Меню
16+

Газета Корткеросского района - Кöрткерöс районса газет

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!
Выпуск 24 от 19.06.2015 г.

Тöдны, медым эз вун

Автор: Оксана ГУДЫРЕВА.

Кöрткерöсысь Сергей Изъюров да Константин Кирушев неважöн воисны Аймуса Ыджыд тышын Вермöмсянь 70 во тырöмлы сиöм «Подвиг и победа великого народа» ним улын войтыркостса научно-практическöй конференция вылысь. Сiйö мунiс Белгородскöй обласьтын, «Прохоровское поле» государственнöй военно-историческöй музей-заповедникын.

Кöрткерöсса делегация форум дырйи тöдмöдiс чукöртчöмаöс Николай Семёнович Нестеров йылысь «Комбат из Корткероса» документальнöй öктöдöн (сборникöн).

Лыддьысьысьяслы тöд вылö юöртам, мый öктöд лöсьöдöмö да лэдзöмö, корсьысян-туялан уджö ыджыд пай пуктiсны Кöрткерöсса шöр библиотекаын уджалысьяс Рита Мингелайте да Светлана Кутькина, а сiдзжö Н.С. Нестеровлöн рöдвуж да КРАГСИУ-са ректор Нина Нестерова. Небöгö пыртöма уна документальнöй материал, казьтылöмъяс, коми салдат, гвардияса майор Николай Нестеровлöн подвиг йылысь гижöдъяс. Торъя юкöнын йöзöдöма Нестеровлысь мамыслы, Мария Ивановналы, радейтана ныв Прасковья Корнеевалы (Тамбов обласьтса Горелое сиктысь) сьöлöм вöрзьöдана письмöяс. Комбатлысь олöм туялысь Рита Мингелайтелы мойвиис тöдмасьны (письмöяс пыр) Корнеевалöн рöдвужкöд, внучкаыскöд. Уна материал аслас пöч, сылöн войнадырся радейтана зон Коля Нестеров йылысь ыстiс корсьысьысьяслы бабöн шуысьыс. Ыджыд корсьысян уджлöн кывкöртöдöн и лоис öктöд лэдзöм. Тайö небöгыс лоö Айму повтöм дорйысь, чужан мусö радейтысь Николай Семёнович Нестеровлöн югыд паметьлы сиöм Казьтылан Небöгöн.

Рита Мингелайтелöн висьталöм серти, конференция вылö ветлöм — тайö «Тöдны, медым помнитны...» (Знать, чтобы помнить...) балалöн бöръя тшупöд. Прохоровкаса музей-заповедниккöд письмöасигöн корисны пырöдчыны конференция уджö. «Библиотекаысь кодöскö ыстыны вöлi сьöкыд, — шуö Р. Мингелайте. — Ылi туйö мöдöдчисны сикт овмöдчöминса депутат, ветеранъяслöн сöветö пырысь Сергей Изъюров да Н.С. Нестеровлöн воча пи (двоюродный племянник) Константин Кирушев. Найö вöчисны Николай Нестеров йылысь доклад».

Сергей Изъюров петкöдлöма «Комбат из Корткероса» выль небöг, висьталöма миян земляк йылысь, сылöн тышъяс пыр мунöмсö да корсьысян удж нуöдöмсö. Сэсся ветлöмаöсь «Прохоровское поле» музей-заповедникö,  танкъяслöн ывлавывса музейö да Николай Рыжков нима библиотекаö. Аддзылöмаöсь выль танкодром стрöитöм. Волöмаöсь и Прохоровкасянь матö 20 километра ылнаын Беленихино сиктса öтувъя шойна вылö — сэнi дзебöма Николай Семёнович Нестеровöс. Сэтысь босьтöмаöсь китыр му. Тайö вежа мусö сэсся нуöмаöсь геройлöн мам гу вылö.

Прохоровкаö ветлысьяс лыддьöны, мый найö пуктiсны ыджыд пай миян земляк Николай Нестеровöс нэм кежлö нимöдöмö, военно-патриотическöй мывкыдсьöдöмö. Прохоровкаын пö ставсö бура котыртöмаöсь, лöсьыд-мича, сэтчö кö эськö миян челядьöс нулыны...

*Николай Семёнович Нестеров чужлiс 1918 воын Кöрткерöсын. Армияö босьтöмаöсь 1939 вося кöч (сентябрь) тöлысьын. Гвардияса майор, мöдöд гвардейскöй Тацинскöй танкöвöй корпусса комбат. Курск косьын тышкасьлöм салдат. Усис косьын 1943 вося сора (июль) 14 лунö. Наградитöма Гöрд Знамя куим орденöн, Гöрд Звезда орденöн да Отечественнöй война 1 степеня орденöн.

Добавить комментарий

Добавлять комментарии могут только зарегистрированные и авторизованные пользователи.

158