Меню
12+

Газета Корткеросского района - Кöрткерöс районса газет

23.08.2022 13:12 Вторник
Категория:

Нимлöн ыджыд вын

Мойвиис мöдысь аддзысьлыны Позтыкерöс сиктын олысь медолöма анькöд. Зарема Федосеевна Торлопова кöч (сентябрь) 2 лунö кутас пасйыны 90 арöс.

Зарема Федосеевнакöд эг аддзысьлöй уна во. Но тайö кадöн сiйö ньöти абу вежсьöма. Сэтшöм на жö збой сёрниа, бур паметя, казьтылöмъясöн окотапырысь юксьысь.

Интереснö вöлi тöдмавны, мый тайö аньыслы нимсö сетлöмаöсь Заря, но школаын велöдчигас шуöмаöсь Заремаöн и чужöм йылысь эскöданпасын, а сэсся и паспортын пасйöмаöсь Зарема нимöн жö. Нимыс нывлы абу кажитчöма. Мыйла татшöм, абу роч, ним сетöмаöсь ай-мамыс? Олöма ань висьталiс, мый семьяыс вöлöма ыджыд, чужöма 12 ныла-пиа, но ловъя кольöмаöсь сöмын кыкöн – кык ныв. На пиысь öтиыс – Зарема. Посни челядьлысь кувсьöм дугöдöм могысь сиктса поп шуöма бать-мамлы сетны нывъясыслы шоча паныдасьлысь нимъяс. Сiдзи и вöчисны: нывъяслы сетiсны Тамара да Заря нимъяс.

Медводз велöдчöм артмис помавны сöмын 4 класс. Челядьлы тöдöмлунъяс сетiс зэв шань Наталья Викентьевна. Пыр на паметьын сылöн урокъяс.

Школа помалöм бöрын Зарема во уджалiс «Смел котыр» нима колхозын. Видзис кукъясöс. Арын чойыскöд мунiсны карö. Тамара велöдчис ФЗО-ын, а Зарема школаын. Помалiс 10 класс. Школаын велöдчöм бöрын нывка пырис уджа­вны Лесозаводса воднöй цехö. Сылы мойвиис веськавны бур бригадаö. Нажöвитöм сьöм вылö сiйö ньöбис паськöм.

А сэсся вöлi пединститутын велöдчöм. И танi мойвиис Федосеевналы. Налöн вöлi бöръя выпуск, кодъяслы вылыс тшупöда образование сетiсны кык во велöдчöм бöрын. Тайö студентъяслöн абу вöлöма иностраннöй кыв велöдöм.

1954 воын Зарема Федосеевна босьтiс диплом. Сылы вöлi окота уджавны чужан сиктас, но роносянь ыстiсны Мордiнö. Куим лун сiйö воöдчис индöм сиктö, кöнi овмöдiсны йöзлöн оланiнö. Кык да джын во велöдiс коми да роч кыв. А та бöрын велöдiс Позтыкерöсын. Комын куим во сиис велöдан уджлы!

1964 воын Зарема петiс верöс сайö. Анатолий Дмитриевичкöд чужтiсны да быдтiсны вит челядьöс – 4 ныв да öти пи. Семья пыр ви­дз­ис уна скöт, а мöд ногыс ыджыд котырöн некыдзи. Йöв, вый, нöк, яй – ставыс асланыс, оз ков ньöбны.

Позтыкерöсса школа пыр нималiс ён велöдысьясöн, вермöмъяс шедöдысь велöдчысьясöн. Челядьлы бур тöдöмлунъяс сетiс и Зарема Федосеевна. Школа помалысьяс бур кывйöн казьтылöны ассьыныс шань велöдысьсö.

Бур уджысь Зарема Федосеевнаöс пасйылiсны Почёт грамотаясöн да аттьöалана гижöдъясöн, эмöсь «Тылса труженик», «Уджвывса ветеран» нимъяс.

Пыдди пуктана аньлы, велöдысь-ветеранлы сиам уна во на лоны дзоньвидзаöн да шудаöн! Тайö зэв ыджыд шуд овны та ыджда арлыдöдз, нимкодясьны быд асывлы да кывны асьтö коланаöн да радейтанаöн! Кузь нэм Тiянлы, Зарема Федосеевна!

Добавить комментарий

Добавлять комментарии могут только зарегистрированные и авторизованные пользователи.

33