Кодзувлöн югыд туй

Тайö Енбиа мортыс торъялiс мелiлуннас да шаньлуннас. Вöлi аддзысям сыкöд да важ бур ёртъяс моз варовитам олöм, удж, семья йылысь. Кöть эськö öта-мöднымöс тöдiм муртса на, гоз-мöд паныдасьлiгöн. Зоя Васильевналöн пыр сюрлiсны мелi кывъяс, бур сиöмъяс. Öтчыд Выль во водзвылын удж вылын трiньöбтiс телепон, шыöдчис Зоя Васильевна, чолöмасим, варовитыштiм и медбöрын сiйö шуис: «Оксана, матысмö Выль во и ме тэнö чолöмала аслам кывбурöн». Таысь сьöлöм вылын лои сэтшöм любö, нимкодь. Тайö сёрниыс нэм кежлö колис вежöрам. Сылöн мелi кывъясыс инмисны сьöлöмöдз, лоины сэтшöм донаöн, шонтанаöн. Кужис и ышöдны, ачыс гижан уджö ылалöм Морт бура тöдiс, мый ловбитöг гижöд оз артмы либö лоас косöн, абу лыддянаöн. Велöдысь-туйдöдысьлöн донъялöмъясыс некор оз вунны.

Кöть талун и Зоя Васильевна абу миянкöд, сылöн чужöм-пертасыс, кывъясыс, висталöмъясыс олöны медшöр инын — сьöлöмын. Мöвпъясын, вежöрын сiйö пыр ловъя. Сiйö лоö куслытöм югыд кодзувöн...

Зоя Васильевна чужлiс 1940-öд воö Шойнаты сиктын. Школаын велöдчöм бöрын босьтiс тöдöмлун Коми канмуса педагогика институтлöн филология факультетын. Пединститутын велöдчигöн Зоя Васильевна ветлöдлöма литературно-творческöй кружокö, кöні юрнуöдöмаöсь коми поэтъяс Геннадий Юшков да Альберт Ванеев. Сэні и велöдчöма гижны кывбуръяс, видлавны да донъявны драмаа гижöдъяс. Уджсикасö велöдчöм специалистöн локтöма чужан сиктса школаö: сэнi велöдiс коми кыв да литература, роч кыв да литература. 1970 воын Шойнатыса школаын Зоя Васильевна котыртіс «Би кинь» нима литературно-творческöй кружок. Сылöн быдтасъясыс öні асьныс велöдöны школаясын, гижöны да йöзöдчöны газет-журналын.

Зоя Васильевна Шиликовалöн литературнöй творчество йылысь пасйöма «Литературная энциклопедия Земли Коми» небöгын. Сылöн кывбуръяс вылö гижöма уна мыла сьыланкыв. Найöс дасьтыны отсалöмаöсь коми композиторъяс А. Уляшов, А. Ген, Г. Горчаков, И. Латкина да мукöд. Енбиа гижысьлысь творчество пыдди пуктысьяс пасйöны, мый «сьыланкывъяссö кывзігöн сьöлöмыд топавлö, нормылö да синваыд доршасьлö», «поэт-гижысь нимöдiс ассьыс ичöт рöдинасö мича кывъясöн, петкöдлiс ыджыд пыдди пуктöм сiйö ин дiнас, кöнi чужис да кытысь босьтiс став мичасö, коланасö да мöрччанасö». Эмöсь и нюмсера сьыланкывъяс. Зоя Васильевналысь кывбуръяс пыр¬тöма коми кыв велöдан небöгъясö, йöзöдлiсны «АРТ», «Войвыв кодзув», «Би кинь» журналъясын, «Звезда» да «Коми му» газетъясын. Миян районса йöзлы зэв тöдчана, мый З.В. Шиликовалöн «Кöрткерöс районса му» кывбур вылö пуктöм сьыланкыв (шыладыс Алексей Генлöн) вермис конкурсын да лои ра-йонлöн кыпöн.

Тöдчана велöдысьöс вылö донъялöны и быдтасъясыс: «Зоя Васильевна пестiс ыджыд муслун чужанiн, сэтчöс олысь йöз да муса кыв дiнö».

Зоя Васильевна — Коми Республикаса школаын нимöдана велöдысь, Россияса нимöдана велöдысь.Татшöм велöдысьяссö шуöны Енмöн сетö¬маясöн. Быдтасъяслы вöлi мöд мамöн, уджкотырсалы — ёртöн, туйдöдысьöн. Вын-эбöссö жалиттöг уна во зiлис радейтана велöдысь уджын. Ыджыд озырлунöн Зоя Васильевналы вöлi чужан коми кывйыс. Тайö донаторсö, муса мамыслысь кывсö, видзис кедзовтöмысь, бырöмысь.

Зоя Васильевна олiс восьса сьöлöмöн, шоныдлунсö некодлы эз жалит. Помнитам, казьтылам, бурöн нимöдам.

Сьöлöм вылö воö З.В. Шиликовалöн уна кывбур. На пиысь öти — «Козьнав меным»:

«Козьнав меным асывсö

Би гöрд югыд кыаöн,

Енкайыслöн сьылöмыс

Тшöтш мед матын шыалö.

Козьнав меным лунсö тэ,

Шоныдöс да мичаöс,

Лышкыд шондi югöрыс

Муслуннымöс видзас мед.

Козьнав меным рытсö тэ

Лöня кусысь кыаöн,

Шудсö небыд сывбордйын

Кыкöн тэкöд кыам ми.

Козьнав меным войсö тэ

Пемыдöс да юмовöс,

Мелiлунсö позяс мед

Ыджыд кöшöн гумовтны».