Оз кусны югыд нимъясныс

Ладановъяслöн паметьлы сиöм лыжиöн панъясян районса восьса первенство таво муніс вежсьытöг Одыб сиктын. Субöтаö, март 4 лунö, водз асывсянь сиктса школа дорö воисны районса сиктъясысь том да арлыда спортсменъяс. Ставыс – 100 лыжник. Локтöмаяс пиын вöліны и ордйысьöмлы подув пуктысьяс, кодъяс уна во сайын ышöдісны сійöс котыртны. Тайö Михаил Валентинович Михайлов, Иван Александрович Михайлов, Татьяна Васильевна Ларукова да мукöд.

Мероприятие кыпыда восьтöм муніс спортшколалöн ыджыд залын. Россиялöн да республикалöн кыпъяс юргöм бöрын ордйысьысь командаяслы (Кöрткерöсысь, Шойнатыысь, Висерысь, Керöсысь, Одыбысь), дона гöсьтъяслы моз, ныв-зонпосни сетісны гöгрöс тупöсьяс (каравай). Тайö жö томуловыс, пусьысь паськöмаöсь, став водзын йöктісны, гажöдісны видзöдысьясöс. Сэсся спортсменъяслы, спортса ветеранъяслы, воöм гöсьтъяслы, видзöдысьяслы-тöждысьысьяслы чолöмалана да стартъяс водзын ышöдана кывъяс висьталісны ра­йонса юралысьöс-администрацияöн веськöдлысьöс вежысь Константин Карпов, Одыбса шöр школаса директор Любовь Королёва, А.В. Ладановлöн медводдза велöдчысьяс пиысь öтияс, лыжиöн панъясьöм кузя спортса мастер Татьяна Ларукова да Иван Михайлов. Ордйысьöмлöн тшупöдъясöн да мунöмöн тöдмöдіс медшöр судья Кирилл Лыткин.

Ордйысьöм водзын спортсменъяс дасьтысисны панъясьöм кежлö, видлісны лыжиöн котöртанін. Ставныс кыпыд руаöсь, дасьöсь шедöдны вермöм. Тайö лунö вöлі мича, шондіа поводдя, быттьö тшöтш нимкодясис лыжиöн котöртысьясöн. И со медвиччысяна здук – ордйысьöм пансьöм. Спортсменъяс, зонкаяс и нывкаяс, айловъяс да нывбабаяс, панъясисны ас арлыдаяс пöвстын.

Кöдзыд поводдя вöсна медпоснилы чинтісны котöртан туй кузьтасö 1 километрсянь 500 метраöдз.

Лыжиöн панъясьöмлы кыв­кöр­тöдъяс вöчигöн вермысьясöс пасйисны кубокъясöн, медальясöн, грамотаясöн да казьтылана козинъясöн. Призъясöн да козинъясöн пасйисны Михаил Валентинович Михайлов да Иван Александрович Михайлов. Сідз, 2013 воын чужöмаяс да томджыкъяс пöвстын (нывкаяс пиын) 500 метра лыжи вылын котöртöмын вермöм шедöдісны: 1 места — Жанна Левко (Одыб), 2 места – Полина Рыбакова (Кöрткерöс), 3 места — Ксения Изъюрова (Кöрткерöс); зонкаяс пиын – 1 места Пётр Коченюклöн (Одыб), 2 места – Фёдор Мишаринлöн (Кöрткерöс), 3 места – Михаил Гудыревлöн (Кöрткерöс). 2011-2012 воясын чужöмаяс пиын (1 км) медбуръяс лыдын Елизавета Мишарина (Кöрткерöс) да Артём Мишарин (Кöрткерöс) – 1 места, Анастасия Габова (Одыб) да Радомир Павленко (Висер) – 2 места, Виктория Курбатова (Кöрткерöс) да Андрей Казаков (Кöрткерöс). 2009-2010 воясö чужöмаяс пиын вермысьясöн лоины (1-3 местаын, нывъяс – 2 км, зонъяс – 3 км) Мария Михайлова (Одыб) да Роман Михайлов (Висер), Таисия Михайлова (Висер) да Степан Мишарин (Кöрткерöс), Аделина Павленко (Висер) да Никита Бабичев (Кöрткерöс). 2007-2008 воясын чужöмаяс пиын 1-3 местаяс босьтісны (3 да 5 км) Юлия Подорова (Одыб) да Иван Симпелев (Одыб), Дарья Михайлова да Николай Игушев (Висер), Ольга Габова да Илья Юшков (Кöрткерöс). 2005-2006 воясын чужöмаяс пиын медтэрыбъясöн лоины (10 км) Владислав Вахнин (Кöрткерöс) – 1 места, Аркадий Потапов (Кöрткерöс) – 2 места да Роман Петренко (Керес) – 3 места. 1994-2000 воясын чужöмаяс пиын медбура котöртісны да вермисны (3 да 5 км) Кристина Гавриленко (Кöрткерöс) да Максим Микушев (Висер) – 1 места. 1984-1993 воясын чужöмаяс пиын «зарни» шедöдіс (5 км) Кöрткерöсысь Филипп Пинягин, «эзысь» — Одыбысь Михаил Габов. Но и 1983 воын чужöм да арлыдаджык спортсменъяс пиын вермысьясöн лоины (3 да 5 км) Надежда Денисова (Шойнаты) да Николай Симпелев (Одыб) – 1 места, Павел Мишарин (Шойнаты) – 2 места.

