Коми войтыр дасьтысьöны ыджыд чукöртчылöм кежлö

- Нёль во сайын Адзорöм посёлокын коми войтырлöн чукöртчылöм вылын бöрйим 17 морта уджалан представительство. Сэтчö пырисны: Афанасий Габов — зiлис исполкомлöн президиумын, дасьтiс Ыджыдвиддзын Лямпиада, юрнуöдö войтырсикас политика Министерство бердын общественнöй сöветöн, уджалö и спорт Агентстволöн общественнöй сöветын; Михаил Габов — Одыб сиктын кыпöдö-сöвмöдö туризм, юрнуöдö районын коми том йöзлöн «Ми» котырöн; Станислав Коюшев — тöждысьö районын вöр-ва сöстöмлун вöсна, районса «Звезда» газетын лöсьöдö «Ловъя ва» лист бок, быд во юрсиктса челядькöд да общественникъяскöд пелькöдöны Эжва берег пöлöн да туй бокъяс, вöр-валысь мичлун снимайтысь фотограф; Любовь Мишарина — ёнбиа ань, чуйдöдö йöзöс выль вылö да бур вылö, ыджыд пай пуктiс Вермöмлы 70 во пасйöмын; Алексей Ген — президиумын зiльысь, районлысь кып лöсьöдысь, музыкальнöй отсасьысь; Лидия Потапова — сiдзжö президиумын зiльысь, сы дорö позьö шыöдчыны отсöгла кöть лун, кöть вой; Геннадий Попов — киподтуя морт, вылыс тшупöдö лэптiс миян пöч-пöльлысь сюмöдысь вöчасян искусство, 20 во Одыб сиктын юрнуöдö «Ловья ва» челядьлöн фольклор ансамбльöн, гижö сьöлöм вöрзьöдана сьыланкывъяс; Елизавета Макарова — Нёбдiн сиктысь ань, оз пов ни лёк туйысь, ни кöдзыдысь — пыр водзмöстчö, миянкöд гижис коми кыв кузя диктант, сылöн уна гижöд (районын олöм да сиктса йöз йылысь) петö районса газетын. Налы ыджыд аттьö уджысь.

Тайö кадколастöн «Коми войтыр» конференцияяс нуöдiм Пöдтыбокын, Нёбдiнын, Лöкчимдiнын. Чукöртчылöмъяс дырйи, дерт, вöлi уна вöзйöм, на серти дасьтiм резолюцияяс да ыстiм войтырсикас политика Министерствоö. Районын лöсьöдöма «Кöрткерöс» муниципальнöй районса администрациялöн тшöктöм. Эз, дерт, ставыс збыльмы. Но век жö миян корöм серти лои лöсьöдöма Кöрткерöс дорын кытшола туй. Уна во йöз элясисны ыджыд машинаяслöн сикт кузя повзьöдлана ветлöм вылö. А öнiя конференциялöн Вöзъян балаö пыртам юрсиктын москияс лöсьöдны коланлун йылысь. Медым сиктным дзирдалiс, вöлi пелькöдöма, воис биару. Медым юрсикт лоис Ыджыд батьöн районса став сикт-грездлы.

Кольöм вося конференцияöдз миян корöм серти Лöкчимдiнöдз дзоньталiсны посёлокö кежан туй. А таво сiйö некытчö туйтöм нин. Мыйла? Кыдзи нö дзоньталöмаöсь?! Татшöмторыс оз нимкодьмöд котырö пырысьясöс...

Но эм миян районса «Коми войтырлöн» бур шедöдöм — тайö быд во лыжиöн да лямпаöн котралöм — «Лямпиада». Ордйысьны волöны сюрсысь унджык морт. Таво Лямпиада вылö волiсны весиг суйöр сайысь, фин-йöгра уна регионысь. Быд во гажыс паськалö да сöвмö. Лямпаöн котралöм кындзи позис видлыны асьтö вöралан чöс туйын. А изьваса чумын — кöр яя шыд. Та кындзи позис чöсмасьны лязöн. Дерт, отсасьысьястöг öтнанымлöн нинöм оз артмы. Ыджыд аттьö культураса уджалысьяслы да Ыджыдвидз школаса котырлы.

Сiджö миян корöм серти юрсиктын воссис «Коми культура шöрин» и тайö бур: сэтчö волöны и пöрысь, и верстьö, и том, и челядь. Торйöн нин бур, мый волöны челядь да шöрин матын школасянь. Куим во Кöрткерöсын абу, важ ногöн кö, «Пионеръяслöн керка» и челядьлы вöлi некытчö воштысьны. Таво ми шыöдчам районса власть дорö, медым тайö стрöйбалысь мöдöд судтасö сетны Коми культура шöринлы: йöзыс воысь воö содö и колö унджык культурнöй шойччанiн, киподтуяöс велöдан-быдтан места. Тайö лоас зэв бур шедöдöмторöн.

Таво гижим коми диктант. Гижисны бура — сiдзкö коми кыв абу вунöдöмаöсь. Миянкöд тшöтш диктант гижисны и районса администрацияын зiльысьяс.

