Чужанiн нимöдысь уджъяс

Выставка котыртысьяс традиция серти корöмаöсь мероприятие кежлö снимокъяс вöчалысьясöс-авторъясöс да видзöдысьясöс. Тайö пöрйö уна гöсьт волiс Пöддельнöй сиктысь. Буретш тайö сиктын олысь öткымын морт вайисны ассьыныс уджъяс-снимокъяс йöзлы петкöдлöм вылö. Тайö школаын велöдысь, райсöветса депутат, вöр-ва радейтысь да сiйöс видзны ышöдысь нывбаба Ева Моторина, велöдысь, «Пöддельнöй» сикт овмöдчöминлöн сöветса депутат, спортивнöй ориентирование кузя мастерö кандидат Татьяна Елохина, велöдысь жö, чужан му туялысь Валентина Падалко, СГУ-са студентка, быд уджö öзйысь, уджач Арина Моторина да 10-öд классын велöдчысь, чужан мусö да лызьöн котравны радейтысь Карина Попова.

Выставка видзöдны воöм йöз водзын медводз петкöдчис Шöринлöн «Исерга» нима ансамбль (веськöдлысьыс А. Фёдоров). Найö сьылiсны коми сьыланкывъяс, мыйöн кыпöдiсны гöсьтъяслысь кыпыд ру. Сэсся Валентина Путинцева, культура шöринын художествоа веськöдлысь, тöдмöдiс выставкавывса уджъясöн, авторъясöн. Та бöрын бара на юргис сьыланкыв. Сьылiс уналы бура тöдса (конкурсъясын, смотръясын пырся петкöдчысь), мича мыла гöлöса Пöддельнöйса «колипкай» Светлана Бальцер.

Пöддельнöйысь жö петлöм, öнi студентка Арина Моторина нуöдiс Пöддельнöй да сы гöгöрса инъяс йылысь виртуальнöй экскурсия-презентация. А медым видзöдысьяс збыльысь кылiсны асьныссö выль ин туялысьясöн, ставныслы сетiсны компас. Экскурсия нуöдöмын татшöм аслыспöлöстор лои виччысьтöмöн и шензьöданаöн. Ариналöн интереснöй висьталöм бöрын сьылiсны сиктса художествоа самодеятельностьö пырысь том нывкаяс. Ёна и кекöначасисны налы.

Медбöрын Пöддельнöйысь енбиа йöзлы бур, аттьöалана кывъяс висьталiсны Шöринлöн «Светоч» фотоклубö пырысь Станислав Коюшев да Творческöй вынъяс районса котырöн юрнуöдысь Анатолий Кулаков. Медбöръяыс жö сьылiс ассьыс öти сьыланкыв.

Гижöд помын тöдчöда, мый сиктлы бур слава, нимöдöм вайöны медводз енбиа, мастер йöз. И аслыспöлöс, югыд да вунöдны позьтöм, пай чужанiнлöн историяö пуктöны да кольöны снимайтысьяс, фотохудожникъяс. Налöн уджъяс олöны нэмъяс чöж. Миян районын эм татшöм мастер йöзыс. Со и вайöдiм пример – Пöддельнöйын олысьяс йылысь. Налöн снимокъясын – сикт, сиктса йöз, важ стрöйбаяс, ловъя вöр-ва. Тайö ставыс дугдывтöг вöрзьöдö чужан му радейтысь, чужанiнсö вылö пуктысь мортöс.

Пöддельнöй – коми важ сикт. Медмича, сöстöм, нянь-сов вылö бур сиктъяс пиысь öти. Танi паськыд уличаяс, еджыд ялаа озыр тшака инъяс, кык вичко, Вежа живоначальнöй Троича да Сотчытöм (Неопалимая) купина. Пöддельнöйын олöны уджач, чужанiнсö радейтысь войтыр.