Бур мортыдлöн нимыс олö нэмъяс чöж

Тавося сентябр 4 лунö Коми Рес­публикаса Росгвардия Управлениеысь «Заря» СОБР-са сотрудникъяс кызьöдысь волiсны Нёбдiн сиктö, милицияса старшöй лейтенант Евгений Савинлöн гу вылö пуктiсны дзоридзьяс да минута чöв олöмöн казьтыштiсны сылысь югыд паметьсö.

Женя чужлiс 1966 вося ода-кора (май) 27 лунö Нёбдiнын. Сиктын быдöн тöдiс сiйöс. Вöлi зэв варов да сибыд. Школа помалöм бöрын зон служитiс морфлотын, «Петропавловск-Камчатский» ваувса пыж вылын.

Армия бöрын Евгений ассьыс олöмсö йитiс правоохранительнöй органъяскöд. 1989 воын заводитiс уджавны постöвöйöн, водзö зiлис Сыктывкарса УВД-лöн медвытрезвительын, сэтысь веськöдлысь чинын вуджис уполномоченнöйöн СОБР-ö. 1995-1996 воясö, медводдза чеченскöй кампания дырйи на, Евгений кыкысь ветлiс война вылö. Та бöрын помалiс милиция­лысь специальнöй шöр школа. Служебнöй могъяс бура пöртöмысь веськöдлысьяс наградитлiсны сiйöс «Милицияса отличник» морöсвывса знакöн, унаысь ошкывлiсны. Сэсся бара вöлi Чечня. Коймöд командировкаыс лои медбöръяöн…

Сентябр 4 лунся асыв. СОБР-ын уджалысьяс водзын веськöдлысьяс сувтöдiсны мог – тупкыны ФСБ-са сотрудникъясöс, кодъяс Ца-Веденоын паспортъяс прöверитöм улын долженöсь тöдмавны, кытчö дзебсьöмаöсь бандитъяс. Комиысь да Красноярскысь собровецъяс мунöмаöсь нуöдны «зачистка». Накöд тшöтш и Евгений Савин. Боецъяс кытшовтöмаöсь-видзöдöмаöсь став керкасö, кольöма медбöръя – дзик помас. Керкасö кытшалöм да водзвыв разведка нуöдöм бöрын некод абу виччысьöма лёктор. Керкаын вöлöмаöсь олöма гозъя да ныв. Боецъяс заводитöмаöсь видзöдавны вежöс бöрся вежöс. Друг öти жыр­йын воссьыштас öдзöсыс да пыр жö пöдласяс. Разведкаö мунöма ФСБ-са сотрудник. Сiйö калькöдыштöма öдзöссö да пыр жö чеччыштöма бокö горöдöмöн: «Боевикъяс!» Став сотрудникъясыс петöмаöсь керкаысь, босьтöмаöсь сiйöс кытшö да кутöмаöсь водзсасьны бандитъяскöд. Недыр нюжалысь тыш бöрын личнöй составсаяс заводитöмаöсь чуксавны öта-мöдсö. Сэсся мöдысь пондöмаöсь чуксасьны. Абу шыасьöма сöмын Евгений Савин.

СОБР-са сотрудникъяс саймовтчöмöн заводитöмаöсь корсьны Евгенийöс… Сiйöс аддзöмаöсь керкадорсянь неылын сулалысь пу улысь ранитчöмöн, садьтöгыс. Пуляыс морöсас, веськыдладорас, веськалöма, пырыс мунöма. Ёртъясыс кыскöмаöсь безопаснöй инö, сетöмаöсь медводдза отсöг, вöчöмаöсь укол. «УАЗ-öн» мöдöдöмаöсь база вылö, медым Евгенийöс видлалiс врач. Но сэнi бурдöдысьыс абу вöлöма. Корöмаöсь вертолёт, но сiйö сёрмöма кык час вылö. Милицияса старшöй лейтенант Евгений Савин усис Чечняын бандит котыръясысь юрнуöдысьясöс бырöдан операцияын.

Бур мортöс колльöдiсны медбöръя туйö став сиктöн. Весиг олöмаяс, вермытöмъяс петалiсны керкасьыс да пернапасöн колльöдiсны гортсö. Гуалiсны-дзебисны Евгений Савинöс чужан Нёбдiн сиктын Россияса гимн улö. Автоматысь куимысь залпöн лыйисны енэжö. Тайö вöлi зэв ыджыд шог ставлы, торйöн нин мамыслы, гöтырыслы, челядьыслы да рöдвужыслы. Гу вылас эз вермыны кутны синвасö весиг мужичöйяс.

