Восьтöны ыджыд олöмö ичöтик мортлы туйвизь
Талун, кöч 27 лунö, ассьыныс гажлун кутасны пасйыны воспитательяс да детсадъясын зiльысьяс.
Миянлы тöдса уна бур да колана уджсикас: бурдöдысь, стрöитель, серпасасьысь... Но медтöдчана да колана морт олöмын уна нэмъясöн вöлi и кольö кагульничалöн (воспитательлöн) удж. Кагаöс мывкыдсьöдöм — абу кокни удж, сьöкыд да кывкутана. Тайö уджсикасын зiльысь морт торъялö мукöдсьыс шань сьöлöмöн, ыджыд терпöнньööн, енбиалунöн.
Буретш татшöмöн и лоöны Одыбса челядь садйын зiльысьяс Альбина Пантелеймоновна Михайлова да Валерия Леонидовна Подорова.
Челядьöс мывкыдсьöдöмö кыкнан ань сиисны нин 30 сайö во. И воысь воö найö козьналöны асланыс быдтас-оз тусьяслы ыджыд тöдöмлун, муслун, восьтöны ыджыд олöмö ичöтик мортлы туйвизь.
Альбина Михайлова бöрйис тайö уджсикассö аслас сьöлöм кылöм серти. Ичöтсяньыс пыр мöвпалiс лоны посни класса челядьöс велöдысьöн. Но школа помалöм бöрын мöвпыс вежсьыштiс, сьöлöмыс кыскис нöшта на ичöтджык челядь дорö. И ань веськöдчис велöдчыны Сыктывкарса мöдöд номера педучилищеö. И со коли 32 во, кыдзи сiйö медводдзаысь воис уджавны детсадйö, но тайö кадöн ньöти эз жалит, мый бöрйис тайö уджсикассö.
Валерия Подорова воспитательлысь удж бöрйöмöн водзö нюжöдiс ас рöд¬вужлысь династия и, кыдзи аслас уджъ¬ёрт, нэм кежлас йитiс олöмсö челядьöс мывкыдсьöдöмö. Аньлöн уджалан стажыс 30 во.
Öта-мöдсьыс аньяслöн удж оз торъяв, уна во чöж нин найö зiльöны öти группаын. Буретш öнi налöн кывкутöмын медiчöт арлыда — 1арöс куим тöлыссянь да 3 арöсöдз войтыр. Быд лун радпырысь шань да бур сьöлöма мывкыдсьöдысьяс дорö локтöны Кариночка, Данилушка, Христиночка да уна мукöд Одыбса ныв-зон. И оз коль öти лун, мед челядь танi оз тöдмавны выльтор. Кöть и ичöт арлыдалы, но Альбина Пантелеймоновна да Валерия Леонидовна пыр жö кужöмöн котыртöны да нуöдöны занятиеяс. Тайö ышöдана ворсöмъяс да тöдöмлунъясö путешествие. Воспитательяс отсöгöн челядь велöдчöны радейтны небöг, öд быд лун найö öтвылысь лыддьöны мойдъяс да кывбуръяс, тöд¬масьöны кытшалысь вöр-вакöд. И ни öти кагук оз кыв ассьсö танi ковтöмöн, быдöн радейтана да муса. Лунтырöн воспитательяс аддзöны вын да колана небыд кыв быдмысь войтырлы.
Тöдса, быд морт аслас уджсикасын зiлигöн кылö сьöлöм кылöм. А мый жö сетö тайö аньяслы челядькöд удж?
- Збыль вылö — уджыс сьöкыд, торйöн нин посни войтырыдкöд кывкутöмыс вывтi ыджыд, — вочавидзисны кагульничаяс. — Но сэк жö быдмысь войтыр дорын кылан асьтö томöн, коланаöн. Абу öд весьшöрö шулöмаöсь, челядь пö — олöмлöн дзоридзьяс. Тайö сiдзи и эм, найö мичмöдöны олöм.
Воспитательяслöн да челядьлöн садйын уджалысьяслöн гажлун водзын медвод ыджыд аттьö висьталам налы, кодъяс зiльöны колана уджсикасын — мывкыдсьöдöны быдмысь войтырöс. Сиам налы крепыд дзоньвидзалун, ыджыд терпенньö, да бать-мамсянь пыдди пуктöм.
Добавить комментарий
Добавлять комментарии могут только зарегистрированные и авторизованные пользователи.
