Меню
12+

Газета Корткеросского района - Кöрткерöс районса газет

15.05.2022 08:50 Воскресенье
Категория:
Если Вы заметили ошибку в тексте, выделите необходимый фрагмент и нажмите Ctrl Enter. Заранее благодарны!

Ыджыд Вермöмлы сиöмöн

Кык во шойччöм бöрын таво позис нуöдны став мероприятие. Ыджыд Вермöм лун кежлö Висер сиктын и концертасисны, и спортлы сиöм гажъяс нуöдiсны.

Женсöвет öтвылысь спортса инструктор Габов Владиславкöд котыртлiс быд вося «Кросс Победы» акция — котöртiсны школаын велöдчысьяс. А гырысь войтырлы – «Велокросс Победы» акция. Сiдз жö лои котыртöма «Победа будет за нами» ним улын спортивнöй эстафета. Школаын зiльысьяс, спортшколаса челядь котыр, женсöвет, ветеранъяслöн сöвет да том пенсионеръяслöн «Нюмсер» котыр вермасисны котöртöмын, граната шыблалöмын, скакалкаöн да медылö чеччалöмын, пневматическöй винтовкаöн лыйсьöмын. Гаж помалiсны öтвылысь флешмоб йöктöмöн. Медуна балл öкмис «Нюмсер» котырлöн, и налы вичмис вуджана (переходящöй) кубок.

Концерт вöлi кык юкöна. Медводз мунiс военнöй сьыланкывъяс инсценируйтöм фестиваль. Быд сьыланкыв вöлi cьöлöмö йиджана, сьöлöм вöрзьöдана. Женсöвет петкöдчис «Смуглянка» сьыланкывйöн, том пенсионеръяс котыр – «Розовый платочек», ветеранъяслöн сöвет – «Стенсянь видзöдö важся карточка», Корткерöсса ПО — «Журавлиöн». Сэсся мунiс кыпыд да гажа концерт. Петкöдчисны клубö пырöдчысь коллективъяс.

Ыджыд Вермöм лунö Висерса войтыр мунiсны «Бессмертнöй полкын». Сиктса администрация дорын мунiс митинг, чолöмалiсны администрация, детсадысь да школаысь челядь, ветеранъяс, культура керкаын уджалысьяс. «Шогсьысь мам» дорö венокъяс да дзоридзьяс пуктöм бöрын юисны тшай. Гажлун помасис салютöн. Дерт, салют эз вöв юрсиктса кодь, но век жö вöлi.

Ыджыд аттьö котыръяслы спортса гажъясын, концерт да фестиваль вылын петкöдчöмысь. Ставлы юр весьтын яръюгыд шондi да кельыдлöз енэж!

Оксана ПИНЯГИНА.

Добавить комментарий

Добавлять комментарии могут только зарегистрированные и авторизованные пользователи.

7