Меню
16+

Газета Корткеросского района - Кöрткерöс районса газет

Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!
Выпуск 32 от 14.08.2015 г.

Гижан уджö ылалöм Морт

Автор: Оксана ГУДЫРЕВА.

Кольöм четвергö, моз 6 лунö, Кöрткерöсса М.Н. Лебедев нима шöр библиотекаын матö кык час чöж кылiс гора серам шы. Сэнi мунiс збыльысь гаж, мый пестiс миян нималана земляк, республикаса народнöй гижысь, «Би кинь» журналса шöр редактор Алексей Вячеславович Попов. 

Гöсьтъяс тöкöтьö удитлiсны лолыштны да вом доръясныссö топöдлыны, кыдзи бара на вак-вакöн гораа сера­лiсны. Мый сяма гаж нö котыртлiс­ны? Тайö вöлi «Олöм олысьяс» ним улын творческöй аддзысьлöм, кодöс библиотекаса уджалысьяс сиисны Алексей Вячеславовичлы неважöн, сора (июль) 25 лунö, 65 во тырöмлы. Лыддьысян ыдж­ыд жыр тырлiс воöм гöсьтъясöн. Енбиа гижыськöд аддзысьлыны да сiйöс чолöмавны-нимöдны локтiсны и матысса рöдвужыс, и вöвлöм уджъ­ёртъ­ясыс, нöшта и чина войтыр, и чужанiнсьыс, Ыджыдвиддзысь, быдса делегация да гижöдъяссö вылö донъя­лысьяс, поклонникъяс.

Медводз Алексей Вячеславовичöс чолöмалiсны районса администрацияöн веськöдлысьöс вежысь Людмила Данилова да войтырсикас политика юкöнысь специалист Татьяна Деменко. Найö райадминистрацияöн веськöдлысь да ас нимсянь сиисны юбилярлы выль творческöй вынъяс да водзö на нимкодь­мöдны выль гижöдъясöн. Сэсся ад­дзысьлöм мунiгчöж кыв босьтлiсны вель унаöн. И быдöн висьталiсны сы мында бур кыв А. Попов йылысь, кодi аслас ыджыд да тöдчана творческöй уджнас тайöс заслужитiс. Сьöлöм вылö воисны гижысьлöн вöвлöм уджъёрт, öнi — мортлöн инöдъяс дорйысь республикаса уполномоченнöй Надежда Быковскаялöн кывъясыс: сiйö чолöмалiгас тöдчöдiс, мый «Алексей Вячеславович — миян коми классик и лоö дзик öти коми драматургöн». Сiйö пö збыльысь уджач гижысь, перö увсьыс петö гижöд бöрся гижöд. Надежда Николаевна сиис та вылын не сувтны, а гижны, гижны, гижны. Аслыспöлöса радей­тана воксö чолöмалiс районын да республикаын нималан Василий Вячеславович Попов (Кино Вась). Казьтылiс челядьдырся олöмныссö, мый шмонь сорöн висьталöм сертиыс позьö мöв­пышт­ны — гажаа жö и олöмаöсь! Дерт, сiйö öнi шмоньöн кажитчö, а сэки дзик «сурьёзнö» вöлi. Вокъяслöн аддзысьлöм эз коль Васьлöн сьылöмтöг: гудöкöн вор­сöм улö сьылiс важ коми сьыланкывъяс. А моньыс, Анна Александровна, козьналiс дона мортлы ичöтик пакет тыр кампет, сы ыджданикас тöрöма 65 посни кампет. Сетiгас юалiс: «Радейтан-ö кампет сёйны?». Та вылö Алексей Вячеславович вочавидзис: «Сэтшöма радейта, мый весиг войнас чеччыла да сёя».

Гажöдiсны енбиа землякöс и ас сиктса йöз. Быдса концерт дасьтöмаöсь. Мед­водз чолöмалiс «Ыджыдвидз» сикт овмöдчöминöн юралысь Николай Симпелев. Сiйö козьналiс чужан сикт йылысь лöсьöдöм альбом (материалсö чукöртöма библиотекаын уджалысь Роза Панюкова). Сэсся гудöк улö сьылiсны Ыджыдвидзса «колипкайяс», нывбабаяслöн трио. Сиктса артистъяс, на лыдын и Кино Вась, петкöдлiсны неыджыд теш, кодöс гижлöма Öльöш Попов. Видзöдысьяс сералiсны пöттöдз. Школаын коми кыв да литература велöдысь Ольга Ивановна Мишарина висьталiс Алексей Попов гижöдъяслöн ыджыд тöдчанлун йылысь. Гижысь пö бура пет­кöдлö öнiя олöмлысь серъяс, геройяссö позьö öткодявны орччöн олысьяскöд, а то и аскöд. Висьталiс и сiйö, мый мамыс, Агния Васильевна Габова, велöдлöма Алексей Вячеславовичöс, пестöма чужан кыв дорö муслун.

