Ёрт йылысь кыв

Александр Егорович «Звезда» газетын 1965 восянь, уджалiс письмöяс отделын. Танi ми и тöдмасим.

Сöвет кад. Райком тшöктö газет пыр паськыда петкöдлыны партийнöй олöм, социалистическöй ордйысьöм, пятилеткаса

водзмöстчысьясöс. Сэсся быть колö сетны чина йöзлысь норасьöмъяс вылö воча кывъяс. Нöшта öти мог — ышöдны общественнöй корреспондентъясöс. Уджыд пыр юр выв тыр. Ставсö тайöс мукöдысь бурджыка вöлi кужö да сяммö вöчны Александр Егорович. Пыр дась ручка-блокнотöн петны туйö. Сытöг эз кольлывлыны и уна лыда коммунистическöй субботникъяс.

Александр Егорович, арлыда нин морт, вöлi ыджыд опыта журналист, коммунист. Сiйö торъя бура тöдiс районса вöр овмöс. Газетын быд боксянь йöзöдлiс вöр лэдзысьяслысь да кыöлöдчысьяслысь сьöкыд уджсö, вöр посёлокъясын коми, роч да мукöд кывъя войтырлысь олöм-вылöмсö. Эрдöдлiс нелючкияс, вöзйылiс овмöс сöвмöдан туйяс.

Летучкаяс вылын стрöг донъялысьяс ёна ошкылiсны сылысь бура подулалöм гижöдъяссö. Ми, том йöз, вöлiм сылöн велöдчысьясöн.

Гажа шыа редакция котырын зiлисны и асныра, и наян, и яра вензьысь войтыр, но Александр Егорович быдöнкöд ладмылiс, пыр лабутнöй, гöлöс некор эз кыпöдлы.

Печать лунö вöлi гажöдчам чукöрöн — редакцияса да типографияса том и пöрысь. Некод эз кольлы бокö. Александр Егоровичлöн медыджыд праздникыс — Победа лун. Сiйö войнаса ветеран, лейтенант, Гöрд Звезда ордена кавалер. Чорыда ранитчылöма, дыр бурдöдчöма госпитальын. Помнита кутшöм кыпыда пасйим Победалы 30 во тыран лун. Сэки Александр Егорович редакцияса став ёртъяссö нуöдлiс гортас. Зэв дыр гажöдчим чöскыд сёян-юанöн озыр пызан сайын.

Прöст кадö сiйö ёна радейтлiс кыйны чери. Унаысь аскöдыс вöлi фотоаппарат. Окотапырысь снимайтлiс вöр-ва да йöзöс.

Талун сикт-грездъясын, вöр посёлокъясын эмöсь на войтыр, кодъяс тöдлiсны журналист Александр Егорович Кутькинöс, лыддьылiсны сылысь гижöдъяссö. Рöдвужыскöд тшöтш бурöн казьтыштам Эжва бокса Пезмöг сиктысь петöм тöлка, зiль да шань коми мортöс, кодi газетъясын уджлы сетiс 22 во.