Бöръясны медмича нылöс

Субöтаö, моз 19 лунö, Кöрткерöсын лоö ыджыд спортивнöй гаж – «Том лов». Тайö медводдза фестивальсö сиасны Коми Республика котыртчöмсянь 102 во тырöмлы да Том йöзлöн волы. Гаж лунö мунас и районса коми нывъяс пöвстын «Райда-2023» конкурс. Ордйысьöмö пырöдчасны Шойнатыысь, Нёбдiнысь, Одыбысь да Важкуаысь вит ныв. На пиысь бöръясны куим вермысьöс. Налы вичмасны «Райда» (медводдза места), «Катшасин» (мöд места) да «Пöлöзнича» (коймöд места) нимъяс.

Тi верманныд пырöдчыны гöлöсуйтöмö, кодi мунö Кöрткерöсса культура да досуг шöринлöн öтуввез группаын моз 11-öд лунсянь моз 19-öд лунöдз, да бöрйыны «Медся муса ныв» нимпасын вермысьöс Кöрткерöсса культура да досуг шöринлöн группаын.

Вай жö тöдмасям конкурсö пырöдчысь районса коми нывъяскöд!

Тайö Важкуаысь Арина ТУРЬЕВА. Зэв окотапырысь пырöдчö «Райда — 2023» конкурсö.

Со мый сійö висьталіс ас йывсьыс:

- Ме ола Важкуа сиктын. Таво меным тыри 18 арöс. Тайö воыс менам тшупöда: юркарын енбиа челядьлы лицейын помалі 11 класс и Кöрткерöсса искусствояслöн школаын — 10 класс.

Искусствояс школаын велöдчи кöкъямыс арöсссянь и унаысь пырöдчывлi сьылысьяслöн конкурсъясö. Видлі ассьым вынъясöс Сыктывкар, Вологда, Сочи каръясын. Петкöдчывлі и районса конкурсъясын: Визинын да Кöрткерöсын. Уна конкурсын шедöдлі медводдза степеня лауреат ним.

Ветліг-мунігöн уна выльтор аддзылі-казявлі. Шöр школаын велöдчи бура, а сідзжö пырöдчылі мероприятиеясö.

Ме быдма зэв бур семьяын, кöні ставöн радейтöны да пыдди пуктöны öта-мöднысö. Менам пытшкöсса мичлунöй ёна ыджыдджык веркöссаысь. Сідзжö зэв ёна радейта ассьыным Важкуа бердса вöр-ва.

Ачымöс чайта гажöдчыны да ёртасьны кужысь мортöн. Меным кокни тöдмасьны выль йöзкöд. Ог радейт гажтöмтчыны, пыр мыйкö мöвпала да вöча. Со пырöдча «Райда» конкурсö. Кута лача, мый ставыс лоö бур. Медым лоны вермысьöн, ме пöрта олöмö енбиöс.

Ыджыд аттьö менö ышöдöмысь, конкурсö пырöдчыны отсасьöмысь бать-мамлы, ёртъяслы, рöдвужлы. Сідз жö сиа став бурсö конкурсö пырöдчысь нывъёртъяслы.

Конкурсö мöд пырöдчысь — Одыбысь Евгения ЖИЖЕВА.

Евгения юксис миянкöд:

- Чужи да быдми Одыб сиктын, Джыдж инын. Менсьым батьöс шуöны Анатолий Иванович, уджалö «Ростелекомын» интернет вöчысь специалистöн, мамö – Татьяна Васильевна, уджалö сельполöн пекарняын. Эм ыджыдджык чой Ирина.

Школаын велöдчигöн ветлывлі уна пöлöс секцияö да кружокö: кысян, серпасасян, а ыджыдджык классъяcын – спортивнöй туризм, сьöкыд атлетика да баскетбол кузя. Школаын велöдчигчöж сьылi-йöктi сиктса культура керкаын, «Льöм тусьяс» котырын. 9-11 классъясын пырöдчи Российское движение школьников (РДШ) туйвизьö, весиг öти во вöлi сэнi веськöдлысьöн. 10-öд да 11-öд классъясын велöдчи сиктса челядьлы Коми республикаса лицей-интернатын математическöй отделениеын. Школа помалi эзысь медальöн.

Öнi меным 21 арöс. Школа помалöм бöрын вуджи овны юркарö. Велöдча Питирим Сорокин нима Сыктывкарса канму университетын технология велöдысьö да техническöй кружокъяс нуöдысьö. Таво помалi коймöд курс. Медводдза да мöд курсъясын вöлi институтлöн студенческöй сöветын, нуöдлi некымын мероприятие. Миян кафедра вылын унаысь нуöдлi мастер-классъяс, челядьлы профориентация кузя презентацияяс. Таво тулысын прöйдиті велöдчöм да босьтi вожатöйлысь сертификат. Сiдзжö мöдöд во нин нуöда «Звени, коса» – Одыб сиктса ытшкысьяслысь гаж.

Радейта лыддьысьны, ёнджыкасö психология да художествоа литература. Босьтла менеджмент, маркетинг да нейробиология нырвизя небöгъяс. Радейта чöскыда пусьыны, корся выль рецептъяс. Воысь дырджык быд асыв вичмöда кад йогалы.

Тöдса йöз да бур ёртъяс шуöны, мый ме зэв мича нюмбана да быдлаö пырöдчысь нывка.

