«Степан багатырлöн туй»

Тайö ворсöмсö Одыбса том войтыр öтвылысь нуöдöны витöд во нин, а медшöр могыс — ёртасьöм, вöр-вакöд йитчöм да сьöкыдлунъяс венны дасьтысьöм.

Эз повзьыны поводдяысь да воисны ворсны сöмын 3 команда: Висерысь — «Пионерский отряд», Сыктывкарысь — «МИ котыр» да Одыбысь — «Лесники».

Ворсöмлöн уджтас (программа) вöлi куим юкöна. Медводз командаяс велöдчисны да дасьтысисны кузь туйö петны. Танi вöлiны татшöм могъяс: пес пилитöм да поткöдлöм, бипур пестöм, палатка ин дасьтöм, гезъяс кузя да кер кузя ва гуран вуджöм, пу вылö кавшасьöм, доймысьöс бурдöдöм да мукöд тшöктöмъяс. Мöд юкöн — Степан багатырлöн туй кузя ветлöм, но сы во¬дзын быд команда дасьтiс коми сёян, медым кузь туйын тырмис эбöс. Тайö юкöнас пырис ориентирование, сёръя лэч да му лэч сиялöм, няйтысь машина кыскöм, шор вомöн кер пöрöдöм да вуджöм, нюр кузя вуджöм, чери кыйöм, пыжöн вуджöдчöм да мукöд тшöктöмъяс. И бöръя, коймöд юкöнын, нуöдiсны Степанлöн ворсöмъяс: ньöввужйысь лыйсьöм да шыöн шыбласьöм.

Матö 30 час тырмис командаяслы, медым удитны пöртны быд тшöктöм, а узьны мойвиис сöмын гоз-мöд час. Сюри и мыдзöм, и кынмöм, и кöтасьöм, но ворсöм помын некодi эз норась сы вöсна, мый быдöн кутiсны юрас, мый найö вермасны венны тайö сьöкыдлунсö и оз кыскыны улö ассьыныс команда.

Медводдза места зэв ичöт коластöн шедöдiс Одыбса том войтырлöн «Лесники» команда. На бöрын «Ми котыр» да «Пионерский отряд» командаяс, кодъяс сiдзжö лоины вермысьясöн, öд тайö ворсöмыс налы содтiс уна радлун да эбöс.

Фестиваль котыртысьясыс — «РЦДО» МОО-ын уджалысьяс да Одыбса том войтыр. Одыбса войтыр пиысь унаöн велöдчöны на школаын. Зэв ыджыд аттьö козинöн отсалöмысь «Коми войтыр» МОД-лы, «Единая Россия» да «ЛДПР» партияяслы.

«Степан багатырлöн туй» ворсöм бöрын став командаыс öтув снимайтчисны да топыда кутчысьлöмöн юксисны нюмбана мöвпъясöн.