Меню
16+

Газета Корткеросского района - Кöрткерöс районса газет

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!
Выпуск 29 от 24.07.2015 г.

Чужан сиктöй - олан гажöй

Тайö кывъясыс миян сиктса тöдчана велöдысь да поэт Зоя Васильевна Шиликовалöн, кодi пестiс ыджыд муслун чужанiн, сэтчöс олысь йöз да муса кыв дiнö. Уна поэт-гижысь нимöдiсны ассьыныс ичöтик рöдинасö мича кывъясöн, петкöдлiсны ыджыд пыдди пуктöм сiйö ин дiнас, кöнi чужисны да кытысь босьтiсны став мичасö, коланасö да мöрччанасö.

Ме чужи да ола ыджыд коми сиктын. 362 во нин пасйис менам чужанiнöй. Шойнаты. Нимыс быт­тьö­кö и шуштöм. Но талы эм помка. Бергöдчывны кö важ историяö, позьö казявны, мый миян сикт вылö тшöкыда усьласьлывлöмаöсь вогулъяс, кодъяслöн вöлöма öти мог — асавны миянлысь муяс. И öти та­тшöм ыджыд­сьыс-ыджыд тыш бöрын унаöн кувсьöмаöсь. Шойяссö шыблав­лöмаöсь ыджыд тыö. А ты­ыс öнiя Шойнатылöн мöд­ла­пöлас, дзоньнас вев­тьысьлöма шойяссöн. Медводз тыыс босьтiс Шойнаты ним, а сэсся, надзö­ни­кöн, и сикт вылас вуджис. Сикт­лöн мöд нимыс — Сторожевск, тшöтш йитчöма тайö легендаыскöд. Öд мед видзчысьны вöрöгъясысь, колö сувтöдавны стöрö­жöвöй башняяс. На отсö­гöн водзвыв позяс тöдмавны, кысянь локтö враг и мый сысянь виччысьны. Но тайö легенда.

Öнiя Шойнаты — ыджыд сикт: перепись серти кö, олö 2500 унджык йöз. Эмöсь сиктын тöдчанаинъяс: культура керка, школа, детсад, челядьлы содтöд тöдöм­лун сетан шö­рин, совхоз, лесхоз, больни­ча, ыджыд кусöдчанiн юкöн, государст­веннöй да частнöй вузасянiнъяс, столовöй-бар, пошта, быт керка, библиотека, «Майбыр» туристическöй да спорт шö­ринъяс. Медшöр тöдчанаiнöн ме эськö лыддя культура керка. Тайö гöрд кирпичысь куим судтаа керка, кодöс стрöитлöмаöсь революцияöдз на вичко пыдди. Но помöдз эз удитны вайöдны: ып­ни­тiс революция. Выльöн кыпöдöм «вичко» кисьтны некод эз кут, а лöсьö­дiсны татчö Культура керка да библиотека. Миян сиктын позьö гöрдитчыны зэв мича вы­льöн кыпöдöм бур школаöн, кöнi велöд­чö 260 гöгöр морт. Школа лоö республика пасьтала медбуръяс пиысь öтиöн. А больничаным миян кутö районнöй статус. Танi бурдöдчöны ас сиктса кын­дзи и матiгöгöрса сиктъясысь висьысьяс.

Но медся торъялана да тöдчанаторнас, дерт жö, лоöны сиктса йöз, кодъяс асланыс уджнас, олöмнас нимöдiсны чужа­нiннымöс. Тайö Сергей Лукич Куликов — учитель-фронтовик, зэв уна во дирек­торавлiс школаын. Сiйö жö лоö челядьлы гижысьöн, фрон­тöвöй сьыланкывъяс коми вылö вуджöдысьöн.

Зоя Васильевна Шиликова — Россияса нимöдана ве­лö­дысь, мича кывбур тэ­чысь. Сылöн гижöдъяс вы­лö тэчöма абу öти сьыланкыв.

Да, дерт жö, оз позь коль­ны видзöдлас­тöг сикт­са ныв-зонмöс, верстьö уджа­лысь­ясöс да пöль-пöчöс. Натöг öд некутшöм сикт эськö эз вöв. Öтияс велöдчöны, босьтöны медводдза тöдöмлун-шуд. Мöдъяс уджа­лöны, нянь-сов вылö да кöм-паськöм вылö нажöвитöны ур. Коймöдъяс пенсия вылын нин да видзöны внук-внучканысö — уджалысьяслысь челядьнысö.

Чужан сикткöд ме крепыд йитöдын бöрья во. Школа помалöм бöрын, дерт, ковмас мунны велöдчыны водзö. Быдлунъя олöмын Шойнатыöй оз нин ло мекöд. Но ме эска, кöн кöть эг вöв, мый кöть эг вöч, чужан сиктöй век лоö матыссаöн, коланаöн да сьöлöм шонтысьöн.

Добавить комментарий

Добавлять комментарии могут только зарегистрированные и авторизованные пользователи.

191