Повтöм сьöлöм

Мыйта асьсö помнитö — пыр уджын. Весиг öнi, кор важöн нин петöма заслужитöм шойччöм вылö, сiйö уджалö. Мудзсö удж саяс оз и тöдлы, шойччылö сöмын узигас. Да нöшта, кор чукöртчылöны ёрта котырöн библиотекаын «Барышни-крестьянки» нывбабаяслöн клубö. Сэнi найö зэв интереснöя коллялöны прöст кад — кысьöны-вышивайтчöны, лыддьöм небöг серти сёрнитöны, выльторъясöн юксьöны, та кындзи ветлывлöны карса театръясö, кинозалъясö да сiдзи водзö. Эльвира Ивановна окотапырысь петалö клубса сцена вылö: петкöдчö спектакльясын да культура мероприятиеясын. Зiльлунсö петкöдлö и сиктса ветеранъяслöн сöвет уджын. Оз кольччы и спортивнöй мероприятиеясысь, сiйöс позьö тшöкыда аддзывны ветеранъяслöн ордйысьöм-вермасьöмъяс дырйи. Ачыс висьталiс, мый медбура пö артмö лыйсьöм. Медводдзаысь пищальсö киас босьтлöма том дырйиыс на, кор уджалöма Ылi Асыввылын (Дальний Востокын), кöнi ветлывлöмаöсь кыйны вöлявывса кöзаöс (косуляöс).

Олiгчöж мыйыс сöмын оз овлы морткöд, бурыс и шудыс, лёкыс и шогыс... Кöть эськö быдöн нырччö бурланьö, а ковтöм «сьöдыс» оз-оз да и «волö». Шоча овлö, медым пыр вöлi бур, но и лёкыслы оз ков сетчыны. Эльвира Ивановна тай повтöма венöма уна мытшöд, некор абу элясьöма сьöкыдлунъяс вылö. Сы вöсна мый олан туйвизьсö, водзö олöмсö лöсьöдiс-сöвмöдiс-кыпöдiс ачыс, сьöлöмыслöн тшöктöм серти.

Школа помалöм бöрын Эльвира Киселёва пырöма велöдчыны Эжваса строительнöй техникумö. Но сiйöс помавны эз удайтчы экзаменсö сдайттöм понда. Регыд газетъясысь лыддьöма Зейскöй ГЭС-ын комсомольскöй стройка мунöм йылысь. Сиктса ныв ньöти мöвпавтöг, öтнас, мöдöдчöма тöдтöм, ылi муö. Вот тай повтöм сьöлöм! Воöма местаöдз, овмöдчöма, пырöма уджавны каменщик-монтажникöн. Зея карын жö тöдмасьöма аслас öнiя верöс Виктор Иосифовичкöд. Украинаысь том зонмöс пöкöритiс коми нывлöн мичлуныс, а медсясö — чужöм вылас беринъясыс. Ылi Асыввылын чужис налöн медводдза ныв. Сизим во мысти семья локтö Комиö. Чужан муын Эльвира Ивановна нёль во уджалöма вузасьысьöн, сэсся ПМК-лöн ва весаланiнын лаборантöн, дас во видз-му овмöсын (лысьтысьысьöн, техник-осеменаторöн), Адзорöмса школа-интернатлöн отсöг сетан овмöсын рабочöйöн, вузасянiнын идрасьысьöн. А öнi — «Леспил» предприятиеын стöрöжöн.

Уджысь прöст кадö Эльвира Ивановна ылавлö бисерöн вöчасьöм сайын. Керкалöн ен пельöс джаджъяс сулалöны öбразъяс, на пиысь кыксö бисерöн мичмöдöма ачыс кöзяйка. Сэнi жö стен кузяла öшалöны челядьлöн да внук-внучкалöн снимокъяс. А найö Киселёвъяслöн семьяын абу этша! Эльвира Ивановна — вит челядя мам-героиня и позьö шуны — баб-героиня, сы вöсна мый сылöн квайт внук да öти внучка. Ставныс тшöкыда волывлöны муса мам-бать, баб-дед ордö. Виктор Иосифович пыр чöсмöдлö медчöскыд сёянöн, мый дасьтö ачыс. Эльвира Ивановна шуö, менö пö плита дорö верöс оз лэдз, пусян уджыс сы вылын.

Öнi тшöкыда кывлан, унаöн дугдöны скöт видзöмысь. Киселёвъяс жö абу на лыдысь. Овмöсаныс видзöны-быдтöны кöза да кроликъясöс. Ас вöлöганад пö гажаджык-бурджык.

Эльвира Ивановнакöд аддзысим ывла вылын, буретш вöлi ноксьö град вылас. Сэки и висьталiс, мый радейтö быдтыны оз (клубника). Сылöн «Фестивальнöй» сикас оз бура воö. Весиг вузöс вылö лишалö. Зiль нывбабалöн висьталöм серти, колö пö ас кадö мусö вежны, сэки и быдмö-сöвмö бура.

Мыйын жö шудыс-радлуныс тайö сиктса нывбабаыслöн? «Медым челядь да внук-внучкаяс бура оласны да уджаласны, медым оз тöдлыны судзсьытöм олöм, пыр лоасны шудаöсь», — шуис нюмъялiгтыр Эльвира Ивановна. Сиам сылы, медым кöсйöмъясыс збыльмасны.