«Сипертас» котыр петкöдчис Чувашияын

Чебоксариö воисны сьылысь-йöктысьяс Россияса 23 регионысь, тшöтш жö и Болгарияысь йöктысьяс. Фестиваль вылын петкöдчис и Одыбысь «Сипертас» ансамбль.

Миянöс радпырысь паныдалiсны Чебоксарыын. Зэв ёна воис сьöлöм вылö Чувашиялöн юркар, сiйö зэв мича, сöстöм, веж, гöгöр дзоридзьяс. Эгö аддзылöй некытысь лöп-ёг.

Шойччöм бöрын, мöд луннас, мöдöдчим Маргаушскöй районö. Маргаушиноын вöлiм музейын, кöнi позис тöдмасьны вылыс Чувашъяслöн туйвизьöн, Великöй Отечественнöй войнаса геройясöн, нималана учёнöйяскöд, писательяскöд, уджвывса геройяскöд, кодъяс чужисны тайö районас. Музейын пыр овлöны выставкаяс киподтуя йöзлöн вöчöмторъясысь.

Музейö пыралöм бöрын мöдöдчим Эсманкино сиктö. Гажа, сöстöм сикт. Миянкöд öтув йöктiс-сьылiс Рязанскöй областьысь «Звоница» ансамбль. Видзiдысьяс зэв бура примитiсны кыкнан котырсö Сьiлöм вылöналы воисны и коми сьыланкывъяс. Концерт бöрын пукалiм озыр пызан сайын, чöсмöдлiсны национальнöй сёян-юанiн.

Тайö жö сиктас эм вежа ключ. Сэнi вöчöмаöсь купель, кöнi вöлi позянлун мыссьыны, босьтны вежа ва.

А рытнас Чебоксарыын Волга бердса Набережнöй вылын, кöнi эм аслас ыджыд Гöрд площадь, чукöртчисны некымын сюрс морт. Унджыкыс семьяясöн, посниджык и гырысьджык челядьöн. Танi уна аттракцион, сьылiсны воысь гöсьтъяс. А 10 часын заводитчис фейер­веркъяслöн конкурс. Вермасисны 4 команда Волгалöн мöдар берегын. 45 минут чöж ворсiсны енэжын бияс.

Мöд луннас гажыс вöлi котыртöма Краснознаменскöй районын, сиöма сiйö Республика лунлы. Мича оформитöм ыджыд площадь вылын ассьыныс вöчöмторъяс петкöдлiсны мастеръяс, кодъяс воöмаöсь став районъясысь. Сьылiсны-йöктiсны Чувашияса самодеятельнöй артистъяс, челядь, воысь гöсьтъяс. Синмыд вералiс мича унапöлöс национальнöй костюмъясысь. Республика лун танi пасйöны сiйö юрсиктын, кодi петö вермысьöн конкурсъясын. Налы вичмö торъя содтöд грант.

Сцена вылын юргисны уна кывъя сьыланкывъяс. Бара жö «Сипертаслысь» сьылöм-йöктöм примитiсны зэв бура. Ставöн висьталiсны:»Молодцы!».

А рытнас Гöрд площадь вылын вöлi Гала-концерт, кöнi петкöдчисны фестиваль вылö воысь став котырыс и Чувашияысь самодеятельнöй артистъяс. Йöз вöлi воддза рытнас мында жö.

Бара жö видзöдiм мича фейерверк. Öнi петкöдчис Москваысь команда, кодi лоöма вермысьöн.

Чувашияын бур туйяс, шань йöз, видзöны скöт, сиктъ­ясын пуктöны турун.

Ыджыд аттьö висьталам Иван Владимирович Хабаровлы, кодi миянöс ГАЗельöн нуис фестиваль вылö.