Тайö мероприятиесö котыртысьяс — Спортивнöй мероприятиеяслöн шöрин, спортса ветеранъяс, А.В. Ладановлöн быдтасъяс-велöдчысьяс, — аттьöалісны Одыбса шöр школаса администрацияöс да Кöрткерöсса ДЮСШ-öс лыжиöн панласьöмъяс котыртöмö да нуöдöмö ыджыд пай пуктöмысь.

Ордйысьöм дырйи миянлы мойвиис сёрнитны Александр Васильевич Ладановлöн велöдчысьяскöд, кодъяслöн сöвмöм-быдмöмö, спортын водзмöстчöмö тöдчана пай пуктіс налöн радейтана, ыджыд шыпассянь Велöдысь-тренер. Вояс мунöны, но паметьысь оз вун мортлöн бур вöчöмыс да туйдöдöмыс. Бур пример петкöдлöны вöвлöм велöдчысьяс, кыдзи колö видзны паметь да водзö сöвмöдны тренерöн заводитöм зэв колана удж – сöвмöдны челядьöс спортын, дзоньвидза оласног нуöдöмöн.

Михаил Валентинович

МИХАЙЛОВ:

- Ме — Александр Васильевичлöн медводдза выпускникъяс пиысь öти. Медводз сійö велöдіс школаын физкультура, сэсся босьтчис тренеравны. Александр Васильевич дорын занимайтчи лыжиöн котралöм кузя. Сійö вöлі стрöг и ас дорас, и велöдчысьяс дорö.

Ассьыс пуктöм могъяс зілис пöртны олöмö. Кужис ышöдны, бур сöвет сетны, тöждысис быдтасъяс вöсна. Челядьлы вöлі бур примерöн. Александр Васильевич пуктіс ыджыд пай спорт сöвмöдöмö. Сы йылысь колины сöмын бур казьтылöмъяс.

Ме öніöдз котрала лыжи вылын. Быд субöтаö да вöскресенньöö петала лызнича вылö. Тайö сетö вын, ёнмöдö дзоньвидзалун, шойччöдö.

Татьяна Васильевна ЛАРУКОВА:

- Ангелина Михайловна да Александр Васильевич – енбиа велöдысь-тренеръяс. Зэв жаль, мый вывті водз мунісны олöмысь. Этша олісны, но удитісны вöчны зэв унатор. Ас бöраныс колисны югыд казьтылöмъяс. Олöмнысö йитісны да сиисны миянлы, челядьлы, кодъясöс велöдісны радейтны спорт, медсясö, дерт, лыжиöн котравны. Ангелина Михайловнакöд ми занимайтчим спортöн 4-öд классянь (кокни атлетикаöн, баскетболöн, весиг спортивнöй гимнастикаöн). Лыжи секция воссис, кор ми велöдчим 9-öд классын.

Тöдчöда, медым лыжиöн котралöмын босьтны ыджыд вермöмъяс, колö заводитны пырöдчыны тайö спортас буретш посни классъясын велöдчигöн. Лыжи – сьöкыд спорт сикас. Колö ёна дасьтысьны, вонас 10 сюрсысь унджык тренировка. Тані колö и вын, и терпенньö, кужöмöн уджöдны асьтö, быд яйчиг (мышца), медым содтöд сьöктöдъяс эз лоны, кутны öд (скорость) финишöдз. И, дерт жö, колö бур дзоньвидзалун – сійöс быть колö ёнмöдны да видзны. Зэв ыджыд тöдчанлуныс гожся дасьтысьöмъяслöн! Кор котöртан район, республика вöсна – тайö зэв ыджыд кывкутöм. Колö пыр пуктыны ас водзад мог. И кор сійöс пöртан да нимкодясян таöн – некор оз вун, тайö зэв ыджыд бур! Ставсö, мый босьтін да велалін спортын, отсалас олöмын. Спортсменъяслы сиа вермöмъяс, бура сöвмыны! А менам тренеръяслы – югыд паметь да ыджыд аттьö велöдöмысь.

Любовь Александровна КОРОЛЁВА:

- Ангелина Михайловна да Александр Васильевич Ладановъяс – миян гордость! Асланыс уджын найö вöліны збыльысь патриотъясöн и талы сиисны олöмнысö. Велöдісны радейтны чужан му, удж да повтöг мунны могъяс пöртігöн. Найö уна во нин абу миянкöд, но наöн заводитöм уджыс эз кус, а водзö мунö. 1981 воын Ладанов гозъя чукöртісны лыжникъясысь группа. Лыжи дорö ышöдісны став школасö! Налöн быдтасъяс шедöдісны вермöмъяс и районса, и республикаса ордйысьöмъясын. Найö пырöдчисны эз сöмын спортö. Велöдчысьяскöд ветлывлісны походъясö, выступайтісны художествоа самодеятельностьын. Ыджыд Вермöмсянь 60 во тыран воö Ладановъяс котыртлісны район кузя велопробег.

Александр Васильевич бöръя 10 восö вöлі сьöкыд атлетика кузя тренерöн. Сы дорын занимайтчисны эз сöмын челядь, но и верстьö.

Ангелина Михайловна да Александр Васильевич зэв ёна тöждысисны быдтасъяс вöсна, мывкыдсьöдісны найöс. Пыр кужисны корсьны петан туй быд сьöкыдлунысь. Олісны восьса сьöлöмöн, öта-мöдсö да йöзöс пыдди пуктöмöн. Татшöм велöдысьяс некор оз вунны, налöн тöдчанлуныс вывті ыджыд.

Оксана ГУДЫРЕВА.