Меню
12+

Газета Корткеросского района - Кöрткерöс районса газет

08.04.2022 14:45 Пятница
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Сьылiгтырйи удж мунöджык

Быд морт торъялö öбича-сямлуннас, кужöмлуннас. Öткымын – енбиаöсь чужöмсяньыс, татшöмъяссö шуöны самородокъясöн. Неважöн миянлы мойвиис тöдмасьны öти айлов-самородоккöд, кодi торъялö сибыдлуннас, восьса сьöлöмнас, шензьöдана енбинас. Тайö Типöсиктысь Андрей Шучалин.

Андрей чужис-быдмис и öнi олö, уджалö грездын. Кыдзи шуис вом­ъ­­­­ёрт, сиктыс кö пö олас и ми олам, «мöдлаö оз кыскы».

Анна да Николай Шучалинъяслöн семьяын куим ныв-пи, Андрей – медся ичöтыс. Анна Степановна нэм джын уджалiс видз-му овмöсын бухгалтерöн, öнi пенсия вылын, сьылö «Оз тусьяс» фольклор котырын. Николай Иванович сiдз жö зiлис видз-му овмöсын, медводз вöлi трактористöн, сэсся конюхöн. Тшöкыда бать дорын бергалiс и Андрей, вöвъясöс дöзьöритан удж сылы бура тöдса.

Висерса шöр школа помалöм бöрын Андрей пыр жö пырис уджавны «Вишерскöй» совхозö. «Кызьысь унджык во нин уджала видз-му овмöсын. Абу кокни удж. Кöсъя, медым совхоз оз киссьы. Совхоз лоас – лоас и удж, а бырас кö, и грезд бырас, оз кутны ытшкыны видзьяс, ставыс рассялас-бадьсялас, тырас азьгумöн. Мед эськö плавъялысь (понтоннöй) пос дзоньталасны, постöг совхозлы лоас зэв сьöкыд и кöрым вайны, и яй нуны. Поскыс важмöма, сiсь. Ми олам ю сайын, плавъялысь поскыс орчча, Паслöтчöм сикт дорын», — юксис миянкöд аслас мöвпъясöн Андрей Шучалин.

Ас грездын айлов кыпöдiс ас керка. Лöсьöдiс гортса овмöс, пемöсъясöс, гидас баксö бычö да тюргöны чипан, индюкъяс. Шучалинлöн быдмöны рöд нюжöдысь кык пи. Бать велöдö пиянсö радейтны чужанiн, ышöдö бура велöдчыны да кутчысьны дзоньвидза оласногö. Андрей Николаевич — дзоньвидзалун сöвмöдöм дор. Радейтö спорт. Вежоннас кыкысь ветлывлö Висерö волейболысь секция вылö. Тшöкыдджыка ветлыны оз артмы, öд сылöн эм нöшта на сьöлöм гаж.

Матö нёль во сайын Андрей локтiс клубын котыртöм «Оз тусьяс» фольклор котырö, кодöн веськöдлö Ангелина Ивановна Панюкова. Сэнi уна во нин сьылö Андрейлöн мамыс.

«Выль вося гаж дырйи петi сцена вылö, и сэсся бöрсö эз нин лэдзны, — висьталö А. Шучалин. — Менö котырö важöн нин корисны да пыр ыждалi, полiкодь. Öнi на сцена вылö пета да гöгöр дзöрö. А сэсся и нöшта öти мужичöй, Александр Иванович Габов, öтувтчис миян дорö. Сылы, дерт, кокниджык вöлi, öд ме (мужичöй) вöлi нин котырын. Нывбабаяс пöвстын миян лои гажаджык». Водзтi Андрей сьывлöма детсадын да школаын сьылан урокъяс дырйи.

Шылада инструментъяс пиысь медводз вомъёрт видлöма ворсны гитара вылын. Но гитара эз «сетчы» да босьтчис ворсны гудöкöн. И бара жö велöдчö ворсны ачыс, отсалö сылы и öтуввез. Клубысь корис гудöк да гортас вöляникысь ворсö. Андрейлы воис сьöлöм вылас тайö шылада инструментыс, вöрзьöдiс сылöн шыыс-горыс. Заводитiс артмыны ворсöмыс да лов кыпöдöм могысь öнi тшöкыда босьтлö киас «ёртсö». Кольöм вося декабрын Андрей пырöдчис «Играй, гармонь!» районса конкурсö, кöнi гудöк улын сьылiс мыла сьыланкыв. Лача кутам, мый сылысь петкöдчöм аддзылам ог на öтчыдысь.

Мыйöн нöшта торъялö Андрей Шучалин? Буретш сiйö кадö, кор локтiс «Оз тусьяс» котырö, заводитiс тэчны-гижны кывбуръяс. Медводз артмöдалiс гажлунъяслы, чужан лунъяслы, волöн кадъяслы сиöм кывбуръяс. Найöс оз видз пызан вылын, а йöзöдö ВКонтакте группаын аслас лист бокын. Медводдза кывбурсö гижны ышöдöма фольклор котырыс. Сы висьталöм серти, вöлöм, мунö бать-мам дорас пывсьыны, и сылы паныдасяс котырöн веськöдлысь Ангелина Ивановна, кодi висьталöма Москваын конкурс вылын «Оз тусьяслöн» мöд места босьтöм йылысь. Ангелина Панюкова корöма Андрейöс юöртны мамыслы, мый чукöртчöны клубын.

