Петыр лунöн, гожся шоныд гажöн

Ёна и челядь тёльöдчисны ю вылын, налöн горзöм-сералöм ылöдз кылö. Ме тай ассьым челядь дырöс казьтыла жö, ю дорсьыд ог вöлi и кайлöй. Вöлi менам Васька кань дзöля дырйи, мам краситö кильчöвыв и мен лои окота жöкраситным-мавтны. Босьты да и красканад Вась каньтö мавтi. Аддзисны бать-мам и шайпайöсь. Шуöны каньыд кулас, мый вöчин? А ме ичöт на вöлi и вежöр абу, синва киссьö, бöрда. Каньтö, бать сетiс бензин, да зырала ветьöк-трапкаöн, а сiйö кулöма шуйкодь нин. Лэччöдi ю дорö, мыськала, а ачим сем­дöма бöрдöмысла да Васькаöс жалитöмла. Но Васька кань ён вöлöма, эз кув. Ёна на и öтлаын черитö кыйим.

Менам быдмигöн вöрсьыд кертö оз КамАЗъяс вöлi нуны, а ю кузя кывтöдлiсны, пуктöны вöлi бонаяс, медым керсö чукля берöгас тöлыс оз ляк. Бонаыд кузь, ю шöрöдзыс петö и ме аслам канькöд быд рыт лэччывлi чери кыйны. Зэв сюсь кань вöлi, аддзас кö, мый вугыршатин босьта, ме водзын на и котöртас. Каям бона вылас вöлi, мунан и ю шöрын нин, а Васькаыд любöй циркöвöй кань виртуозысь на виртуоз: ме лэпта гурынасö, а сылöн вомас нин. Пыр тай нидзувыд вылö вöлi сьöлыштам да шуам: «Петыр Павел сет чери». Эг ичöт дырйи и думыштлы, мый тайö шуöмыс петкöдлö. А вöлöмаöсь апостолъяс Петыр да Павелыд: öтиыс чери кыйысьяслöн покровитель, вот вöлöм мыйла и шуöны Петыр Павел сет черитö.

Но Петыр луныд, дерт жö, храм праздник, важöнсянь мунö кутшöмко грездын аслас гажöдчöм-ворсöмöн. Ти­пöсиктын Трöича, Висерын Илля лун, Зулöбын Пантилей, а Сюзяибын — Петыр лун. Тайö лунö гажöдчылöмаöсь, волöмась öта-мöд дорö гöсьтитны, уна сур-ырöш пулöмаöсь, помассьылöма Петров пост. Том йöз водз асывсянь ветлöмаöсь медыджыд кыр ыб вылö, медым адзыны да видзöдны шондiлысь петöм. Шондiыс тайö лунö ёнджыка пöртмасьö пö, уна сикас югыд зарни да эзысь койö. Ыджыд хороводъяс нуöдлöмаöсь, йöктылöмаöсь да ставöн сьывлöмаöсь, ыджыд кöлысь ворслöмаöсь.

Мыйкö, дерт жö, коли тайö гажыслöн Сюзяиб грездад: ыджыд концерт вöчлывлам, корлам бокиысь артистъясöс. Гудöкöн ворсысьясöс таво бара на виччысям: Ыджыдвидзысь Кино Васьöс, Одыбысь Валентин Габовöс, Сюзяиб грездысь Иван Мишаринöс. Шуласны тай, гудöк шыыд пöсьöлöмтö вöрзьöдö, да и нюмтö петкöдö. Бара на кыпыда да гажа лöсьöдам мича концерт, корам волыны да тшöтш пасйыны ворсöмöн да сьылöмöн тайö гожся иван-чай кöра лунсö. Быдöнлы сиам шондiа да лöз енöжа лун, шоныд да пöсь лысваа вой, зарниöн ворсысь асъя кыа да турун кöра лöнь рыт. Став бурсö, мувывса войтырлы!