Вöр – миян озырлун, но лышкыдасьны нинöмöн

Вöр – миян озырлун. Сöмын озырмöдчыны сьöкыд öнi. 10 во сайын повтöг 20 километра сайöдз ветлывлiм вотчыны, челядьöс новлöдлiм, петкöдлiм пöль-пöчлысь важ пöчинок местаяс. Эг полöй, мый вöрса кöзяинкöд паныдасям. А öнi ошкыд сиктö локтö, кöинъяс понъясöс нуöны, ручъяс шöйтöны карта сайöд. А мыйла? «Озырлунным» чинö, вöрзьöдам-вöтлам вöрса олысьяссö чужан местасьыс да и рöдмöны ёна, сёянныс оз тырмы. Лицензиятöг лыйны оз позь. Зоозащитникъяслы эськö вердыштавны колö, вертолётсянь шыблалыштны яйторъяссö налы.

Вöр – миян озырлун. А вöрыс бырö. Вöрыс кö миян, мыйла 10 во сайын миянтöг кырымалiсны 49 во кежлас МОНДИ-кöд соглашениесö, сетiсны арендаö. öнi кутам дорйыны. Лэдзам кöзаöс капуста йöрö, а сэсся ойзам, мый йирöма, сöмын кокъясыс капустаыслöн кольöма. Кужис кö сёрнитны эськö шуис «Эн бöрд – выль быдмас». öнi вöр пöрöдысьясыд шуöны, мый ёна садитöны, но ме ог аддзы. Бырö кö вöр – косьмас и ва. Босьтам Эжъес ю. 10 во сайын на юас уялісны посни муляшъяс, посньыдик сьöд черияс. öнi видлы корсьны! А Эжва?

Челядьöс велöдам – мунан вöрö, оз позь чегны быдмысь пу. Кутшöм вочавидзöм сетан ичöт войтырлы, кор вöр туй бок делянка вылас сплöш пöрöдöма вöрыс?

Вöр – миян озырлун. «Миянас» пырöны ставныс миян Керöс сиктысь. Сiдзкö сиктсаясыс ставöн озырöсь, но мыйлакö челядьыслöн уналöн весиг гортаныс компьютерыс абу. Сиктсалы, медым пес заптыны, делянка сетöны нюр сайысь либö кытчö прамöй техникатöг он пыр.

Вöр – миян озырлун. Миян районысь вöрсö пöрöдöны да нуöны, сiдзкö озырöн лоö районыс. Но мыйлакö ми, керöссаяс, куим во нин виччысям ичöтик клуб стрöитöм, но кыдз шуласны «воз и ныне там». Выль олöм пуксьöмсянь 103 во коли, а 2021 воын кутам 100 во пасйыны Республикалысь, а миянöдз сiдзи эз во вылыс властьыслöн киыс югдöдыштны сиктсаыслысь олöмсö. 100 воöн эз вичмыв сьöмыс стрöитны клуб.

Вöр – миян озырлун. Сiдзкö, кытысь вöрсö нуöны, кутшöм сиктъяс бердысь, сэтчö сьöмсö унджык юкны колö.

Наталья ВЕТОШКИНА,

Керöс сикт.