Кöрткерöсса йöзкост театрлы – 50 во, но та йылысь вунöдiсны

Народнöй театр новлö ним аслас медводдза веськöдлысьлысь, Надежда Михайловна Клермонлысь. Надежда Михайловналöн висьö сьöлöмыс аслас пестуйтöм кага вöснаыс. Öд некод, некöн весиг эз казьтышт тайö лунъясö театр йылысь, некод эз мöдöд чолöмалана кывъяс, некод эз пасйышт газетö. А Кöрткерöс районын тайö театрыс зэв нималана, радейтана, виччысяна. Но во гöгöр нин сiйö лöньöма, сы вöсна, мый эз ло сылöн ни веськöдлысь, ни режиссёр. Зэв жаль. И лоö нöшта на жаль да курыд воштас кö ассьыс ыджыд нимсö, званиесö. Öд народнöй театр Кöрткерöсын век вöлi тöдчана, районлöн чужöмöн.

Ме öнi ола бокын и ог вермы лоны театрыскöд орччöн, но ас пытшкын пыр кута сыкöд пансьöм олöмöс. Ме вöлi сэнi и режиссёрöн, и актрисаöн. Кöсъя казьтыштны, кыдзи ме пыри тайö аслыспöлöс театрас…

Вöлi 1978 во. Ме, сэки том специалист, вои Кöрткерöсö. А индiс сiйöс менам вöвлöм велöдысь Николай Николаевич Турубанов, Коми АССР-са народнöй артист. Ыджыд сьöлöма, тöждысьысь морт. Культпросветучилищеын, кодöс ме помалi, сiйö велöдiс режиссура.

Локтi К?рткерöсö тöдмасьны культура керкаса уджалысьяскöд. Мекöд тöдмöдны локтiс и Вера Габова. Сiйö бура тöдiс и Кöрткерöс, и театр. Öнi Вера Габова – заслуженöй артистка и ворсö Коми республикаса драмтеатрын.

Культура керкаын сэки уджалiс директорöн Капитолина Гергартовна Худяева. Медводдза видзöдлассянь пырис сьöлöмö тайö мича, шань да тöлка том аньыс. Ми öнöдз ёртасям и ме лыддя ачымöс шудаöн, мый тöдса тайö ыджыд таланта мортыскöд. Нöшта специалистъяс: Людмила Михайловна Кулакова, Елизавета Максимовна Малева, Нелли Егоровна Яговникова, Светлана Ивановна Усачёва, Евгения Анатольевна Кирушева. Меным сэтшöма воисны сьöлöм вылö тайö йöзыс, мый ме пыр жö кöсйыси накöд уджавны. И менö найö примитiсны зэв бура.

Культура юкöнын сэки веськöдлiс Евгений Михайлов и инспекторöн Полина Куцева. Оформитiсны менö народнöй театрса режиссёрöн, и босьтчи уджö. Полина Андреевна Куцева меным пыр и шуис, мый обязательнö колö кутчысьны театрлöн основнöй составас и лыддьöдлiс: Надежда Михайловна Клермон, Михаил Алексеевич Кирушев, Анатолий Григорьевич Челпанов, Василий Алексеевич Изъюров, Капитолина Гергартовна Худяева, Николай Иванович Потапов, Галина Николаевна Кирушева. Ме кывзыси Полина Андреевналысь.

Но век жö полi. Опытöй менам ичöт и верма-ö бергöдны та ыджда «махинасö». Öд найö таöдз сы ыджда спектакльяс пуктылiсны. Ставыслöн нин вöлi йöзлы тöдса ним и видзöдысь (зритель) найöс ок ёна радейтiс. И медводз ми Капитолина Гергартовнакöд мунiм тöдмасьны Надежда Михайловна Клермонкöд, театр котыртыськöд. Сiйö эз на вöв пöрысь, но висьöм вöсна эз нин уджав. Надежда Михайловна примитiс менö став сьöлöмсяньыс, гöститöдiс быдсяма вöлöганас да радейтана кывъясöн висьталiс театр йылысь, артистъяс йылысь. Тайö аддзысьлöм бöрас ме сюсьджыка нин босьтчи репетицияяс бердö.

