Николай Казаковöс ветеранъяс шойччыны эз лэдзны

Медводз чукöртчöм войтыр водзын сёрнитiс ветеранъяслöн райсöветöн юрнуöдысь Николай Михайлович Казаков. Сiйö вöчис сöветлöн, а сiдзжö аслас, кыдзи юрнуöдысьлöн, уджлы кывкöртöдъяс. Сiйö тöдчöдiс, мый сиктъясын да грездъясын ветеранъяслöн сöветъяс бура пöртöны пуктöм могъяс, котыръяс пиысь кызвыныс зiльöсь, пырöдчöны меставывса и районын мунысь уна сикас мероприятиеö, ышалысьöсь — лоöны бур примерöн томуловлы и верстьöлы. Кывкöртöдъяс вöчöм помын Николай Михайлович шыöдчис уджъёртъясыс дорö, медым ставсö бура мöвпыштöмöн да донъялöмöн бöрйисны ветеранъяслöн районса сöветö выль юрнуöдысьöс да сöветлысь президиум. «Ме юрнуöдi ветеранъяслöн районса сöветöн 14 во. Кодкö, гашкö, чайтö, мый юрнуöдан-веськöдлан удж зэв кокни. Ме жö шуа — тайö сьöкыд, кывкутана, уна вын босьтысь удж. Мый верми — вöчи, и окота нин шойччыштны. Став водзаныд кöсйыся: кута отсасьны выль бöрйöм юрнуöдысьлы. Сиа ставныдлы став бурсö. Тöда, мый тi пыдди пуктанаöсь, тiянöс радейтöны ас сиктса йöз. Кольöй татшöмöн уна-уна во». Татшöм юöртöм вылö ветеранъяслöн сöветö пырысьяс öта-мöд бöрсяыс кутiсны шуавны, мый Николай Михайловичлы колö на пö уджавны, öд сылöн ыджыд удж опыт, уна воöн вöчöма уна бур районын ветеранъяслöн öтмунöм сöвмöдöмын. Ветеран-активистъяс кöсйысисны отсавны юрнуöдысьлы и водзö тыр-бура пöртны могъяс. Ветеранъяслöн районса сöветöн юрнуöдысь йылысь бур кывъяс висьталiсны и «Кöрткерöс» МР-са администрацияöн веськöдлысь Василий Гончаренко, и выльöн на бöрйöм райсöветса депутат Михаил Питашук. Найö тöдчöдiсны, мый Н.М. Казаков районын пыдди пуктана, авъя да сибыд морт, сiйöс бура тöдöны быд сикт-грездын. Сылысь уджсö пö вылö донъялам, и корам, медым уджыштас на, быд уджын, водзмöстчöмын кутам отсавны.

Ветеранъяслöн райсöветса ревизия нуöдан комиссиялöн отчитайтчöм бöрын ставныс гöлöсуйтiсны-донъялiсны сöветлысь удж. Вöлi вöзйöма пуктыны «бур» дон, но ставныс шуисны и сетiсны гöлöсъясныссö «медбур, отлично» дон вöсна. Сэсся öтвылысь бöрйисны-вынсьöдiсны ветеранъяслöн райсöветö пырысьясöс (33 мортöс) да президиумö пырысьясöс (12 мортöс). Конференция дырйи бöрйисны и юрнуöдысьöс. Кöть кыдзи эз вöзйысь Николай Михайлович шойччыны уджысь, сiйöс ставныс бöрйисны важ выль чинö. Мыйöн сiйöс и чолöмалам.

Чукöртчылöм помын бöрйисны делегатъясöс ветеранъяслöн республикаса конференция вылö (мунас юркарын йирым 2 лунö) — Николай Казаковöс, Вера Кутькинаöс да Александр Сугоровöс.