«Ог тöд, кöнi да кыдзи гижöны нималана гижысьяс, а ме пывсигöн кутi чукöртны юрын мöвпъяс. Дзик тай пачысь шомсö эг босьт да гиж пывсян стенас, гортын эштöдi кабала вылын. Гортлань лэччигмоз пыртi клубö, ошйыси налы, тшай юим», — юксис миянкöд енбиа морт.

Кыдзи и кызвын айлов, Андрей радейтö вöр-ва, кыйны чери да вотчыны. Вöр-ва дорын быдмылöм да олысь морт татöг оз вермы. Сiйö кыскö аслас мичлуннас, аслыспöлöс чöскыд кöрнас да озырлуннас – тшак-вотöсöн, звер-пöткаöн, бурдöдчан быдмöгъясöн. Вöр-ва сетö мортлы вынъяс, шойччöдö, бурдöдö. Чужан грездын олöм, кöнi ставыс тöдса да ас, бур бать-мам, муса пиян да сэтчöс шань йöз, кытшалысь вöр-ва – ставыс тайö и ышöдö том айловöс овны кыпыд олöмöн, водзмöстчыны, сöвмöдны енбисö, кужöмлунсö. Сиам Андрейлы, «енбиыс пыр медым öзъявны вермас, чужас на сэки уна выль кывбур да сьыланкыв».

Оксана ГУДЫРЕВА.

Андрей ШУЧАЛИН

***

Мамлы сизимдас нин тырис.

Уна сiйö? Этша-ö?

Татшöм мöвпыс юрö пырис.

Водзö олöм уна-ö?

Мед на, дерт жö, водзö лоас

Кыпыд олöм, югыд вöт.

Шогыс, лёкыс бöрö коляс,

Визь пыр еджыд, абу сьöд.

Дзоньвидзалун тэныд сиам,

Бура овны водзö дыр.

А ми тэнад челядьпиян

Отсöг сетам тэныд пыр.

***

Кутшöм лöсьыд талун лун,

Быдöн сиö меным бур.

Дзоньвидзалун, кыпыд олöм,

Татшöмторйыд ставлы колö.

Аттьö ставлы, рöдвуж, ёртъяс

Да и тöдтöм-тöдса мортъяс,

Аслыныдлы ставлы пыр,

Медым бурыс локтас тыр!

***

Сьöлöм тiрö, полö син,

Ас пытшкын мен оз сюр ин.

Но а муса нывкöд кыкöн

Пыр жö корсям шуда ин.

***

Тулыс. Гажа мича кад,

Гöгöр ставыс ловзьö!

Ваыс туö, ме зэв рад.

Пыжöн öдйö тöвзя!

***

Лым вузала ме ог донысь,

Отсалö сiйö быд могысь.

Некысь татшöмыс оз сюр,

Танi миян лым медбур.

Сывдан кö тэ сiйöс тазйын,

Мыськан ассьыд ки да кок.

Кисьтан вылад, вывсянь улöдз,

Легзяс-öддзас гöгöрбок.

Позьö разöдны град вылö,

Пыдöдз выныс сылöн пырö.

Арнас лоас тэд «фурор»,

Быдтас воас пом ни дор.

Сiдз жö сывдан да кö кынтан,

Кампет пыдди нёнялан.

Рубöн килограммысь мынтан,

Шог олöмысь палялан.

Сöмын эн ылалöй бур йöз,

Пöрйöдлысьыд тырмö тай.

Бокысь эн босьт лымсö гортад,

Типöсиктысь сöмын вай.

***

Потеплело, весной запахло,

Оживают мотыли.

Сердце чтобы не зачахло,

Наслаждайся и люби!

Бабочка порхает в доме,

Цвета счастья принесла.

Она оправилась от комы,

Жить с новой масти начала.

Бабö шулiс

Меным бабö унаысь шулiс,

Турун ытшкылiм пö нюрысь,

Ок и сьöкыд вöлi кайны,

Нöбйöн турун мöслы вайны.

Турун юр туй бура курт,

Коскыд тэнад оз на дзурт.

Эн пö коль ни öти прать

Или бекъяд тэныд бадь.

Ок и сьöкыд вöлi кад,

Вöлi гуляйтны бы рад,

Сöмын ыжыд, мöскыд баксö,

Нёньöдны тшöтш колö куксö.

Найö сетасны тэд вурун,

Чöскыд кö тэ пуктан турун.

Сюрук сiдз жö сетас йöв,

Бура коляс кöдзыд тöв.

Öнi... гöгöр ставыс тыри,

Сиктысь ыжыс, мöскыс быри.

Гöгöр ставыс бадьсялö,

Видзьяс вылыс нитшсялö.

Öшинь улад турун тыр,

Öдйö быдмö сiйö пыр.

Сöмын сёйны некодлы,

Он тай ачыд някльöдлы.

Лавкаын со öнi ставыс:

Выйыс, рысьыс, йöлыс, яйыс.

Оз ков лудын турун бертны,

Сöмын колö сьöмтор сетны.

Снимокыс

Андрей ШУЧАЛИНЛÖН

Добавить комментарий

Добавлять комментарии могут только зарегистрированные и авторизованные пользователи.

54