Медводдза петкöдчöмöн вöлi Борис Васильевлöн «А зори здесь тихие» пьеса серти спектакль. Васковöс ворсiс Геннадий Рихардович Унгефуг, райком комсомолса 1 секретарь, Рита Осянинаöс – Евгения Кирушева, народнöй театрлöн постановка юкöнöн веськöдлысь, Женя Комельковаöс — Любовь Лодыгина, библиотекарь, Соня Гурвичöс – Надежда Вурдова, библиотекарь, Лиза Бричкинаöс – Нелли Яговникова, музыкальнöй руководитель, Галя Четвертакöс ворсi ачым. Репетируйтiм зэв азыма. Вöлiм томöсь, оптимистъяс, лыддим асьнымöс енбиаöн. Но тайö вöлi том йöзкöд роч спектакль. А орччöн лöсьöдiм Виктор Савинлöн чужан лунсянь 90 во тыригкежлö сиöм рыт. Сэтчö пырисны Виктор Савинлöн пьесаясысь юкöнъяс. «Вабергач», «Шондi петiгöн дзоридз косьмис», «Парма ныв», «Ва шыр». Вот танi ме паныдаси народнöй артистъяскöд.

Менö, том нылöс, кöть и пыдди пуктiсны, но эз ёна кывзысьны, ас ныраöсь вöлiны бывалöй артистъясыд. Но уджавны накöд вöлi зэв интереснö, кыпыд. Мый дон быд паныдасьöм Надежда Михайловнакöд, Михаил Алексеевичкöд. Найö сцена вылас олöны. Асьныс корсьöны образъяссö, роль дорас детальяс, грим, костюмъяс. Налы оз ков режиссёр, ставсö асьныс ладмöдасны. Ме ачым велöдчи налысь. А Василий Алексеевич Изъюров! Некор вунлытöм ёрт. Зэв аслыспöлöс комедийнöй актер. Кутшöма сiйö радейтiс театр.

Нималана артистъяскöд öттшöтш занимайтчисны и челядь. Накöд ёнджыкасö пуктiм рочöн. Серамбана спектакль Эдуард Успенскийлöн пьеса серти «Чудеса с доставкой на дом». Сэнi ворсiсны 10-д класса велöдчысьяс: Сергей Мишарин, Алексей Загорский, Василий Рудаков, Нелли Васильева, Светлана Лукутина, Юрий Труфанов, Евгений Шевелёв. Асьныс думышталiсны роль, костюмъяс, декорацияяс. Выль во каникул дырйи тайö спектакльнас ветлiм мукöд сикт-посёлокъясö. Майбыр Кöрткерöсса сплавконтора сетö вöлi транспорт. А сэсся локтiсны и ичöтджык класса велöдчысьяс. Накöд лои лöсьöдöма мойдъясысь спектакльяс. «Сестрица Алёнушка да братец Иванушка», Евгений Шварцлöн пьеса серти «Два клёна», Николай Носовлöн «Незнайка в Солнечном городе». Помнита и ворсысьяссö. Галя Потапова, Лена Мамышева, Андрей Разманов, Вова Пакшин, Галя Василевская, Лена Худяева, Витя Мингела, Марина Васильева, Ира Юрченко да мукöд. Ставныс 6-öд класса велöдчысьяс. И надейтча, мый эз весьшöрö коль накöд уджыс. Бур казьтылöмъяс, театрын ворсöм гöгöрвоöм коли налöн лов вылын.

