Воссис öнiя кадлы лöсялана кукань видзанiн

Луншöр кадö пемöсъяслöн оланiн дорö воис уна гöсьт: сиктсаяс, татчöс видз-му овмöсын талунъя зiльысьяс да ветеранъяс, республикаса видз-му овмöс министерствоын уджалысьяс, районöн веськöдлысьяс да уна мукöд, кодъяскöд «Нёбдинскöй» ООО кутö топыд йитöд да уджалö öти туйвизьын.

Нянь-совöн да мыла сьыланкывйöн вочаалiсны тöдчана да виччысянатор вылö воысьясöс. А найö жö ас боксянь висьталiсны бур кывъяс татчöс уджалысьяслы, и дерт жö, овмöсöн веськöдлысь Анастасия Семёновна Микушевалы, кодi оз сетчы сьöкыдлунъяслы и зiльö, медым «Нёбдиснкöй» овмöс вöлi медбуръяс лыдын.

Кыдзи пасйис аслас сёрниын Анастасия Микушева, выль кукань видзанiнлы подув вöлi вöчöма 15 во сайын, а стрöйбасö босьтчисны вöчны сöмын кольöм вося гожöмын. Во чöжöн овмöс вермöдчис помавны эз сöмын стрöйба кыпöдöм, но и став пытшкöсса удж лои вöчöма пöшти тырвыйö. Дерт, тырмытöмторъяс эмöсь жö, но матысска кадö найöс бырöдасны. И со талун танi лои позянлун быдтыны-рöдмöдны 300 юр лыд кукань, кöнi эм торъя вайсянiн, сöмын на чужöм пемöсъяслы жыр да сiдз водзö. А медтöдчанаыс – танi сöстöм, югыд, шоныд и куканьясöс видзöны оз домпомысь.

Дерт, татшöм мича да выль карта вöчöм вылö лои пуктöма эз сöмын вын, но и уна сьöм. Ставнас стрöйба сувтiс 36 миллион сайö шайт. Но, видзöдлыны кö водзö вылö да бура артыштны, то тайö видзöм сьöм сетас оз сöмын овмöслы, но и республикалöн экономика юкöнö тöдчана бур воöм: содас йöв производство. Öд, кыдзи пасйылiм газетлöн кольöм петасын, «Нёбдинскöй» овмöслы тавося кöч тöлысьö сетiсны рöдвыв скöт сöвмöдысь статус.