Ытшкисны-куртiсны Ньывсер юбокса видз вылын

Со татшöм мича гаж, «Звени, коса!» ордйысьöм, котыртсьылiс кольöм субöтаö Одыбса Марка пöлöйинын, кодi чукöстiс да öтувтiс ас дорас 27 ытшкысь-куртысьöс: Одыбысь, Кöрткерöсысь, Ыджыдвиддзысь, Висерысь, Мордiнысь, Пöдтыбокысь, Пöддельнöйысь, и весиг Изьва районысь. Ставныс — мастерсьыс-мастерöсь.

Мероприятие заводитчис кыпыд сёрнисянь. Ордйысьысьясöс да воöм гöсьтъясöс чолöмалiсны да висьталiсны бур сиöмъяс Константин Сажин (районса администраяöн веськöдлысьöс вежысь), Светлана Савчук (районса видз-му овмöс юкöнöн веськöдлысь), Татьяна Ларукова («Нившера» ООО-öн веськöдлысь), Нина Изъюрова («Одыб» сикт овмöдчöминса юралысь), Дмитрий Грюков (районса спортшколаса веськöдлысьлысь могъяс олöмö пöртысь).

Гаж кыпыда восьтöм бöрын и заводитчис медтöдчанаыс — ытшкöм. Медводз ассьыныс мастерлун да востерлун видз вылын петкöдлiсны мужичöйяс гöрбуш косаöн ытшкöмын. Кöкъямыс айлов – Александр Изъюров (Кöрткерöс), Александр Королёв (Пöдтыбок), Константин Чупров (Кипиево, Изьва район), Олег Михайлов, Руслан Михайлов, Михаил Габов, Валентин Габов да Евгений Попов (Одыб) сьöлöмсянь ытшкисны бобöнянь сора турун. Тöдöмысь, гöрбуш косатö оз медводдзаысь кутны кианыс, быдöнлöн ыджыд да бур стаж, но со тай ытшкöм эз сетчы быдöнлы öткодя. Видзöдысьлы тайö тыдалiс и косалöн вундан шы серти, и турунлöн орöм серти. Синмö шыбитчис, кыдзи мича да кокниа ытшкö Александр Королёв. Бöрынджык тöдмалiм, мый том морт зiльö Пöдтыбокса кусöдчан юкöнын. Косатö ичöтсянь киас кутö, абу öти гектар нин ытшкöма аслас олöмын, öд мам-бать ас овмöсын пыр видзлöмаöсь скöт.

Öдйö мунiсны индöм дистанция мужичöй-ытшкысьяс. Эз нöрзьыны видз вылын и нывбаба-ытшкысьяс. И со гöрбуш косаöн виччысисны нин ассьыныс старт Вера Паршукова (Шойнаты), Лия Королёва (Пöддельнöй), Диана Канева (Мордiн), Анна Подорова, Галина Попова, Мария Мишарина, Ольга Хайрединова, Мария Михайлова, Нина Габова, Анна Габова (Одыб). Ёна жö любö на бöрся вöлi видзöдны, торйöн нин гажöдiсны син коми паськöма аньяс, кыдз Лия Королёва. Нывбаба висьталiс, мый ичтöсянь велöдчöма ытшкыны гöрбуш косанад.

«Сизим арöссянь ытшка. И кор тöдмалi, мый лоö татшöм ордйысьöм, пыр жö и телепит лои видлыны ассьым вын-эбöс. И öнi ньöти ог каитчы, мый тшöтш пырöдчы ордйысьöмö. Ытшкы кокниа, сьöлöмсянь. Окота, мед тайö конкурс эз кус, а водзö сöвмис да öтувтiс ас дорас унджык войтырöс. Аттьö гаж котыртысьяслы да нуöдысьяслы», — юксис миянкöд Л. Королёва.

