Аттьö, бурдöдысь!

Сьöлöм вылас воöма волысь медбратыс, том мужичöй. Казялi пö, абу веськодь синъяса, эз пальшит менам пöрысь кучикöн. Колö пö эськö медикъяслöн праздник лунö пасйыны ыджыд аттьö. А мый праздниксö виччысьны? Кор на воас, а важ сола вылад оз юктöд, кыдз шуласны. Сэтшöм кывкутана, тöдчана удж бöрйöмаöсь бурдöдысьяс, оз быдöн вермы, оз быдöн шогмы. Кöть быд лун аттьöтö висьтав.

А «тэрыб отсöг» машинаад сэки вöлöма медбрат Василий Степанович Подоров, Одыбысь петлöм морт. Во вит сайын ме гижыштлi нин сы йылысь. Сöмын на вöлi воöма Шойнатыö юркарса медколледж помалöм бöрын. Рыт-рыт пö лö­сьöдча сувтны стрöг комиссия водзö, кыпöдны квалификация. /нi медводдза категорияа уджалысь нин. Гöтрасьöма, кык пи быдтöны гозъя. Талунъя лун кежлö абу на дöз­мöма войся дежурствоясысь, оз мöвпав мунны бокö. Кыдзи и ичöт­сяньыс, семья кындзи медся радейтанаторйыс спорт.

Шойнатыса бурдöдчанiнын уджалысьяс пиысь кыдзкö онджык казяв зумыш, веськодь синъясаöс. Унджыкыслöн уна вося опыт, кутшöмöс институт оз сет.

Кывсьö, регыд пö татчöс коромина дорö шуöмаöсь чина йöз содтöд кыпöдны жыръяс. Сiдзкö лöняс некымын во нин кылöм бурдöдчанiнсö пöдлалöм йылысь сёрни. И тайö ставнымлы бур юöр.

Кор аттьöалан кывъясöн шыöдчам бурдöдысьяс дорö, пырджык вунöдам санитаркаяс да нянечкаяс йылысь. А öд налы сюрö медся няйт уджыс, став сöстöмлуныс, вермы­тöмаясöс бабитан уджыс. Кöрткерöсын «шойччигöн» ме дыр­­йи приёмнöй покойö нöсилки вылö шняпкисны няйт ёкмыль. Вöлöмкö тöлысь нин тöкаритöм да мортнога олöм­сьыс вошöм Одыбысь баба (абу ань). Санитаркаяслы ёна и ковмис сiйöс пелькöдны.

Праздник лунсö ог виччысьöй, а талун нин кывкутана, быдлунъя тöжда, колана уджысь висьталам аттьö. Аслыныс, бурдöдысьяслы, сиам дзоньвидзалун да терпенньö, гортаныс шуд!