Чомöрасим!
Шойччан лунö Висер сиктсаяс чукöртчылiсны клубö «Чомöр» гаж вылö.
Ида Игушева вочаалiс локтысьясöс каравайöн. Челядь петкöдлiсны концерт. Фольклор котыр ливкйöдлiс частушкаяс, 3 да 4 классын велöдчысь нывкаяс сьылiсны градвыв пуктасъяс йылысь частушкаяс. Ида Игушева йöктiс, а Кристина Попова, Наташа Есова да Настя Семенец козьналiсны сьыланкывъяс.
Водзвыв вöлi юöртöма «Скатерть-самобранка» ордйысьöм йылысь. Ордйысьысьяс дасьтöмаöсь вöлöга. Жаль, мый öнi йöзöс зэв сьöкыд мый вылö кö ышöдны. Но век жö тэрыб аньяс дасьтiсны кык пызан.
Концерт бöрын ордйысьысьяс чöсмöдлiсны ставнысö салатъясöн, компотöн, варенньööн, льöмъя да чöдъя лязöн, пув юмöн, чöскыд шаньгаöн. Öтар пызансö дасьтiс Мария Петровна Михайлова (снимокын), кодi и лои вермысьöн. Сылы вичмис козин сикт овмöдчöминöн веськöдлысь Анна Поповасянь. Мöдар пызан дасьтiсны «Кудесница» клубö пырысь нывбабаяс. Найöс сiдз жö пасйисны козинöн.
Добавить комментарий
Добавлять комментарии могут только зарегистрированные и авторизованные пользователи.