Став чолöмалысьсö ог кут лыддьöдлыны, но пасъя, мый быдöн эз жалит бур да шоныд кывъяс пыдди пуктана мортлы. Таысь, дерт, сылы вöлi зэв нимкодь, кыпавлiс лов югыдыс.

Аддзысьлöм дырйи Кöрткерöсса ЦБС-ысь директор Светлана Челпанова тöдмöдiс электрона öктöдöн (сборник) — республикаын медводдза Литература картаöн, кодöс дасьтiсны Кöрткерöс районлы 75 во да гижысьяслöн республикаса Котырлы 80 во тырöм кежлö. Сэтчö пыртöма и Алексей Вячеславович Попов йылысь юöр да драматурглöн öткымын гижöдъяс.

Мероприятие дырйи нуöдiсны и викторинаяс, и ворсöмъяс. Гижысьлы сеталiсны уна юалöм. Медся интереснöй юалöм («Кор тi дорö волö муза?») сетiс юрсиктысь Елена Казакова. Сылы юбиляр козьналiс «Войвыв кодзув» жур­нал, кытчö пуктiс ассьыс кырымпас. Аддзысь­лöм помын быд окотитысь вермис ньöбны Алексей Поповлысь небöгъяс да ас кежаныс варовитыштны ыджыд енбиа морткöд.

Алексей Вячеславовичлöн тшупöда пас пасйöмыс та вылын эз на помась. Чужан лунсяньыс сiйöс пыр на чолöмалöны, котыртлöны-нуöдöны сылы сиöм мероприятиеяс. И водзö на пö лоасны. Сiдз, кöч (сентябрь) 23-27 лунъясö юркарын, Республикаса шылада да драма театрын мунас сылöн пьесаяс серти пуктöм спектакльяслöн «Кыпыд гажыд ловтö шонтö» фестиваль. Сэтчö кöсйöны локны и ылі Францияысь артистъяс. Найö петкöдласны видзöдысьяслы коми драматурглысь француз кыв вылын уджъяс.

Пыдди пуктана Алексей Вячеславовичöс чолöмалам тшупöда пасöн, 65 во тырöмöн! Шуöны, мый 65 — тайö зэв ыдж­ыд арлыд нин, но тайö сöрöм. Айловлы 65 — абу и уна, та мында арлыдöн сiйö лоö ыджыд мывкыдаöн, сюсьöн. И тайö сiдзи и эм. Сиам ыджыд мывкыда мортлы крепыд дзоньвидзалун, вын-эбöс, шудлунöн да радлунöн тыр лунъяс, творческöй шедöдöмъяс.

* Алексей Вячеславович Попов — коми гижысь, прозаик, драматург, Россияса журналист да гижысь котыръясö пырысь, Россияса культураын да Коми Республикаын нимöдана уджалысь, Коми Республикаса нимйöза гижысь. Чужис 1950 вося сора 25 лунö Коми АССР-ын Кöрткерöс районса Ыджыдвидз сиктын. Шойнатыса шöр школа помалöм бöрын уджаліс «Вишерскöй» совхозын. Служитіс Советскöй армияын.

1980 воын помаліс Сыктывкарса канму университетысь история факультет (уджысь орöдчытöг). Сэсся уджаліс журналистикаын (зiльлiс и «Звезда» газетын литсотрудникöн). Уна во веськöдлö челядьлы лöсьöдöм «Би кинь» журналын.

Медводдза висьтсö йöзöдöма 1971 воын, «Войвыв кодзув» журналса нёльöд номерын. Гижöдъяссö йöзöдöма республикаса уна журналын да öтувъя чукöръясын. 1991 воын сылöн петіс медводдза «Олöм олысьяс» небöг, кытчö пыртöма висьтъяс да повесьтъяс.

1990-öд воясö гижысь шыöдчис драматургияö. Сылöн «Мыйсяма йöз», «Ойя да ойя», «Сур лагун», «Йиркап», «Гöтрась, пиö, гöтрась», «Чудь мыльк» да мукöд пьесаяс серти спектакльяс мунöны В.А. Савин нима драма театрын, Коми республикаса вужвойтырлöн шылада-драма театрын да Россияса мукöд театрын. Став драмаа гижöдъяссö йöзö­дöма «Мывкыд парма» небöгын, кытчö пыртöма 23 пьеса, на лыдын нёльыс — челядьлы спектакльяс вылö.

Сылысь художествоа гижöдъяссö ву­джöдöма роч, мордва, удмурт, мари, перым коми, башкир, калмык, тотара, чуваш, хакас да мукöд кывъяс вылö.

Алексей Попов ачыс сідзжö вуджöдчö, комиöдö роч да фин-йöгра гижысьясöс.

Добавить комментарий

Добавлять комментарии могут только зарегистрированные и авторизованные пользователи.

272