Паськыда пасйим Вермöмлы 70 во. Ми пырöдчим тайö тшупöда паслы сиöм мероприятиеясö, конкурсъясö, митингъясö, лыддим кывбуръяс, сьылiм. «Коми войтырлöн» республикаса исполком борд улын чужис «Не пропавшие без вести» небöг, кодöс сиöма Великöй Отечественнöй войнаса салдатъяслы, кодъяс официальнöй документъясын лыддьысьöны «юöртöг вошöмаясöн». Öнi унаöн тöдмалiсны кöнi пуктiс юрсö пöль, прапöль, рöдвуж морт. Конференция дырйи тайö небöгсö сетам шöр библиотекалы. Бöръя 8 воöн конференциялöн шöр темаöн кыкысь вöлi экология. Та кузя колö уна на вöчны. Нёль во чöж ми пырöдчим да зiлим вöр-ва видзан сöветын. Быд во мунö «Медся мича сикт-посёлок» конкурс. Дерт, вöр-ва, сынöд да сикт пелькöдöм кузя удж мунö. Но колö вöчны нöшта на уна. Тырим пластикöн. Колö сувтöдны автоматъяс да куш дозъяс примитанiнъяс. Таво öти буртор артмис — Адзорöмын заводитiсны примитны макулатура, пластик да кöрт дозъяс. Абу на быд сиктлöн урчитöма официальнöй лöп гуалан инъяс. Сы понда йöз шыблалöны ёгсö матысса вöрö, мыйöн урсалöны вöр-ва. Воысь воö косьмö Эжва ю, чинö лыдыс черилöн да вöрса пöткалöн. Эжва юнымöс колö весавны, а сiдзкö республикалы колö вичмöдны та вылö сьöм.

Уджалiм районса администрация бердын леснöй сöветын, районса общественнöй сöветын, национальнöй проектъяс, демография, социальнöй да войтырсикас политика кузя сöветын. Öтвылысь зiлим Республикаса Юралысьлöн йöзöс примитанiнкöд. Конференция водзын Республикаса Юралысьлöн йöзöс примитанiнкöд ми нуöдiм веськыд телепон сёрни: «Мый колö вöчны, медым бурмöдны сиктын олöм».

Унаысь аддзысьлiм «Монди» СЛПК-кöд. Кывзiм налысь вöрöн вöдитчöм йылысь отчёт, кыдзи пöртсьö олöмö социально-экономическöй ёртасьöм йылысь сёрнитчöм. Ветлiм накöд Адзорöм посёлокö, Кöрткерöсö да Керöсö, кöнi мунiсны общественникъяскöд аддзысьлöмъяс. Öтлаын уджалiм «Серебрянная тайга» вöр-ва видзöм кузя чукöртчылöмъясын. Зiлим районын туризм удж öтувтысь сöветын.

Волiм и районса администрациялöн коллегия вылö. Öтвылысь дасьтысям коми войтырлöн чукöртчöм кежлö.

Представительстволöн чукöртчылöмъяс дырйи видлалiм Республикаса Юралысьлысь Уджтас. Кывзiм районса администрацияöн веськöдлысьлысь отчёт, кыдзи пöртсьöны олöмö коми войтыр¬лöн вöзйöмъясыс. Миян заседаниеяс вылö корлiм Республикаса Юралысьлöн йöзöс примитанiнысь специалистъясöс, культура да войтырсикас политика кузя веськöдлан юкöнын уджалысьясöс, физкультура, спорт да туризм юкöнöн веськöдлысьясöс да Коми культура шöринын зiльысьясöс.

Мый жö миянöс нöшта майшöдлö? Сиктъясын абу удж. Унаöн зимöгöритöны чужанiнысь бокын. Том йöз юсьöны. Сiдзкö, колö удж. А мед сиктö воисны том специалистъяс — колö кыпöдны патераяс и не сöмын... Колö, медым быдлаö воис интернет, вöлi парикмахерскöй, мичлун салон, бассейн, шейпинг клуб да сiдзи водзö.

Уна сёрни мунö сиктса администрацияяс öтлаалöм йылысь. Быттьö тайö сетас позянлун чинтыны рöскодъяс. А оз-ö район вошты НДФЛ? Ичöт сиктлöн корöмъясыс оз вошны ыдждöдчöмöн? Сиктын олысьяслы нинöм бурсö эз вай сiдз шусяна «оптимизация школ и медицинских учреждений».

Бöръя нёль воöн районса олысьяс медъёна элясьöны вывтi лёк туйяс Троицко-Печорск — Сыктывкар, Кöрткерöс — Намск трасса вылын. Йöз шуöны: «Ловйöн гортöдз воам али ог?». Полöны лэдзны туйö челядьöс районса да республикаса мероприятиеяс вылö. Таво районса олысьяс ёна элясьöны и автобусъяслöн лёка ветлöм вылö. Но неважöн тайö нелючкисö бырöдiсны.

Тавося конференция дырйи, кыдзи водзтi, сикт-грездса делегатъяс висьталасны-кыпöдасны ассьыныс юалöмъяс, юксясны и петан туйясöн. Став сёрнисö лоö пыртöма резолюцияö, мый и лоас водзö кежлö урчитöм уджöн.