Томдырсяньыс спортын
Ыджыдвидз сиктын чужлöм-быдмылöм Виталий Александрович Мишаринлöн (снимокын) олöмыс топыда йитчöма физкультуракöд, спорткöд. Спорткöд ёртасьö ичöтсяньыс, 8 арöссянь.
Öтчыд ёртъясыс висьталöмаöсь, мый гижсьöмаöсь спортшколаö да зэв ёна сьöлöм выланыс воöма. Сэки и Виталий ышалiс пырны том спортсменъяс радö. Лыжиöн котравны велöдысь тренер Афанасий Васильевич Габов бура вочаалiс том зонкаöс. Бур туйдысь-велöдысь дорын сiйö мывкыдмис школа помавтöдзыс. Медводдза вермöмсö шедöдiс мöдöд классын велöдчигас на, школаса ордйысьöмын: гын сапöга лыжи вылын босьтiс 1 места. Дас куим арöснас сетöмаöсь нин верстьöлöн первой спортразряд, а дас квайт арöснас лоöма спортса мастерö кандидатöн. И велöдчигас жö босьтöмаöсь республикаса сборнöйö.
Школа помалöм бöрын Виталий Мишарин пырис велöдчыны Иван Куратов нима педколледжлöн физкультура юкöнö. Велöдчис и сэк жö тренируйтчис спортса заслуженнöй мастер, олимпийскöй чемпион, нималана лыжник Василий Павлович Рочев дорын. Куим во велöдчöм бöрын лоис уджсикасö велöдчöм мортöн, физкультура велöдысьöн. 2003 воын Виталий шедöдiс Россияса спортлöн мастерлысь ним. Пöртiс челядьдырся медшöр мöвпсö.
Куим во армияын служитöм бöрын, кöнi сiдзжö вöлi спортивнöй командаын, Мишарин уджысь орöдчывтöг пырис велöдчыны СыктГУ-лöн физкультура юкöнö. А уджалiс сiйö юркарын кусöдчысьöн. Во да джын мысти Виталий локтiс чужанiнас. Пыр жö аддзысис аслас тренер-велöдысь А.В. Габовкöд да вöзйысис уджавны уджсикас серти. И... уджöн мойвиис. Куим во чöж уджалiс тренер-велöдысьöн Висер сиктса ДЮСШ-ын.
Виталий Александрович гöрдитчö аслас быдтасъясöн. На пиысь öткымынöн сы моз жö тренералöны, куим велöдчысь пöртiсны спортса мастерлысь норматив, кык томулов — биатлон кузя республикаса сборнöйынöсь. Эм бур шедöдöмъяс — сiдзкö туяна удж пöртö.
Тавося ноябрь тöлысьын тырас кык во, кыдзи Виталий Александрович зiльö кывкутана удж вылын. Сiйö — Кöрткерöсса ДЮСШ-ын директор. Уджыс сьöлöм сертиыс. Шуö, окотапырысь пö уджала. Öнi со дасьтöны спортшкола выль велöдчан во заводитчöм кежлö. Директор лача кутö, мый на дорö бара на локтасны томулов, кодi радейтö лыжнöй спорт и наысь быдмасны нималана лыжникъяс, чужанiн нимöдысьяс. Öд быд тренерлöн пö ыджыд кöсйöм да мог — быдтыны олимпийскöй чемпионъясöс. Виталий Александрович юксис нöшта öти кöсйöмöн — тайö спортшкола бердын восьтны биатлон юкöн. Сиам, медым сiйö регыдöн збыльмас.
Кык во сайын Виталий Мишарин семьяыскöд вуджисны Кöрткерöсын кыпöдöм ас керкаö. Олöны тыр-бура. Мишаринъяс радейтöны эбöс сетысь да лы-сьöм ёнмöдысь, вынйöр содтысь спорт. Гöтырыскöд да челядьыскöд радейтöны лыжиöн исласьны да котравны.
Виталий Александрович висьталiс, мый буретш уна йöза спорт мывкыдсьöдö чемпионъясöс. Физкультура да спорт винёвмöдöны мортöс, отсалöны шедöдны вермöмъяс. «Ме быдми том спортсменсянь Россияса спортлöн мастерöдз, лыжнöй спорт отсалiс и водзö отсалас меным босьтны выль тшупöдъяс», — тöдчöдiс В. Мишарин.
Аски, моз 8 лунö, Физкультурниклöн лун. Виталий Александрович чолöмалö тайö лунöн уджъёртъяссö, спорт да физкультура радейтысьясöс. Ставлы сиö сöвмöдны вир-яй, нырччыны да шедöдны вермöмъяс. Медым пö дзоньвидза вир-яйлöн (тело) вöлi тыр-бур вежöр.
Ми жö сиам, медым уджын и олöмын быд старт лоас шудаöн да кокниöн, вермöм босьтанаöн.
Добавить комментарий
Добавлять комментарии могут только зарегистрированные и авторизованные пользователи.