А гырысьяслöн составкöд босьтчим пуктыны Александр Ларевлысь «Пиян эз воны гортаныс» пьеса серти спектакль. Регыдъя кадöн и пуктiм. Темаыс меным зэв матысса. Меным сьöлöм серти драматическöй да трагическöй произведенияяс. Найö йиджöны вирö, тшöктöны переживайтны, сöстöммöдöны лов. Ларев гижис, кыдзи Коми муын олысь йöз пыр вуджис война. Ворсысьясыс Михаил Кирушев, Капитолина Худяева, Анатолий Челпанов, Александр Микушев, Василий Изъюров, Светлана Усачёва, Василий Попов, Галина Кирушева. Декорацияяс вылын уджалiс Евгения Кирушева. Зэв бура петкöдлiс войнаводзса, война кадся да война бöрса атмосферасö. Мый вöлi пасйöма республикаса комиссияöн.

А сэсся босьтчим и серамбана пьеса дорö. Геннадий Юшковлöн нималана «Макар Васька — сиктса зон». Макар Васькалысь рольсö кыв шутöг сетiм Василий Изъюровлы. Сылöн артмис эз сöмын шутлив да вильыш зонка, а уна тöдысь, пытливöй герой. Сылысь другсö ворсiс Женя Шевелёв. Васькалысь мамсö – Галина Кирушева, Галялысь мамсö – Капитолина Худяева, Галялысь рольсö ворсi ачым. Мишка – Василий Попов. Артмис зэв кыпыд спектакль. Ворсiсны кыпыд настроениеöн.

Ичöт дырйи на ме видзöдi драмтеатрса спектакль, Калининлöн «Печорская быль» пьеса серти. Староверъяслöн важ уклад, чорыда енлы эскöм, том ныв-зонлöн радейтчöм, том нывлöн вöля корсьöм – ставсö тайöс окота лои петкöдлыны Кöрткерöсса видзöдысьяс водзын. Меным, кыдзи режиссёрлы, оз, дерт, ков ёна рольясас пырны. Но вывтi нин окота вöлi аслым ворсны. И ме босьтчи Анналысь рольсö петкöдлыны. Сашкоöс ворсiс Александр Микушев, а бöрас Андрей Канев. Сэки 10-öд класса велöдчысь. А öнi Андрей Канев нималана поэт и прозаик. Анналысь мамсö первой ворсiс Евгения Дунаевская, а сэсся Людмила Кулакова. Анналысь чойсö ворсiс Светлана Усачёва, воксö – Игорь Куцев, пöдругасö – Любовь Лодыгина, ворожеяöс — Надежда Вурдова.

Тайö спектакльнас ми бара жö ветлöдлiм орчча сиктъясö да посёлокъясö. Аттьö Александр Прокопьевич Размановлы, сплавконторалöн профкомса председательлы, кодi тырвыйö могмöдiс миянöс транспортöн. Видзöдысьыд вöлi быдсямаыс. Кöнi бура примитiсны, кöнi веськодя. Уна во мысти Андрей Канев та йылысь гижис висьт, кöнi восьтiс ассьыс майшасьöмъяссö.

А кор ми ветлiм Усть-Лöкчимö миянкöд лои ускöттьö. Спектакль помасьöм бöрын гортлань мунiгöн машинаным пöри. Бур, мый некод эз доймы. Машинасö и кöлуйнымöс туй вылас и колим. Асьным сэсся подöн, веж морозын, гортлань довгим.

Вот татшöм вöлi Кöрткерöсса народнöй театркöд менам меводдза паныдасьöмöй. А сэсся театрыслöн лои выль эпоха, кор локтiс Анастасия Анатольевна Казакова (сэки Потапова). Сiйö лэптiс театрсö вылысджык тшупöдö. Сы дорын ме лои нин актрисаöн. Но та йылысь лоö выль висьталöм.

А öнi чолöмала радейтана Кöрткерöсса йöзкост театрöс юбилейöн да надейтча, мый сылöн лоö выль режиссёр, выль олöм и зэв на кузь творческöй туй. Кöрткерöсса дона йöз, энö лэдзöй кисьтны театрсö, тайö донаторсö.