Выль велöдчан воöн!

Тайö лунö школа жыръяс тырлiсны ныв-зонкаяслöн дзользьысь гöлöсъясöн, уна-уна дзоридзöн, югыд ыджыд бантъясöн, шаръясöн, челядьлöн да бать-мамлöн нюмъялысь чужöмъясöн. Татшöм кыпыд руöн быд во вочаалö ставныссö быдöнлöн сьöлöмлы дона да радейтана школа.

Тайö пöрйö гажлунлы сиöм ыджыд линейка Кöрткерöсса шöр школаын нуöдiсны важöн моз школадорса изэрд вылын, выльмöдöм кильчö дорын. Директорлысь могъяс пöртысь Павел Попов чолöмалiс велöдысьясöс, велöдчысьясöс, бать-мамöс и гöсьтъясöс велöдчан во заводитчöмöн да сиис ставныслы бура пöртны медшöр могъясныссö — уджавны падмöгъястöг, тыр-бура велöдчыны да сöвмыны. Сэсся чолöмалана кывъяс висьталiсны райсöветса председательöс вежысь Александр Василевский, районса юралысьлöн сöветник Анатолий Кулаков, общественнöй сöветö пырысь Светлана Челпанова да 11 «а» классын велöдчысь Александра Трошева. Линейка нуöдысь Елена Михайлова юöртiс, мый таво нёль первой классын кутасны велöдчыны 77 нывка да зонка. Ыджыд опыта найöс велöдысьяс пöвстын лоас и том велöдысь — тайö Зинаида Панюкова. Кыпыд линейка дырйи первой классын велöдчысьяс да налöн велöдысьяс мунiсны почёт кытшöн. Тайö здукъясö ставöн кекöначасисны. Классъясö разöдчытöдз дас öтикöд классын велöдчысьяс сеталiсны первой классаяслы республикаса Юралысьсянь да Правительствосянь козинъяс — Комиын патриотизм волы сиöм выль дневникъяс да пемыдiнын югзьысь мишка-стикеръяс.

Велöдчöм заводитчöм йылысь юöртысь звöнок сетiсны первой классын велöдчысь Кирилл Решетихин да локтан воын школа помалысь Александра Трошева.

Выль велöдчан во заводитчöм водзын, кольöм вежонö, Кöрткерöсса школа дорын нуöдiсны выльмöдöм кильчö восьтöм. Тöдчана лоöмторлы сиöм мероприятие вылö волiсны районса администрацияöн веськöдлысьöс вежысь Александра Барановская, велöдöмöн районса веськöдланiнöн юралысь Юлия Савина, Шойнатыса шöр школаса директор, вермытöмаяслöн районса котырöн веськöдлысь Ангелина Захаренко да юрсиктын олысьяс. Öнiя кильчö — бур пример мукöд школаяслы, öд сiйöс вöчöма став корöмъяс серти — сы вывтi вермасны мытшöдтöг ветлыны и вермытöмаяс.

Школаса директорлысь могъяс пöртысьлöн висьталöм серти, кильчöсö выльмöдöмаöсь «Сибалан гöгöртас» (Доступная среда) уджтас серти, сьöмсö вичмöдöмаöсь федеральнöй, республикаса да районса бюджетъясысь. Уджъяссö тыр-бура  пöртöма «Вяткастройгарант» ООО (гендиректорыс Д.Л. Кудрявцев). Важмöм кильчö выльмöдöм панöмаöсь кольöм вося вöльгым (ноябрь) тöлысьын. Сэсся неыджыд кост бöрын (поводдя вöсна) бöр босьтчöмаöсь вöчасьны. Тавося лöддза-номъя (июнь) тöлысь помын кильчö лои дась. Сiйöс дзоньталöм-выльмöдöмö ыджыд пай пуктiс велöдöмöн районса веськöдланiн: сыöн юрнуöдысь отсöгöн артмис пырöдчыны «Сибалан гöгöртас» уджтасö.