Школакöд йитчöм олöм
Нималана Нёбдiнса Витторлöн чужанiнын кызь квайт во сайын овмöдчис Луздор районса Слудка сиктысь петлöм Надежда Викторовна Тимушева (снимокын).
Ай-мам муысь ылi Нёбдiнö Надежда веськалiс Коми пединститутлöн естественно-географическöй факультетын велöдчöм помалöм бöрын. Киын диплома нылöс индiсны уджавны тайö сиктса школаö, кытчö вöлi колö география велöдысь.
Тöдтöм инö воöм мортöс медводз чуймöдöма сиктлöн кузьтаыс — мудзтöдзыс тай воöдчöма сикт шöрöдз. А сэнi — кирпичысь кык судтаа школа, музей, ыджыд культура керка... Чужанiнас татшöмыс эз вöв.
Том велöдысьöс бура вочаалiс уджкотыр, дженьыд кадöн тöдмасис сиктса йöзкöд, томуловкöд. Танi жö мича, статя ныв аддзис и муса пöвсö, петiс верöс сайö, гозъялöн чужисны ныв да пи. Öти кывйöн кö — вужъясис. Öдйö лэбисны вояс. Аслас быдтасъяскöд-велöдчысьяскöд тшöтш верстяммис и Надежда Викторовна. Содiс удж опытыс да челядьöс велöдан-мывкыдсьöдан сямыс. Таын эм пайыс и сылöн туйдысьлöн — география велöдысь Лидия Ивановна Поповалöн.
Бöрö кольöм велöдан воясö бергöдчылöмöн Надежда Викторовна казьтылiс, мый урокъяс сетöм кындзи сiйö нуöдöма «Вöр-ва видзан» да «Том натуралист» кружокъяс. Велöдысь висьталiс, мый ныв-зонпосни окотапырысь волывлöмаöсь занятиеяс вылö содтöд тöдöмлунла. Важöн пö челядь ёна лыддьысьлiсны, öнi жö быдöнлöн киын сотöвöй телепон либö планшет да книгакöд омöля ёртасьöны. Сэсся и компьютеръяс ёна кокньöдöны велöдчысьясöс. Надежда Викторовнаöс майшöдлö томуловлöн чужан коми кыв дорö кöдзалöм. Быдлаын кылö роч сёрни. А öд водзтi челядь эз тöдны, кыдзи рочöн шусьö сiйö либö мöд быдмöг.
Зэв жö нин öдйö кольöны велöдан вояс, быттьö волöн вежласьысь кад (тöв, тулыс, гожöм, ар), тэрмасьöмöн мунöны, быттьö полöны сёрмöдчыны. Уджö ылалöм мортлöн тай тадзи. А кор уджыс радейтана, кыдзи Надежда Викторовналöн, то лунтыръя кадыс оз тырмы, медым ставсö пöртны. Челядькöд удж пö зэв интереснöй, кыскана. Та вöсна уджас сьöлöмнас сетчöма.
Велöдöм кындзи (сетö химия да география урокъяс) Надежда Викторовналöн эм нöшта на мог, тöдчана да кывкутана, — юрнуöдны школаöн. Куим во сайын сiйöс индiсны директорöн. Юрнуöдан удж абу кокни, но уджач мортлы тайö абу падмöг. Отсалöны кужöмлун, уна тöдöмлун, писькöслун да котыртан, веськöдлан сям. Нёбдiнса школаöн юрнуöдысь висьталiс, мый öнi велöдчанiнын тöдöмлунъяс босьтöны 1-9 классъясын 40 велöдчысь (уджавны заводитан воясö вöлöма 100 сайö велöдчысь). Налысь «юръяс югзьöдöны», велöдöны 12 велöдысь, ставныс — вылыс да первой категорияа специалистъяс. Став «предметникыс» эм. «Велöдчысьыс этша, и школаын олам, быттьö öти семьяын, — шуö Н.В. Тимушева. — Челядь ставныс син водзынöсь, бура тöдам бать-мамныссö, кыдзи олöны семьяын, мый вöчöны прöст кадö. Сiдз, велöдчысь кö эз лок школаö, то пыр жö юасям бать-мамлысь, кутшöм помка вöсна. Волывлам и гортаныс. Дерт, тайö абу быдöнлы (бать-мам пиысь) сьöлöм серти. Но татшöм ногöн ми видзам челядьöс лэдзчысьöмысь, лёк улö сетчöмысь». Сэсся содтiс, мый велöдысьяслöн ыджыдлун-контроль вöсна öткымын бать-мам челядьсö ыстiсны велöдчыны Шойнатыса школаö. Мукöдыс жö ыстысьöмаöсь, мый школаын оз велöдны англия кыв. Да, войдöр тадзи и вöлi: Нёбдiнса школаын дыр кад велöдiсны француз кыв, но öнi, кыдзи и Шойнатыын, сетöны тöдöмлун и англия кыв кузя. Мунöм велöдчысьяс öдвакö бöр бергöдчасны-локтасны чужан сиктса школаö. Да и быдöнлöн эм инöд (право) бöрйыны, кöнi кöсйö велöдчыны. Мырдысьöн кутны оз позь.
