Нимöдiсны пыдди пуктана ветеранъясöс

Ми тöдам, мый уна йöзöс наградитöма «20 лет Победы над фашистской Германией в Великой Отечественной войне 1941-1945 гг.» медальöн. Вичмисны Победалы 30, 40, 50 и 60 вояслы сиöм медальяс. И уналы, кодi матыстiсны Ыджыд Вермöмсö, дзик на неважöн сеталiсны Победалы 70 во тырöмсянь медальяс. Кыдзи танi он казьтышт Республикаса Юралысь В.М. Гайзерöс, кодi кык вежон сайын волiс миян районö да сетiс медальяс войнаса ветеран Василий Степанович Потаповлы да война кадö тылын зiльысь Галина Сергеевна Романовалы да мукöд аньяслы (видзöд кос му (апрель) 10 лунö петöм «Звезда» газетысь). И зэв бур, мый тайö праздник кежлас дасьтысьöмö ыджыд пай пуктö Коми культура районса шöрин (директорыс Галина Николаевна Шишкина, художественнöй юрнуöдысьыс Валентина Михайловна Путинцева) да сикт овмöдчöминса администрация. Медводдза медальяс лои сетöма юрсиктын олысь войтырлы  тавося кос му 10 лунö  Кöрткерöсса шöр школаын.

И со вежон кольöм бöрын культура шöринын бара чукöртчисны олöма нин войтыр, кодъяс ас кадö пуктiсны эз этша вын да дзоньвидзалун немецкöй фашистъясöс пасьвартöмö.

Шöринлöн ыджыд залын юргисны война кадся да Победалы сиöм сьыланкывъяс да маршъяс. Асланыс петкöдчöмöн гöсьтъясöс гажöдiсны шöринса «Эскöм» ансамбль да сьылысь Афанасий Удоратин. Петкöдлiсны документальнöй кино, кодöс дасьтылöмаöсь Победалöн 60 во кежлö. Содта, мый тавося тшупöда пас кежлö дасьтöны жö кинолента. Ветеранъяс пукалiсны сёян-юанöн тыр пызан сайын, Победа вöсна кыпöдлiсны «боевöй» сё грамм.

Заводитчис медальяс сеталöм. Наградаяс да на дорö эскöданпасъяс кыпыда сетiсны Кöрткерöс сикт овмöдчöмин администрацияöн юралысь Евгений Мамонтов,  ветеранъяслöн райсöветöн юрнуöдысь Николай Казаков да  районса военкоматöн веськöдлысь Константин Пластинин. А неуна водзджык военнöй формаö пасьтасьöм велöдчысьяс пыртiсны залö Победалысь Знамя копия да сулалiсны сы дорын почётнöй караулын. Наградитöмаöс чолöмалiсны казьтыштлöм нин Е.Г. Мамонтов, Н.М. Казаков да А.С. Кулаков. На пиысь бöръяыс лыддис ветеранъяслы сиöм ассьыс кывбур.

Медальяс сеталöм да чолöмалöмъяс бöрын вöлi позянлун сёрнитны и наградитöмаяслы. Медводдзаяс лыдын сёрнитiс районын паськыда тöдса доктор Габов. Сылöн батьыс мöдöдлöма гортас  война вывсянь гоз-мöд снимок да письмö. Валерьян Александрович, вöлöмкö, оз тöд, мый письмöяс фронт вылысь позьö вöлöм ыстыны сöмын роч кыв вылын. Сiйö лöсьöдöма торъя альбом, кытчö и меститöма татшöм письмöяссö да снимокъяссö. Сiйö шуö, мый татшöм ногöн бурджыка позьö воспитайтны посни челядь пöвстын патриотизм, комиöн кö, чужан му дорö муслун.

