Быдöн содтö олан мич
Пекнича рыт юрсиктса «Союз» кинотеатрлöн сцена вылын бара вöлi кыпыд да гажа. Ыджыд концертöн танi петкöдчис Одыб сиктысь ныв-зон да Геннадий Иванович Попов. Концертсö сиöма «Ловъя ва» челядьлöн фольклор ансамбльлы 20 во тырöмлы, кодöс котыртысьнас и лоö Г. Попов.
Тайö киподтуя да енбиа морт йывсьыс уна нин лои гижöма, и сылысь ним тöдöны финн-йöгра быд регионын, суйöр сайын. Сетöма тай Енмыс Геннадий Ивановичлы сямлунсö, мывкыдлунсö, кужöмлунсö... И кывбуртö гижö, пуысь-сюмöдысь вöчасьö, гудöкöн ворсö, ныв-зонкöд уджалö...
Геннадий Иванович чужис Ыджыдвидз сельсöветувса Джиян грездын крестьянинлöн семьяын. Уджалан туйвизьсö медводз йитiс видз-му овмöскöд, уджалiс Одыбса ГПХ-ын механикöн. Но сiйöс пыр öтарö кыскис челядь дорö. Айловлöн вöлi ыджыд кöсйöм — сетны быд¬мысь войтырлы шылад йылысь ыджыд тöдöмлун, пестыны на сьöлöмъясын ас коми сьыланкывъяс дорö муслун. Ассьыс мöвп Геннадий Иванович пöртiс олöмö — вöльгым 1995-öд воö сiйö котыртiс «Ловъя ва» ансамбль, кöнi медшöр сьылысьяснас лоины Одыбса детсадйысь да школаысь ныв-зон.
Ансамбльлöн нимыс нин висьталö, мый тайö визувтысь валöн шы. И збыль, налöн репертуарысь мыла сьыланкывъяс, кодъясöс тэчöма Геннадий Поповöн жö гижöм кывбуръясысь да лöсьöдöм шыладысь, топыда йитчöмаöсь коми фольклоркöд, миян вöр-вакöд, найö мелiöсь да шаньöсь, сьöлöмö йиджтысянаöсь. Нöшта, быд торъя сьыланкыв сьылöны гудöк да пуысь вöчöм мукöд музыкальнöй ворсантор улö, кодъясöс бара жö вöчалö ачыс Геннадий Иванович. И мый медтöдчанаыс — тайö сьыланкывъясыс ловъяöсь, ныв-зон найöс сьылöны асьныс, а оз фонограмма улö.
Дерт, газет пыр тайö сьыланкывъяслысь збыль мичлун он вермы стöча петкöдлыны. Найöс колö кывзыны. Буретш та вöсна и тавося тшупöда пас «Ловъя ва» ансамбль кутас пасйыны юрсиктын, медым налöн творчествоöн вермис тöдмасьны унджык коми культура радейтысь да пыдди пуктысь.
Добавить комментарий
Добавлять комментарии могут только зарегистрированные и авторизованные пользователи.