Опонасей ярманга чукöстiс видзны вöр-ва

Асывсяньыс гöстьясöс видзаалiс Виктор Савин нима музей. Сэнi öнiсянь кутас уджавны «Афанасьевская ярмарка» быдса экспозиция, кöнi висьтавсьö важся кадö ярманга йылысь, тшöтш и выльысь чужтöм гаж йылысь.

Сиктса культура керка дорын и пытшкас паськöдчöмаöсь нин вузасьысьяс: ньöб кöм-паськöм, яй-йöв, пöжас да юмовтор, ма да öрек. Районса киподтуя войтыр ошйысисны асланыс вöчöмторъясöн, мый тшöтш позис ньöбны. Налысь уджъяс, кыдзи вузасьысьясöс, позис донъявны. Ас вöчöмторъясысь пасйисны Одыбысь Геннадий Поповöс, Нёбдiнысь Елена Касеваöс, Пöдтыбокысь Наталья Шелепановаöс. Вузасьысьясысь вермысьяс лыдö петкöдчисны «Тройка» ООО, Юлия Савина да «Нёбдинскöй» ООО.

Тайö кадö Вежа Петыр да Павел вичкоын, мый вочасöн ловзьöдöны-дзоньталöны сиктсаяс, бур сиöмöн ярмангалы да сиктсаяслы кевмысис отеч Александр (Митрофанов).

Лун шöр кадö сиктса культура керкалöн ыджыд залын мунiс районса войтырлысь талант петкöдлан ярманга. Пöшти быд ярманга дырйи видзöдысьясöс гажöдö Коми Республикаса народнöй артистка Лидия Логинова. Сьылiс да бурсиис нёбдiнсаяслы да гöстьяслы и öнi. А нёбдiнсаяс нимсянь козьналiсны сылы вугыр шатин. Буретш гожся керкаыс Лидия Петровналöн Нёбдiнын, мед бурпöт чери кыяс. Нёбдiн йылысь бöръя кывбур лыддис и асшöр гижысь Анатолий Кулаков.

Гаж нуöдiсны Ярмарка ань да Опонасей. Сьыланкывъяс, тшöтш и йöктöмъяс, вöлi сиöма вöр-валы, миянöс гöгöртас видзöмлы. Ёна кекöначасисны Пöдтыбокысь («Таёжник») да Ыджыдвиддзысь («Славяне») мужичöйяслö котыръяслы. Йöктöмöн гажöдiс Кöрткерöсысь «Позитив» котыр. Гажöдiсны сьылöмöн Алексей Королёв (Пöдтыбок), Татьяна Толченицына (Шойнаты), Александр Мишарин (Ыджыдвидз), Ксения Пономарева и Максим Тюрнин (Кöрткерöс), Светлана Каракчиева (Нёбдiн). Медбура видзаалiсны Одыбысь «Сипертас», Типöсиктысь «Оз тусьяс» котыр, Кöрткерöсысь «Зыряночка» котыр, Нёбдiнысь «Сьöлöм сьылöм» котыръясöс.

Эдуард ПИМЕНОВ.

Снимокыс авторлöн.