Нёбдiнса школаын велöдчысьяс коми кыв да литература велöдысь Нина Фёдоровна Каракчиева юрнуöдöм улын нуöдiсны корсьысян удж: аддзисны районса да республикаса газет-журналъясысь юöръяс, кöнi гижлiсны тайö ыджыд шог йывсьыс, аддзысьлiсны Евгений Савинлöн мамыскöд, Эмилия Константиновна Савинакöд (кор сiйö вöлi ловъя на), öти классын велöдчысьяскöд, велöдысьяскöд да мукöд сиктса олыськöд, чукöртiсны казьтылöмъяс да снимокъяс. Нуöдлiсны экскурсия­яс чужан керка, казьтылан пöв да гу дорöдзыс, кöнi куйлö Геройлöн шойыс. Пырся корсьысьöм отсöгöн сиктса школаын, коми кыв кабинет пельöсын, вöлi лöсьöдöма Евгений Савинлы сиöм музей. Герой йылысь казьтылöмъясыс зэв донаöсь. Талун йöзöдам на пиысь некымынöс.

Анна Фёдоровна Коюшева, роч кыв да литература велöдысь: «Женяöс ме велöдлi 6 классянь. Вöлi неыджыд тушаа, сьöд синъяса шань зонка. Классын сiйö вöлi юрнуöдысьöн, сiйöс пыдди пуктывлiсны челядь».

Терезия Николаевна Габова, классöн веськöдлысь: «Вöлi зэв визув ртуть кодь зонка: восьса видзöдласа, мича нюма. Сöмын бур казьтылöмъяс сы йылысь!».

Валентина Васильевна Попова, библиотекаса уджалысь, суседка: «Рытъясын öтлаын ворслывлiм Женякöд. Вöлi зэв варов, шмонитысь. Пыр сёрнитiс чужан коми кывйöн. Сетлывлiс бур сöветъяс, ми кывзысьлiм сылысь».

Андрей Витальевич Федосеев, öти классын велöдчысь: «Рытъяснас Женякöд öтлаын ворслывлiм хоккейöн, котравлiм картаö вöвъясöс юктöдны. Вöлi кыпыд руа, шмонитлiс-гажöдлiс миянöс. Эз терпитлы пöръясьöм».

Мария Александровна Мишарина, мамыслöн нывъёрт: «Женя зэв ёна радейтлiс ассьыс матыссаяссö. Пöльыскöд öтшöтш пыр ветлöдлiс кыйсьыны, чери кыйны. Сы гöгöр пыр вöлiны ёртъяс, öнiöдз на волывлöны-казьтылöны сiйöс».

Мария Александровна Макарова, велöдысь, суседка: «Женялöн медбур ёртöн вöлi Валерий Макаров, сыкöд ёна лöсявлiсны. Школаысь мунiг-локтiгöн Женя вöлi быд паныдасьыськöд видзаасьö-варовитö. Зэв радейтлiс мамсö».

Светлана Вениаминовна Мингалёва, велöдысь, рöдня: «Женя вöлi дась быдöнлы отсавны. Ог некор вунöд татшöм вöвлöмтор. Ар. Сентябр тöлысь. Картупель идралан кад. Тракторъяс абуöсь, ставöн уджалöны колхозса муяс вылын. Мунiм Вомынö, бать-мам дорö. 7 час рытын звöнитö Женя: «Пыр жö локтöй Нёбдiнö, картупель керöма, колö чукöртны. Войнас вермас кынмавны». 9 час бöрын пемыд нин. Шуа: «Мед кынмас урожайыс, öнi нинöм нин он вöч». А Женя воча: «Локтöй! Чукöртам!». Ковмис локны. И мый ми аддзим? Му вылын – 7 карасина лампа, Женя кык киöн тэрыба чукöртö картупель. 5 тыра мешöк нин сулалö. Миянлы яндзим лои. Öдйö вежсим да петiм тшöтш. Ывлаын кöдзыд. А Женя пывсян бöрын локтiс, медым отсавны миянлы. Шмонитiс-гажöдiс, корис öдйöджык вöрöдчыны. 12 час войын кöсйим гортö пырны, но Женя шуис, мый быть колö помавны. 3 час асылын сöмын эштöдiм. Ме чайта, мый татшöм ичöт подвигыс сылöн уна вöлi олöмас».

Евгений Савинлöн мам Эмилия Константиновна Савиналöн казьтылöмъясысь: «Женя вöлi бур сьöлöма, кывзысьысь. Локтас школаысь, кутлас менö ёна-ёна да вашкöдас: «Мамуль менам, тэысь донаыс некод абу!». Чечнясянь быд лун звöнитлiс. Медбöръяысь звöнитлiс август 28 лунö. Войнас уськöдчис ина вöт: «Мамук, ми регыд воам гортö…» Коли тöлысь служитны. Моз (август) тöлысьын ёртъясыс волiсны Комиö, корисны гортас и Женяöс, но сiйö кольччис, эз вермы эновтны ассьыс ёртъяссö…»

Евгений Савинöс нэм кежлö нимöдöм могысь Нёбдiнса школалöн пыранiнö öшöдöма казьтылан пöв. Герой-земляк йылысь югыд паметьыс пыр коляс сьöлöмын налöн, кодъяс тöдлiсны сiйöс да казьтылöны.

Александра ДОРОНИНА.