Сьöрсьöн-бöрсьöн мунiсны конкурслöн нимпасъяс. Со видз вылын кутiс кывны журган шы. Тайö петöмаöсь бензин вылын уджалысь косаöн ытшкысьяс. Тайö нимпасын петкöдлiсны ассьыныс кужöмлун Михаил Габов (Одыб) да Эмилия Карелина (Кöрткерöс). Эз унаöн ыштыны ытшкыны литовкаöн. Мужийöяс пиысь водзмöстчисны юрсиктысь кык ветеран Сергей Изъюров да Михаил Удоратин, нывбабаяс пиысь — Тамара Смирнова (Мордiн), Наталья Шахова да Галина Изъюрова (Кöрткерöс). Торйöн нуöдiсны и öтувъя эстафета. Тайö юкöнын петкöдчисны нёль команда, быд командаын вöлi öти мужичöй да öти нывбаба. Тайö Михаил Габов да Нина Михайлова (Одыб), Константин Чупров (Кипиево) да Ольга Хайрединова, Руслан Михайлов да Анна Подорова (Одыб), Александр Королёв (Пöдтыбок) да Мария Мишарина (Одыб).

Эз сöмын ытшкысьяс кисьтны пöсь, но и сьылысь-йöктысьяс тшöтш. Мича мыла шыöн юргисны сынöдын коми да роч сьыланкывъяс, быттьö бобувъяс поркъялiсны сцена вылын йöктысьяс. Зэв ыджыд аттьö лов кыпöдöмысь «Исерга» (Кöрткерöс), «Сипертас» (Одыб), «Таёжники» (Пöдтыбок), «Оз тусьяс» (Типöсикт), «Зачарованные» (Висер), «Славяне» (Ыджыдвидз) котыръяслы. Вöрзьöдiсны сьöлöм гудöк вылын мича ворсöмöн Одыбысь Геннадий Попов да Андрей Подоров, Ыджыдвиддзысь Василий Попов.

Татшöм гажа да кыпыд праздник вылын и кадыд öдйö лэбис. Эг и тöдлöй, кыдзи пажын бöр нин воöма. И со Валентина Путинцева, гаж нуöдысь, юöртiс, мый жюрилöн дась нин ордйысьöмлöн кывкöртöдъяс.

Аттьöалiс гаж котыртысь-нуöдысьясöс да чолöмалiс ордйысьысьясöс районса администрацияысь веськöдлысьöс медводдза вежысь Александр Артеев. Сiдз, «Звени, коса!» конкурсын вермысьясöн лоины: Константин Чупров да Ольга Хайрединова (гöрбушöн ытшкысьяс), Руслан Михайлов да Анна Подорова (öтувъя котырын ордйысьысьяс), Михаил Габов да Эмилия Карелина (бензин вылын уджалысь косаöн ытшкысьяс), Сергей Изъюров да Тамара Смирнова (литовкаöн ытшкысьяс). Торйöн донъялiсны и куртысьясöс. Тайö нимпасын медбура петкöдчис Сергей Изъюров. Вермысьясöс пасйисны дона козинöн да грамотаясöн. Но призтöг эз мун конкурсö ни öти пырöдчысь, быдö сетiсны диплом, «Увлекательное путешествие по реке Лымва: предания и легенды» ичöтик небöг да Сыктывкарса йöв завод спонсорсянь футболка. Зэв дона козин – бензин вылын уджалысь коса – козьналiсны «Нившера» видз-му овмöслы. Буретш тайö овмöслöн директор Татьяна Ларукова да Одыб сиктса ветеранъяс котырöн веськöдлысь Лидия Михайлова водзмöстчисны нуöдны «Звени, коса!» конкурс. Татьяна – вöзйис мöвп, а Лидия – гижис-лöсьöдiс панас (положение). А сэсся öтув, Кöрткерöс районса Коми культура шöринкöд, вайöдiсны заводитöм балалысь уджсö помöдз – нуöдiсны конкурс. Видзöдысьяс, а торйöн нин Одыбса да татчöс сиктысь петöм войтыр висьталöны зэв ыджыд аттьö гаж котыртысьяслы. Весиг бокиысь воöм том йöз асланыс сёрниын пасйисны, мый татшöм конкурс колö нуöдны и водзö, кыскыны сыö и томуловöс. Эскам, тадзи и лоö.