Но меным аслым вöлi вывтi нин интереснöйöн Фаина Михайловна Масловалöн война кад да сiйö кусöм бöрся некымын во йылысь казьтылöмыс. Сiйö велöдчылöма Паль сиктса школаын. Шойччан лунö, öнiя ногöн кö, вöскресенньöö, эз велöдны, но сы пыдди тайö лунö колö вöлi весиг челядьлы пöрöдны вöр: öд фронтыдлы и вöр прöдукцияыд колö вöлi, и эз этша. «Паськöм вöлi омöлик, ёна и сюрлiс кынмыны», — казьтылiс Фаина Михайловна. А менам син водзö сувтiс татшöм серпас: вöла додь дорö бöрсяньыс домалöма нöшта öти додь, сöмын неуна ичöтджык, и тайö додьяс вылас колö вöлi лэптыны 6 метр кузьта керъяс. А кыдзи тайöс вöчны? Со кор Фаина Михайловна тöдмасьöма Архимедлöн рычагöн, а веськыда кö шуны комиöн, зоркöд, мый отсöгöн челядь и сöвтлiсны керъяссö. Мыйла тайöс казьтыла? Да делöыс сыын, мый меным аслым мойвилiс тадзи уджавныссö, и öнiöдз  6 метр кузьта керйыдлысь верма висьтавны кубатурасö, оз ков некутшöм таблица, ни калькулятор.

Унатор помнита аслам олöмысь куим арöссянь. Помнита нянь вылö карточнöй система да сiйöс бырöдöм, сiйö жö рудзöг нянь вылö лавкаын ыджыд öчередьяссö, тшыг нисьö пöт олöмсö, омöлик паськöм новлöмсö да сiдзи водзö. А öд кыдзи казьтыштiс Анатолий Антонович Смилингис, война бöрся кутшöмсюрö воясö овнысö йöзыслы вöлi весиг сьöкыдджык война кадö олöмысь. Аслам чолöмалан сёрниын быть казьтыштi, мый ми унатор ог тöдöй война да воюйтысьяс йылысь, но зэв любö вöлi висьтавны, мый коми войтыр война дырйи ассьыныс чужан мусö эз янöдны. И кыдзи танi он казьтышт Сöветскöй Союзса Герой Антон Антонович Шевелёвöс, Слава ордена тыр кавалер Василий Андреевич Забоевöс, медводдза сöветскöй генералъяс, ог нин шу коми йöз пиысь Георгий Николаевич Микушевöс (мед кöть сiйö и чужлiс Кунгур карын, турокöн эз ло — öд и батьыс, и мамыс вöлiны Коми муын чужлöм йöз), Боевöй Гöрд Знамя орденöн нёльысь (!) пасйöм Николай Семёнович Нестеровöс, кодi чужлiс да быдмис Кöрткерöсын, а пöгибнитiс Орловск-Курскöй битва дырйи, Пезмöг сиктын чужлöм полковник Степан Ильич Турьевöс, Ярославскöй коммунистическöй дивизияса командирöс да уна мукöдöс, кодъяс йылысь ми пöшти нинöм ог тöдöй.

Списокын пасйöм йöз пиысь эз став ветераныс вермыны локны тайö гажлун вылас. Помкаыс пыдди пуктана — омöль дзоньвидзалун. Но синмö шыбитчис, мый культура шöринö эз волыны районса администрацияын джуджыд да небыд креслöын пукалысь чина войтыр.

Öти морт, кодi, кыдзи тай шулöны коми йöз, уртöм пуад некор оз увт, дзик веськыда шуис, мый Ыджыд Вермöм праздник кутiс лоны (танi быть лоö рочыштны) öчереднöй мероприятиеöн. Тайö шуöмторйыс оз сутш юрсиктса администрациялы да Коми культуралöн районса шöринлы. Найö бура котыртiсны да нуöдiсны тайö кыпыд мероприятиесö. Ме тайö мортыскöд воа öти кывйö — öд подувыс татшöмторыслы эм, а тайö зэв лёк. Абу-ö кад бурджыка мöвпыштны та йылысь?

Пыдди пуктана ветеранъясöс чолöмала матысмысь Победа лунöн. Сиа тыр-бур олöм, крепыд дзоньвидзалун, шудлун да матыссаяссянь тöждлун да пыдди пуктöм.