Нёбдiнса школа шоныд да югыд, сэнi гöгöр сöстöм. Велöданiнын бура тöждысьöны быдтасъяс вöсна. Сiдз, медым велöданiнлöн джуджыд стрöйба дыр на сулалас — дöзьöритöны да видзöны. Дзоньталöны, кытi колö мавтыштöны, краситöны-белитöны, тувйыштöны, гартыштöны... Надежда Викторовналöн висьталöм серти, öнi медшöр мог — шиперöн вевттьыны школа вевтлысь мöд джынсö. Öтар джынсö вевттьöма нин. Вичмöдасны кö сьöм, то заводитöм удж помаласны.
Удж йылысь варовитöм бöрын сёрнитыштiм прöст кад да шойччöм йылысь. Надежда Викторовналöн прöст кадыс муртса и овлö, сiйö водз асывсянь сёр рытöдз школаын. Водзтi джодждöраяс кылöма да весиг ярманга вылын вузавлöма. Кöть и важöн нин абу босьтлöма киас кыанторъяссö, кужантуйыс эз быр. Воас кад да бара на мастеритас чуймöдана мичаторъяс.
Быд во, отпускалiгас, Надежда Тимушева ветлö чужанiнас. Сылы сiйö пыр медся дона да муса. Радейтö петавлыны вöр-ваö, путешествуйтны. Студенталiгас тай пыр кытчöкö ветлöмаöсь. Меддыр, тöлысь, вöлöмаöсь Киргизияын. Уналатi ветлöм-мунöм да унатор аддзылöм паськöдiсны тöдöмлунсö, и öнi урокъяс дырйи Надежда Викторовна висьталö велöдчысьяслы ас синмöн аддзылöмторъяс да ылi муяс йылысь.
Тöдöмлунъяссö öкмöдöм да паськöдöм могысь Надежда Викторовна уна лыддьысьö. Тшöкыда пыравлö сиктса библиотекаö. Библиотекаын судзöдöны зэв интереснöй журнал — «Чудеса и приключения» и сиктса велöдысь быд пöрйö босьтлö сiйöс лыддьыны. Лыддяс да сэсся урокъяс вылын челядькöд юксьö гижöдъясысь тöдмалöм выльторъясöн, шензьöдана да вöвлытöм юöръясöн. А томулов тайöс и виччысьöны, вом паськöдöмöн кывзöны да водзö на корöны висьтавны.
Выль во регыд «листыштас»-вуджас коймöд тöлысьö. Кад мунö тулыслань, регыд вöрзясны му-валöн сöнъяс, гöгöр ставыс ловзяс, садьмас тöвся унмысь... Велöдысьлысь мöвпалöм друг торкис урок вылö чуксалысь гора звöнок. Велöдысь тэрыба петiс кабинетысь да мöдöчис классö, кöнi сiйöс виччысисны нин велöдчысьяс. Чолöмасьöм бöрын заводитчис урок. Надежда Викторовна бара на «нуöдiс» челядьöс тöдöмлунъясла.
Добавить комментарий
Добавлять комментарии могут только зарегистрированные и авторизованные пользователи.