя.

Татьяна КОЮШЕВА, Кöрткерöс:

- Олан кö Коми Республикаын, то чужан коми кыв колö и тöдны, и велöдны. Школаын велöдчигöн ми ве­лöдiм коми, кыдзи бытьöн предмет, сiдз кö, мед и öнiя велöдчысьяс пыдiа велöдасны ас кыв.