«Райда» ним кöсйö шедöдны и Шойнатыысь Таисия ШИРЯЕВА. Сійö тöдмöдіс аскöдыс:

- Меным 16 арöс, быдма уна челядя семьяын. Таво помалi Шойнатыса школаын 9-öд класс. «Райда» конкурсö пырöдча медводдзаысь на.

Водз чеччан — уна вöчны эштан, шуöны коми йöз. Вот и ме медводдза классянь ветлöдлi содтöд тöдöмлун сетан шöринса «Карамель» йöктан котырö, нывъёртьяскöд йöктывлiм районса да республикаса сценаяс вылын, йöктöмыс меным зэв ёна воö сьöлöм вылö.

Сiдзжö ме вöлi РДШ-ын волонтёр котырын, музейса экскурсоводöн, ветлöдлі «Том краевед – корреспондент» кружокö. «Звезда» газетын петавлiсны менам гижöдъясöй.

Повтöм йöз дінын кö быдман, ачыд повтöмöн лоан. Нöшта ме ветлывлi «Оптимист» военно-патриотическöй котырö, сэні ме велалi ветлöдлыны стройöн, разьны-чукöртны автомат, лыйсьыны винтовкаысь. Ёртъяскöд ми тшöкыда петкöдлывлiм ассьыным сямнымöс да шедöдлім призöвöй местаяс. Куш кинад менö он босьт!

Öнi, 9-öд класс эштöдöм бöрын, ме кöсъя пырны велöдчыны медколледжö, сетi документъяс «Сестринское дело» факультетö.

Шойнаты сикт дорын, кöнi ме чужи, сюрис тöдчана артефакт — Коми кыйсян лунпас. Шойнаты сикт сідзжö нималö тöдчана йöзöн, тайö Александр Георгиевич Осипов — медводдза коми профессиональнöй шылад тэчысь, сылöн медся нималана сьыланкывйыс «Катшасинъяс» , кодi юргö Коми мулöн быд пельöсын, Зоя Васильевна Шиликова — Коми Республикаса да Россияса заслуженнöй велöдысь да кывбур тэчысь, Альбина Ивановна Оплеснина — Коми республикаса заслуженнöй артистка да опернöй сьылысь, Ангелина Михайловна Захаренко — Россияса народнöй велöдысь, самобытнöй серпасасьысь Валерий Александрович Нечаев да уна мукöд.

Ме радейта ассьым сикт, чужан муöс, сиа, медым сiйö бура дыр на кыпалас да сöвмас! А мутö кö радейтан, и сійö тэнö радейтас!

Нёльöд конкурсантка — Вероника АНУФРИЕВА. Сiйö Нёбдiн сиктысь. Вероника юöртіс:

- Гортсаяс менö шуöны Никаöн. Ме мам-батьлöн медiчöт ныв. Чужи Нёбдiн сиктын. Танi, ас сиктса школаын, велöдчи öкмысöд классöдз, а сэсся мунi Сыктывкарö. Öнi велöдча политехническöй техникумын сетевöй администраторö.

Дзолясянь радейта ноксьыны ас киöн вöчöмторъясöн.

И Шойнатыысь мöд пырöдчысь — Татьяна ПОПОВА.

- Меным 18 арöс. «Райда» конкурсö пырöдча мöдöдысь нин. 2021 воын шедöдi «Пöлöзнича» ним. Чужи да ола Шойнаты сиктын. «Чужан сиктыд – кага потан» — шулöмаöсь важ коми йöз. Сiдзи и эм. Танi меным потанын кодь и эм: муса мам-бать орччöнöсь, кынöм пöт, а ачымöс кытшалöны тöдса, муса, сьöлöмлы дона инъяс! Мый вермас лоны бурджыкыс таысь? Уна кад мысти, колöкö, тайö кадсö кута казьтывны кыдзи медся дона здукъяс.

Ме радейта велöдчыны – шедöдны бур тöдöмлун. Таво эзысь медальöн помалi 11-öд класс, сэсся кута велöдчыны вылыс тшупöда велöдчанiнын. Зумыд тöдöмлун верстьö олöмын, дерт, ёна ковмас. Öд бура кö велöдчан – ылöдз и нималан! — бара жö радейтöны шуны коми йöз.

Нöшта радейта ноксьыны общественнöй уджöн: школаын велöдчигöн ме вöлі велöдчысьяслöн сöветöн веськöдлысьöн, РДШ-ын нырщикöн, пырöдча волонтёръяслöн котырö, тшöкыда нуöдлывлi школаса мероприятиеяс.

Ичöт классъяссянь ветлöдлі челядьлы содтöд тöдöмлун сетан шöринса «Том краевед-корреспондент» кружокö. 2018-2019 воясын велöдчи Том гижысьяслöн гожся университетын, кöнi тöдмалi уна выльтор да буртор. Радейта нуöдны туясян уджъяс. А сэсся аслам уджтасъясöн петкöдчывла районса, республикаса да ставроссияса краеведческой конференцияяс вылын. Пырöдчылi уна сикас конкурсö. Дерт жö, и коми кыв вылын. На пиысь – ставреспубликаса «Выль нимъяс» да «АРТпиян», весиг лолi вермысьöн. Нöшта занимайтча журналистикаöн. Йöзöдча ас районса «Звезда» газетын и «Йöлöга» журналын.

Ме радейта ас му, ас йöзöс, ас сикт, и, дерт жö, ассьым муса коми кывйöс.

Дасьтіс

Оксана ГУДЫРЕВА.