Öтмунöмлöн президиумын кызвыныс миян районса

Миян районысь чукöртчылöм кежлö коми войтырлöн Кöрткерöс районса конференция бöрйис 13 мортöс. И сiдз ветлiсны Михаил Габов, Алексей Ген, Анастасия Голубенко, Василий Кирушев, Надежда Старцева, Игорь Кирушев, Надежда Дорофеева, Христина Гевейлер, Афанасий Габов, Анжела Никифорова, Светлана Ивашева, Станислав Коюшев да ме, делегацияöн веськöдлысь, Любовь Кирушева.

Чукöртчöмлöн медводддза лунö лои бöрйöма уджалан президиум, съездса секретариат, мандат комиссия (миян районысь сэнi зiлис Анастасия Голубенко), артасян комиссия (Кöрткерöс район петкöдлiс Анжела Никифорова), редакционнöй комиссия. Тайö лунö съезд кывзiс «Коми войтыр» дiнмукостса öтйöза öтмунöм Исполкомлысь удж йылысь отчёт (мый вöчöма нёль воöн) да ревизионнöй комиссиялысь отчёт.

Съезд вылö чукöртчöмаöс унаöн чолöмалiсны, на лыдын респубикаса Юралысьлысь удж вöчысь Сергей Гапликов. Сикт-каръясысь воöм делегатъяс сёрнитысны кутшöм удж колö вöчны, мед республикаса йöзлы, а торйöн нин сикт¬салы, позис шогтöг овны да уджавны.

Рытнас козин пыдди видзöдiм Коми республикаса вужвойтырлöн шылада драма театрын В. Тиминлысь «Эжва перымса зонка» повесьт серти спектакль.

Мöд луннас асывсянь воöм делегатъяс зiлисны секцияясын. Вöлi куим секция. «Коми кыв, йöзöс велöдöм, культура да СМИ» секцияын зiлисны Анжела Никифорова, Игорь Кирушев, Алексей Ген, Василий Кирушев. «Традиционнöя вöр-ваöн вöдитчöм да экология» йылысь сёрнитiсны Любовь Кирушева да Станислав Коюшев. «Сикт да войтыр» секцияö пырöдчылiсны Афанасий Габов, Анастасия Голубенко, Христина Гевейлер, Михаил Габов да Надежда Старцева.

Урасьöм 13-öд лунö лои бöрйöма «Коми войтыр» öтмунöмöн веськöдлысьöс да 12 морта Президиум. Ёна вензисны, та вöсна унджыкöн вöзйисны веськöдлысьöс бöрйыны гусьöн. Веськöдлысьöн лои Галина Габушева. Президиумö бöрйисны 12 мортöс. На лыдын Кöрткерöс районысь — Афанасий Габовöс (Ыджыдвидз) да менö, Любовь Кирушеваöс (Кöрткерöс). Колö пасйыны, мый Президиумö пырöм войтыр пиысь унджыкыс миян районысь петöм йöз.

Ичöт грезд да сиктлöн öнiя олöм-вылöм йылысь Кöрткерöс делегация нимсянь сёрнитiс Важкуръяысь Надежда Старцева. Сiйö индiс, мый колö вöчны, медым олöмыс грездын эз кус, мед эз вöвны удж-тöмалысьяс, мед чужис унджык кага, мед вöлi сикт сöвмöдан торъя Уджтас.

Коймöд лунö мунiс кывкöрталан чукöртчылöм, Съездлысь вöзйöмъяс да резолюция видлалöм-примитöм. «Коми войтыр» öтмунöмлöн Уставö вöлi пыртöма вежсьöмъяс.